不一樣的十二月

掙扎咗好耐，到底應唔應該寫呢篇blog呢？陸續聽到blog友們嘅好消息，艾菲確實唔想掃大家慶，亦唔想大家擔心艾菲一家，但艾菲又覺得，要真正走出傷痛，先要面對自己真實感覺，否則唔會有人幫到自己...

十二月，係艾菲嘅生日月，仲有冬至同聖誕兩個大節，每年都係艾菲最期待嘅月份，今年亦唔例外，一早安排好節目準備好好慶祝，可惜因為「佢」嘅不辭而別，艾菲最終選擇咗返娘家避世靜養，連帶燒腩仔都只可以過一個冷冷清清嘅聖誕。

到宜家仲好記得生日前一日驗到條唔確實嘅線，經Dr Wong whatsapp confirm後，滿心歡喜以為係個天送畀艾菲嘅生日禮物，到生日後第二日流啡，Dr Wong解釋作小產唔代表真係會小產，仲幫艾菲照到個胎囊，艾菲同米高鬆一口氣以為係小事，直至四日後流紅去咗聯合睇急症，醫生話搵佢唔到都未死心，甚至留院一日等到第二朝婦產科醫生再照話唔confirm要抽血驗，結果懷孕指數只係得返25仲覺得會有奇蹟，終於到冬至當日朝早五點幾再突然流紅，艾菲先終於識得醒，叫醒米高問「佢係唔係要走啦」。

由有到無只係一星期嘅事，都未來得切開心「佢」已經話走就走，理智嘅艾菲當然知道「佢」嘅離開唔係自己嘅錯，如果「佢」本身係有問題，勉強留住「佢」對大家都無好處，而且「佢」喺六周呢個時候就走，艾菲仲可以自行排清唔需要入院塞藥或做手術，都係「佢」愛鍚艾菲嘅表現來，而且艾菲已經有燒腩仔，艾菲知道自己比好多人幸運。

不過現實嘅艾菲並無想像中堅強，想當日Dr Wong聽完艾菲嘅出血情況，只簡單whatsapp回覆一句「可能宜家排緊出來」，艾菲已經喊到死去活來，雖然之前入院都已經有晒心理準備，但到佢要走嘅一刻始終係十萬個唔捨得⋯

防火安全推廣日

之前見大爺參觀消防局好好玩，燒腩仔又係個標準救護車迷，艾菲就上網搵吓料睇吓邊到有得玩，發現我哋區喺前一個星期六有個防火安全推廣日，好似都有D嘢玩咁，就決定in完所有學校後，帶燒腩仔過去玩當奬勵。



因為燒腩仔呢朝未八點已經起身，in完食埋飯都差唔多進入無電mode，所以我哋活動未開始就入場睇吓玩得幾多得幾多，入到去已經放晒D消防車喺到畀人睇，我哋就逐架逐架埋去望，叫燒腩仔影吓相咁，不過佢可能無諗過D消防車入面有人啦，所以消防員叔叔喺車到走落來時，佢嚇到即刻想走佬。;P



行咗陣見呢個消防車彈床泵好氣就即刻拉燒腩仔埋去玩（未set好時艾菲仲以為係示範跳樓用D氣墊添呀），好彩我哋早去早排隊，第二round已經到佢。

K1求學大作戰 ~ Day 6

6/12/2014

第十三回合：聖三一中心幼稚園 10:00

來到interview嘅最後一日，艾菲已經完全無壓力，皆因呢間學校完全無諗過會有機會，一條龍Happy School有學券全日制仲要本身有N班直升，年年都超額報名幾倍，報K成功率實在太低，但點解我哋明知唔得仲報呢，事關同米高商量報唔報聖三一曾肇添時，佢話反正呢日佢得閒放到假，不如就試埋佢當玩吓喎...咁都得？不過當係參觀吓見識吓都好吖﹗

因為明知學校會放好多邪惡嘅玩具出來任玩，所以我哋呢日無特別早到，同燒腩仔食完早餐就慢慢坐巴士出發，都係上車十分鐘就到，登記完就行去校務處聽老師brief流程，跟住已經夠鐘上課室門口等interview，而最好笑係坐坐吓先發現隔離個小朋友係燒腩仔嘅同班同學，好彩佢兩個本身唔同組唔算熟，唔係實玩到癲晒都似﹗

入到課室有三個老師，一個老師對兩個小朋友，一組組咁坐喺到玩玩具，燒腩仔眼前個係形狀手抓板，老師問緊另一個小朋友嘢時，燒腩仔就努力玩手抓板，玩完艾菲就細細聲考吓佢形狀同顏色，等咗陣終於到燒腩仔，老師講早晨有畀返應（其實坐低時已經主動同老師講咗早晨），之後老師畀咗籃lego佢砌，佢砌吓砌吓居然好勁咁砌咗隻船出來，玩完老師叫佢拆開收埋都有跟住做，老師循例都問吓艾菲點解會揀全日制學校，艾菲答完之後唔知佢係唔係聽到艾菲係FTM啦，所以無再問第二個問題（艾菲聽到佢問另一個家長時，問完點解揀全日制就問點解揀聖三一㗎）。

K1求學大作戰 ~ Day 5 (Part 2)

29/11/2014

第十二回合：香港基督教服務處觀塘幼兒學校 11:40

呢間學校艾菲覺得可以用觀塘區神校來形容，區內極受歡迎兼口碑超好，個個家長都對學校有讚無彈，仲要係同燒腩仔返開嘅幼潛同一個辦學機構就更加有信心，本來上年都想同燒腩仔報N，但佢哋唔收細仔艾菲唯有今年報K，明知今年報K機會極微（1000個小朋友爭17個位﹗），再加上佢係全日制學校，都諗過放棄唔好浪費時間，但諗到讀唔讀到唔係由艾菲決定，而係睇燒腩仔自己嘅表現，所以決定報咗先算等個天決定。

唔知燒腩仔同呢間學校係唔係無咩緣呢？之前返Pario上幼潛時連續兩星期想上去交報名表（學校喺正Pario樓上），學校都裝修無人收表，到第三次終於有老師收表，燒腩仔就十問九唔應，只係肯揮手bye bye，到呢日interview難得無撞時間去到，以為佢會越戰越勇，點知佢狀態明顯超差，從佢嘅表現來睇，艾菲甚至懷疑佢唔鐘意呢間學校添﹗

離開基督教中心幼稚園之後，見有時間艾菲同米高又肚餓，就決定行返去九龍城食個早餐先再坐車去觀塘，睇燒腩仔嘅表現明顯feel到佢開始無電，艾菲有天真地諗過佢呢個時間可以抖一陣就好，但事實係佢點會肯瞓吖，我哋唯有早D去學校搏吓有無得早D in仲好。

為咗幫燒腩仔打氣，艾菲上學校前專登帶佢去返之前上幼潛個課室，話佢知佢至愛嘅幼潛老師上緊堂，只要去學校玩完就可以落來探幼潛老師，咁佢去到學校初時都叫做合作，艾菲填問券（明明之前交表時填咗，D問題都一模一樣），佢就同米高喺側邊玩積木，艾菲搞掂就帶咗佢去隔離玩車仔，點知又玩到唔願走，艾菲出盡法寶氹佢過對面玩滑梯都唔成功，好彩老師叫名時佢又OK肯去排隊喎。

之前米高聽完簡介會返來都有大約講過個流程，interview會分3 part，第一部分係考大肌肉，五個小朋友一齊入個班房玩，有隧道平衡木拋波波之類嘅玩意任玩，起初燒腩仔都表現正常，不停走來走去玩，後來玩拋波波玩到超high，咁拋晒D波艾菲就叫佢幫手執啦，點知hyper狀態嘅佢每執一個返來就大叫一聲先放返落籃，第一聲艾菲已經勸停佢，如是者執到第三個都係咁叫，艾菲唯有即刻捉佢玩其他嘢，唉...

完成第一部分就進入第二部分考小肌肉，老師帶咗我哋去另一個課室進行group in，小朋友圍枱坐前面，家長就坐後面，燒腩仔又揀咗側邊位來坐（佢之前in另一間學校都係揀同一個位，呢排艾菲諗吓諗吓先醒起，可能同佢喺學校都係坐側邊位有關），坐好後老師逐一同小朋友打招呼問咩名，燒腩仔好爽快就答咗，之後老師就拎咗各式各樣嘅玩具出來畀小朋友玩，但每次都係得三份，其他無玩具嘅小朋友就要坐定定等。

K1求學大作戰 ~ Day 5 (Part 1)

29/11/2014

第十回合：聖公會聖三一堂曾肇添幼稚園 8:45

呢間係考慮咗好耐先決定報嘅學校，因為報呢間前已經報咗11間學校，當時已經畀米高話緊艾菲怪獸，但半日有學券仲要一條龍加Happy School實在好吸引，再加上我哋屋企樓上原來有個哥哥仔讀緊，即學校真係睇小朋友表現，而唔係睇學生家庭背景來收生啦，經米高同意後艾菲就喺截止報名當日朝早去交表，以為咁遲交表實係安排下午先見啦，點知畀咗最早個time slot我哋，等我哋可以一朝早趕三場。

呢晚燒腩仔算瞓得OK，不過七點我哋未叫佢已經自己醒咗，食完早餐換好衫我哋就出發，有人猛話停唔到車又話咁近怕畀的士司機鬧，結果我哋一家三口坐巴士去，上車十分鐘已經落車堅係近，落車穿過公園已經到學校，八點半到但未入得要排隊，燒腩仔有D企唔定，要我哋輪流帶佢行吓，當佢發現禮堂入面有個超邪惡嘅滑梯同彈床之後，就勁開心咁返埋去排隊（因為艾菲話要乖老師先畀玩），等咗十分鐘左右終於開始登記。

好彩我哋係第一批見，登記完已經可以直接去課室門口排隊，否則畀燒腩仔扭玩滑梯就大件事﹗去到課室門口，我哋都未貼好label老師就話入得（我哋係同組最後一個登記），interview只可以一個家長陪，咁呢D重任梗係又係艾菲做啦，一組六個小朋友對三個老師，全程只係小朋友玩唔使問家長嘢。

26個月

Hi! 媽媽又唔記得咗上星期日係我26個月大嘅日子啦﹗佢話呢排只記得我幾時interview同D學校幾時放榜，記得爸爸呢排公司peak season好忙成日weekend唔得閒搞到佢都無得抖，記得自己就來生日同聖誕要安排定D活動畀我玩喎...真係無心肝㗎佢...



其實過咗兩歲之後，媽媽話我已經變成小朋友，都無咩特別大嘅轉變啦，呢個月嘅飲食狀況都係差唔多，只係揀飲擇食嘅情況好咗DD，終於肯食返菜（只限菜框唔食葉，可能因為出緊四隻犬齒牙痕，食菜框可以止吓痕掛），終於無再食到咁誓願（但到尾都係要催同餵），終於肯踏出第一步試食糖（艾菲：其實邊有阿媽要逼個仔食糖咁騎㗎？）。



瞓覺就比上個月好返D，不過因為返學後長期咳同流鼻水，所以多咗半夜咳醒大叫，但好快又會瞓返，通常十點幾入房搞到十一點先瞓，瞓到第二朝九點半起身，但好多時七點幾就跟爸爸醒，要媽媽過來陪我一齊瞓先肯瞓多陣， 又忽然要返媽媽陪瞓服務，仲會指定媽媽瞓邊個位，至於晏覺就每日放學返屋企先瞓，瞓一個鐘左右媽媽就會開歌叫我起身，例必扭一輪先出房食飯（所以要落街食飯一定要提早叫佢起身）。

K1求學大作戰 ~ Day 4

22/11/2014

第八回合：香港創價幼稚園 9:00

呢間係艾菲第二心儀嘅學校，皆因艾菲未生燒腩仔前，已經喺前上司嘅口中認識到呢間學校，佢嘅一對孖仔喺到讀得好開心，唔多功課唔多節日慶祝扮嘢活動（簡單D講係唔會難為家長），課程有別於傳統名校，唔一定要小朋友坐定定先叫乖，再加上教育局評核報告都對學校有讚無彈，所以明知呢間學校有好多人報（好似話上年都五千幾個application，今年龍B就更加唔止呢個數啦），艾菲都要試一試睇吓會唔會咁好彩入到。

唔知係唔係艾菲早報名呢，我哋獲安排第一日第一個time slot in，可惜呢日燒腩仔因為咳而成晚瞓吓醒吓，而艾菲就為咗準備呢日interview而搞到好夜先瞓（因為明知呢間會問家長，亦比較著重家長嘅諗法，所以有D壓力啦），所以呢朝我哋成家都明顯呆滯mode。

坐的士去到見學校仲未開門，唯有去對面公園玩陣畀佢warm up吓，學校準時8:45畀小朋友入，因為我哋趕住有下場interview，就拿拿聲排隊入學校，上到二樓課室未九點已經見緊第一個，我哋排第三個要坐出面等陣，期間坐唔定嘅燒腩仔睇完地下D跳飛機公仔，又走去撩靚女miss傾偈，艾菲都真係不得不讚吓呢間學校嘅校長同老師，全部都好靚女同nice，睇到我哋一家好賞心悅目呢﹗kakaka...

K1求學大作戰 ~ Day 3 (Part 2)

15/11/2014 

第七回合：香港培道小學幼稚園 16:00

呢間學校係艾菲最心儀嘅一間學校，除咗因為係一條龍100%直升小學之外，最重要係艾菲好buy校長嘅教育理念，無論係報名須知後面，還是簡介會時，佢都一再提醒家長唔好將面試睇得咁重，唔需要特別催谷小朋友，最緊要係開開心心咁當玩，畀小朋友做返一個小朋友，當係一個親子活動咁見完就算，所以艾菲每次in完都會讚燒腩仔，仲會請佢食嘢等佢開心吓，畢竟每個星期六同爸爸媽媽四圍去interview實在唔係佢哋想要嘅嘢，只係宜家嘅教育制度逼到父母唔咁做唔得。

離開九龍城浸信會幼稚園之後，我哋就拿拿聲趕返屋企，食個快飯就捉咗燒腩仔上床瞓晏覺，一瞓就瞓咗兩個鐘，明顯瞓醒之後精神咗好多，同佢慢慢食埋下午茶先出發，由於時間實在太鬆動，我哋決定坐巴士去順便等燒腩仔個腦清醒吓，上車唔使十五分鐘就到，原本連埋行入去嘅時間應該都係五分鐘左右，點知有個爸爸就唔信艾菲識路（明明艾菲之前去過學校聽簡介會），跟前面對家長行錯咗路入咗邨，終於用多十分鐘先到，去到學校已經係15:55。

都唔知咁樣行轉大運係好彩定唔好彩，入到學校當然係人山人海啦，門口嘅staff畀咗張程序表我哋就話可以喺playground到玩陣，不過playground嘅玩具實在太惡毒，滑梯，蟲蟲隧道，車同韆鞦，全部都係燒腩仔嘅至愛，放佢去玩肯定會好失控，但唔畀佢玩佢又實唔肯喪扭，所以最終都畀佢埋去玩陣滑梯，玩咗五分鐘已經宣布排隊入禮堂，但當時仲未輪到佢sir，艾菲上前勸佢走，唔甘心嘅佢即刻衝咗去爬隧道，講咗幾次玩多一次要走都唔理，無計可施下唯有活捉佢去排隊（米高當時已經幫手排緊），再用山渣餅馴服佢（如果已經玩緊車或者玩耐D肯定唔會咁順攤），期間佢不停指住話要玩車同玩韆鞦，艾菲唯有出口術話「你一陣問吓老師畀唔畀你玩先，佢話畀我哋就見完老師再出來玩，但佢話你唔乖唔畀玩就無得玩啦」。

K1求學大作戰 ~ Day 3 (Part 1)

15/11/2014

第四回合：藍田靈糧幼稚園 8:30

呢個星期六有四間學校in，難得四間都無撞期（其實更難得係我哋報13間，13間都無撞時間去得晒），當然都盡量出席啦，不過唔撞時間嘅代價，就係要晨早起身出發，對於平日瞓到9:30先起身嘅燒腩仔來講，都真係有D難度㗎﹗

為咗唔好令燒腩仔咁辛苦，艾菲都有諗過放棄唔in，因為呢間本身有N直升，K1唔係得返好多位放出來，而且位置唔太就腳，我哋屋企只得一架等好耐嘅巴士到，畀佢咁好彩入到可能要考慮坐校車先掂（但艾菲個心一直想親自接送），不過佢個音樂教學又確係好吸引（之前都提過燒腩仔對音樂好敏感，一播歌發緊脾氣都會自動收火），最終米高支持見咗先算。

我哋坐的士過去， 八點左右已經到學校門口，見無人排隊唔想燒腩仔呆企，就去咗對面公園仔玩陣，然後學校門口喺8:15開始出現人龍，準時8:30放行，先喺大堂排隊登記，再跟老師入一間課室玩玩具同拎label，燒腩仔初時表現呆滯，叫早晨叫到蚊滋咁嘅聲，跟住到老師話收玩具排隊去另一間房時，佢突然發難大大聲話「唔收」（好彩呢part應該唔計分同無老師見到），繼而扭抱唔行，其實艾菲都畀佢呢一吓嚇親，米高即刻提艾菲出絕招山渣餅，艾菲拿拿聲收好佢份玩具，再拎半塊山渣餅出來賄賂佢，佢先乖乖自己排隊行去第二個課室。

試用：Redwin維特護「適保梨」潤膚乳

每逢踏入夏天轉秋天嘅季節，艾菲就會出現皮膚痕養同甩皮嘅情況，有時會嚴重到皮膚敏感塊面忽然紅咗一大撻，而生完燒腩仔之後隻手長年出現疑似濕疹嘅情況，所以一枝保濕夠潤嘅潤膚乳真係好重要，咁啱最近收到MyBB邀請試用Redwin維特護「適保梨」潤膚乳，Good﹗



Redwin維特護係澳洲銷量第一嘅適保梨(Sorbolene)護膚產品，適保梨配方經由澳洲皮膚科專家研配，性質溫和，獲澳洲皮膚科專家認可，適合嬰兒至成人每日使用，特別針對嚴重乾燥痕癢，濕疹同敏感性皮膚（尿疹，主婦手，牛皮癬），深入肌膚底層鎖水保濕，提升肌膚水油平衡，時刻滋潤修護，pH值平衡，無人造香料/無鹼性，不含羊毛脂成份。



潤膚乳適合全身用，就等艾菲搽少少落手到試吓，好容易推開而且都確係幾潤同快吸收，可以紓緩乾燥、繃緊嘅感覺，最重要係無味同好乾爽唔會立黐黐，唔使怕搽完之後會出現冼手開唔到樽蓋，或者拖唔實燒腩仔之類嘅情況。

K1求學大作戰 ~ Day 2

8/11/2014

第三回合：觀塘浸信會幼稚園 11:30

呢間學校係上年同燒腩仔上游水班時同學仔媽咪推介，話佢學校好大設備齊，用咗學券之後唔使交學費好抵，之後艾菲上baby kingdom睇吓comment，發現佢原來係區內「名幼」，咁今年嘅open day就專登帶燒腩仔去玩順便拎表，點知...人多樣樣嘢都要排隊等好耐係艾菲意料中事，但玩遊戲期間忽然傳教（艾菲唔係唔鐘意佢嘅教會背景，只係覺得唔需要呢D時候咁aggressive地呃人入班房傳教，小朋友入咗來讀有三年時間你想點傳都得啦），加上老師處理燒腩仔唔敢玩遊戲嘅手法，都令艾菲對呢間學校扣咗唔少分，而佢K3只得下午班呢個安排亦令艾菲卻步，不過既然都交咗表又無撞時間就即管來玩吓啦﹗

呢日只係得一場interview，仲要係11:30，兼夾唔係艾菲心水學校，所以真係零壓力，燒腩仔起身食完早餐就換衫出發，坐小巴20分鐘內都到算係方便，不過燒腩仔去到學校門口又話唔入，後尾艾菲將封面試信交畀佢，叫佢幫手拎入去畀老師，佢又OK肯自己行入去喎，之後我哋獲分配到一個籌號，老師叫我哋喺側邊嘅玩具區玩住等。

入到玩具區，絕對可以用人山人海來形容，來面試嘅真係咩人都有，有D講普通話，有D牛高馬大個樣睇落唔止3歲，入面分區放咗唔同種類嘅玩具，燒腩仔梗係去車區啦，但明顯D車係唔夠分，要鬥快拎先會有得玩，否則就只係可以企喺到望人哋玩（唔記得講呢到係無凳坐只可以企㗎），老師每隔一段時間就會出來打招呼同叫number，不過現場實在太嘈都唔係好聽到，總之等咗十五分鐘左右終於到我哋。

K1求學大作戰 ~ Day 1

1/11/2014

由於燒腩仔間學校一直都話無得直升（實情係唔夠位直升），就算直升都一定要轉全日，兼夾艾菲覺得呢間學校好一般，所以今年報K1艾菲要特別認真...根據上一年報N嘅情況，細B報四間得三間有得interview，最終兩間waiting一間PM offer，再加上燒腩仔九月去學校交報名表時間間學校都唔肯入，老師職員撩佢講嘢又十問九唔應，艾菲對佢真係無乜信心，最終好怪獸咁同佢報咗13間學校（一講個總數出來即刻畀米高話囉...），有自己區內嘅學校亦有相對就腳嘅九龍城區學校，絕大部分都係半日班，只有兩間係全日，全部都係有學券同happy school，唔特別催谷燒腩仔係艾菲同米高嘅原則，要做讀書機器真係唔怕將來無機會，何苦咁細個就逼佢令佢失去快樂童年呢...

第一回合：觀塘循道幼稚園 9:30

上年搵幼稚園資料時，呢間學校已經on list係艾菲要報嘅學校之一，因為佢同米高母校藍田循道衛理小學有聯繫，雖然無得直升但大抽奬出意外的話，校長嘅推薦信相信都會有用，而且之前去佢哋open day參觀過，學校環境唔錯燒腩仔都like，交表時亦覺得D老師同staff好有愛心，重點係屋企樓下有小巴直達，唔使十分鐘已經到學校門口，仲快過行去燒腩仔宜家讀緊間學校﹗

呢日一早叫醒燒腩仔食早餐換衫，但大少明顯有D鬧情緒死都唔肯著新買嘅裇衫，好彩艾菲熨定件舊裇衫做後備，換好衫就帶佢坐小巴出發，去到學校門口要排一陣隊先入得，見佢排隊期間都有D失控，入到學校門口仲開始扭唔肯入去，要艾菲出盡法寶先氹到佢行入去，見佢咁嘅狀況艾菲都估係兇多吉少㗎啦﹗

點知佢入到學校見到學校D靚靚嘅擺設即刻好興奮，之後仲好乖咁跟其餘五個family一齊排隊入課室，入到課室係六個小朋友平排坐，小朋友坐前面父母坐後面，一個老師負責in兩個小朋友，每個小朋友面前都有一份玩具，燒腩仔份係佢好鐘意嘅積木，老師先問另一個小朋友問題，但小朋友唔多識答，搞到燒腩仔等咗好耐，起初艾菲都驚佢等得耐會出事，好彩佢又OK喎，仲玩玩吓識得回頭望吓我哋笑。

放電＠西貢

十一月係燒腩仔嘅interview月，由第一個星期六開始in到十二月初先完，不過艾菲其實無同燒腩仔操過，in完又唔會怪佢答得唔夠好之類，所以佢除咗要早起身之外，應該真係當玩無咩壓力，唯一可惜係密集式嘅interview搞到佢少咗去玩去放電嘅時間，所以每個星期日我哋都盡可能帶佢出吓去，而前一個星期日我哋就去咗西貢。



去西貢無咩特別原因，純粹艾菲話想帶燒腩仔去公園放電，米高又忽然好掛住D fish & chips就去，艾菲仲求其到相機無帶，連吹泡泡都唔醒起帶（屋企都唔知已經收埋咗幾多枝用到一半嘅泡泡），落車之後我哋先行海邊，順便喺D檔攤到買咗枝只賣$10嘅吹泡泡（出面D街鋪好似要十幾蚊枝），燒腩仔仲好搞笑咁當佢係士的篤住地下行，笑死艾菲...



由於燒腩仔已經大個仔，坐底褲韆鞦明顯有D逼同上落唔方便，所以我哋轉咗去海邊個公園玩正常韆鞦， 呢邊自然比底褲韆鞦嗰邊多人啦，好彩有枝泡泡可以同佢消磨吓時間，艾菲同燒腩仔喺側邊玩吹泡泡，慈父米高就去排隊等玩。

Trouble 2事件簿~返學情緒

之前都提過，燒腩仔自從返學之後，D情緒變得好差，除咗返學同放學返屋企途中唔合作之外，返到屋企都經常鬧情緒，日日喺屋企進行不合作運動，有咩唔滿意就爆喊喪叫唔停來疲勞轟炸艾菲，搞到艾菲成個月都好stress，喊都唔知喊咗幾多次，甚至畀咗個限期自己，如果佢到年底都無明顯改善就退學唔讀，不過「否極泰來」原來係真，當全家人嘅情緒都跌到落谷底之後，燒腩仔終於開始回復正常﹗﹗﹗



燒腩仔喺情感發展方面係好敏感，性格慢熱需要D時間先接受到新事物，所以開學前一個月艾菲已經不停同佢洗腦，話佢知生日後要去新學校返學，學校有好多玩具同小朋友，不過一提入學校前要bye bye媽媽，佢把口雖然話OK做得到，但就成個月都表現不安，無論去邊都叫住媽媽，出街一定要媽媽拖，瞓教要媽媽陪，去到婆婆到沖涼都要媽媽沖（之前次次都係婆婆沖），艾菲放低佢喺婆婆到落一落街會嘈，之後就一直叫住媽媽或通屋走搵艾菲，仲突然唔畀艾菲抱表妹。

正式返學之後佢都係勁黐艾菲，甚至出街時指明要艾菲抱，連米高埋來幫手都畀佢一掌推開，多咗夜晚瞓唔好嘅情況，聽過佢發開口夢都叫住媽媽，仲試過有晚半夜醒咗大叫媽媽，到艾菲過到佢房就話「要媽媽喺到瞓」（調轉米高係連床都唔畀上），唔知係唔係瞓得唔好啦，個人開始變得好忟，經常扭扭擰擰唔合作，我哋叫佢咩都話唔好唔要唔做，係確確切切嘅不合作運動。

唔好以為佢呢個不合作運動係放學返來扭眼瞓先有，實情係由佢朝早起身食完早餐就已經開始，初時就話唔換片，之後就話唔刷牙唔洗面，再來就話唔去VV，然後話唔執玩具，到夠鐘開飯就話唔食飯唔食呢樣唔食嗰樣咁，千辛萬苦的咗佢返學，到接佢放學第一句就話唔換鞋，再講就直情話唔返屋企，試過有次氹佢行帶佢去麵包鋪買蛋糕，佢居然拎住個砵仔糕大叫唔排隊唔畀錢，繼而坐咗喺麵包鋪地下摞地，激到艾菲即刻放低所有嘢好似抬犯咁抬佢返屋企﹗

生日會用品＠淘寶

之前篇《Stokke Tripp Trapp》似乎放毒成功，引到大家心癢癢咁，艾菲決定呢篇繼續放毒，講吓燒腩仔生日前嘅一批淘寶，kakaka...



上年搞完生日會之後，艾菲誓神劈願咁話今年要訂一批有特色D嘅餐具同佈置㗎，點知...隨住燒腩仔越來越大，瞓晏覺嘅時間越來越少，連帶艾菲淘寶嘅時間都越來越少，結果拖到九月中先得閒淘，為免訂造期間出意外又唔夠時間改，最穩陣方法都係揀返現貨，唯一堅持係揀D相對少人用嘅款，最後揀咗呢個白底彩色星星嘅款，襯咩色布置都可以。



買完餐具再喺同一間鋪頭買埋生日蠟燭，紅色2字只係兩蚊人仔一個，黃色大D嘅2字都係5.5人仔一個，最抵係套車車蠟燭，成套只賣5.5人仔，香港就咁一個2字都至少要十幾蚊啦，之後貪得意再用7.5人仔買個Happy Birthday太陽眼鏡，諗住燒腩仔唔帶艾菲可以帶來玩嘛，呢到連埋上面嘅餐具同佈置嘅汽球都不過係100人仔咋﹗抵﹗

Stokke Tripp Trapp

未係好有mood講燒腩仔去in K1嘅情況住，不如就繼續回顧返之前一個月嘅嘢先，今次不如就講吓艾菲敗high chair呢件事啦﹗

話說燒腩仔未出世時，艾菲就買定張Aprica High Chair畀佢用，貪佢細時可以當床仔咁畀佢瞓廳，方便陪月姐姐照顧，到大個又可以用來食飯，培養佢坐定定食飯嘅好習慣，張high chair用咗兩年，除咗條安全帶拆唔到出來洗有D唔方便之外，其餘嘢艾菲都好滿意，不過隨住燒腩仔兩歲唔再食BB飯，可以同我哋一齊食大人餐，就開始覺得埋枱個位硬係唔多啱咁，推佢埋到枱都就唔啱個位食飯，而且每次都要將張high chair推來推去好麻煩，搞到燒腩仔兩歲前一直同我哋分枱食飯好無癮，於是艾菲就喺燒腩仔生日前鼓起勇氣，同米高講想買過張新high chair畀燒腩仔埋枱食飯，難得米高又無反對好支持喎，嘻嘻...

既然米高肯全力支持，艾菲當然都認真去研究啦，起初只係諗住cheap cheap地買呢張Ikea出品㗎咋，$400靚靚仔仔咁仲要係艾菲至愛嘅綠色，點知米高又嫌佢收唔埋同大個用唔返好浪費，咁艾菲唯有上偉大嘅淘寶搵啦，搵到同Stokke張Tripp Trapp差唔多款嘅價錢都唔係平，有平D摺得埋嘅米高又怕唔知穩唔穩陣，咁最後當然係唔淘啦﹗

其實慈父米高嫌三嫌四，皆因艾菲帶佢同燒腩仔去mother care睇過Stokke張Tripp Trapp，再加上佢嘅兄弟屋企都有一張兼大讚張凳好用，所以有人就一早心有所屬想買呢張，咁問心艾菲都好鐘意呢張high chair，但價錢真係好「實惠」囉，未計其他配件單買張凳已經要二千二百幾，艾菲又唔係好捨得，於是就決定上網再search。

智樂遊戲萬歲日2014

11月2日係米高生日嘅大日子，但撞啱今年智樂遊戲萬歲日喺呢日搞，見到佢facebook post出來D遊戲真係好好好好吸引，向來怕人多嘅艾菲都忍唔住問米高肯唔肯生日都出去陪燒腩仔玩，難得慈父一口答應，YEAH！



本來艾菲一心一早起身，同燒腩仔做完功課就即刻出發（題外話，其實N班點解個個星期都有功課㗎呢???仲要絕大部分都係要艾菲做...），爭取做第一批小朋友入場玩，點知...拖拖拉拉咁終於都搞到三點幾四點先到西九海濱長廊，得返個幾鐘時間玩，仲要撞正燒腩仔開始眼瞓無電，原先佢去到都有D鬧情緒，見到人多同嘈就乜都發晦氣話唔玩，好彩又有上次喺寶康公園玩過嘅敲敲打打玩意，成功令佢回心轉意仲越打越high添﹗



見燒腩仔OK就諗住拉佢玩吓新嘢學砌水管，點知唔夠D大哥哥爭，呢頭拎到一條，轉頭畀人拎走咗另一條，都係敲返D油桶算啦﹗

粟米收成時

六月時寫嘅《小小農夫》提過我哋住嘅屋苑有種植計劃，我哋種咗一棵粟米，起初喺艾菲呢個種植邪神嘅照料下，種到佢只係得返半塊葉，後來我哋改由米高負責淋水施肥，粟米BB居然奇蹟地生存到，仲一直健健康康咁快高長大，到八月初已經生得高過燒腩仔，月尾時仲卒之生咗條粟米出來﹗



可惜九月中一個颱風海鷗，粟米BB畀風吹到彎晒，米高第二晚一個人落去淋水時，聽完其他一齊種粟米嘅街坊意見，就決定提早將未完全成熟嘅粟米BB收割落來，拿拿聲上樓拉埋燒腩仔同艾菲落去進行收割儀式，起初燒腩仔見到米高用力扯粟米BB落來都有D驚，似係擔心爸爸傷害佢棵粟米BB咁嘅樣，後尾艾菲同佢解釋完就好開心，雙手捧住粟米BB跑返屋企，仲情不自禁咁一口咬落去以為可以即刻食添﹗



艾菲解釋佢知粟米係唔可以連葉食，再喺佢面前拆開D粟米葉，不過艾菲都係今次種完粟米先知，D粟米原來係一粒一粒咁生出來，由於我哋棵粟米BB未成熟，就只係得極少粟米粒。

電車媽媽

之前寫遊記時都提過，艾菲係有D電車迷嘅傾向，唔知點解好鐘意日本D火車，去親日本旅行都會影D火車相，甚至想當年仲有時間打機時，唔怕悶專登買隻電車Go嘅game來打，到燒腩仔宜家大個鐘意車，艾菲當然都不忘涂毒吓佢，出街成日叫佢睇火車地鐵，終於令佢越來越有電車媽媽之風，坐親火車都會好開心。



燒腩仔生日時，艾菲專登叫姨媽送套東鐵Plarail畀佢做禮物，等我哋兩母子都有得一齊玩，之後朋友見燒腩仔咁鐘意火車，又買多咗兩架Plarail火車送畀佢，咁艾菲見朋友咁有心送大禮，忍唔到手又敗多套路軌套裝來襯返兩架日本火車，唔...原來Plarail毒同Tomica毒一樣咁毒，開始咗第一架Plarail，你自自然然就會買第二架第三架同無限條路軌...



不過當你睇見個製成品，見到燒腩仔自己揀嘅山手線鬆弛熊紀念版，路過呢個艾菲新買嘅踏切裝置，成個setting實在太有風味啦﹗（唔好意思，電車媽媽自我感覺良好中:P）

兩歲生日相

一直都諗住燒腩仔兩歲時要同佢影返幾張相留念，本身想喺佢生日前影定，點知淘寶物流唔生性，搞到開生日會前幾日先收到貨，到生日會之後又忙住搞佢開學D嘢無時間影，生日後就更加要應付佢D返學情緒影唔到，之後仲全家病咗成星期添，推吓一日推吓又一日，終於拖到十月最後一個星期日先影到，再拖吓拖吓終於拖到宜家，生日都過咗成個月先畀大家睇，好...唔講咁多，去相先...



燒腩仔：兄弟們，我兩歲啦﹗一齊開party慶祝吖﹗



燒腩仔：YEAH!



燒腩仔：等我敲鑼敲鼓公告天下先﹗

秋遊山頂

雖然燒腩仔返學之後嘅情緒好難搞，不過平日要返學已經少咗帶佢出去玩，所以難得weekend米高一齊放假，艾菲梗係要爭取機會一家人四圍去，而上個月中嘅某個星期日，我哋就襯呢排佔中少咗自由行，帶咗燒腩仔去山頂玩。



其實燒腩仔喺艾菲肚入面時已經來過山頂一次，不過因為山頂之前畀自由人攻陷咗，所以我哋一直唔敢帶佢來，難得新聞話宜家少咗大陸團來香港，我哋就算明知星期日實多人都無畏無懼咁衝上來，果然係比上次來靜同好行好多，Good！



落車同燒腩仔喺山頂廣場出面影吓相之後，我哋就出發圍山頂行一圈，原先呢個小朋友未瞓晏覺，就快無電唔多願行㗎，不過我哋畀吓麵包同橙汁引佢都肯行一大半路，呢日天氣真係好好，望返落維港兩岸靚到呢...

25個月

 

原來我上星期五已經25個月大啦，但無心肝嘅媽媽完全無咗件事咁，佢話日日都畀我搞到佢好忙好亂所以唔記得咗喎，咁都得？咁媽媽你會唔會有一日唔記得咗來湊我放學㗎？我會喊㗎喎﹗（艾菲：真係唔係講笑，你日日放學都咁扭計，我幾乎每日都有唔去湊放學嘅衝動囉:P）

呢個月嘅飲食狀況有好大嘅變化呀，都係一日食足四餐，不過媽媽就無再煮BB餐畀我，而係畀我埋枱同佢哋一齊食大人飯，雖然大人餐好好味，但我宜家越來越唔鐘意食正餐，餐餐都食到誓願咁，有時會食晒D餸唔食飯，仲會按心情來揀飲擇食（trouble 2不合作運動嘅一部分來，即除咗例必唔食嘅菜之外，就連南瓜，蘿蔔同水餃都會忽然話唔食，但明明之前一日都仲好鐘意食㗎喎），每次都搞到媽媽好勞氣，宜家直情要扣起D餸，要我食兩啖飯先畀一樣餸。

四隻犬齒終於有生出來嘅跡像，但咬嘢依然唔叻，D肉要咬好耐先咬得爛，繼續唔食軟糖會lur，但其他零食都可以食唔停口，至愛食水果同蛋糕雪糕，一見到佢哋就會發晒狂咁話要食，另一最叻食嘅係藥水，次次都食到嗒嗒聲，中藥都吞到但要有山渣餅送先得。

N班開學回顧~Week 4

唔覺唔覺已經返咗成個月學，而呢篇亦會係最後一篇開學回顧，事關燒腩仔嘅返學狀態開始無咩大變化，keep住都係返學時叫住「我唔返學」，但返到學校又好快無事，間中放學時見到同學仔走先會喊，但見到艾菲就會即刻笑返，不過下一刻就開始扭計發脾氣，大叫「唔返屋企」兼唔肯換鞋，再要艾菲出盡法寶先成功帶到佢返屋企，甚至返到屋企即喪扭喪喊嘈足成晚，搞到艾菲十級頭痛兼無奈。

Day 16 29/10/2014

呢日keep住都係扭計mode，由朝早起身就事事不滿咩都扭一餐，仲要唔停手咁周身R（呢個係由細到大嘅壞習慣來，一眼瞓同個人忟就會周圍R），結果繼手跤位，頸，小腿同心口都紅同損晒後，連額頭同眼嘅四周都開始出D一粒粒嘅紅點，搞到返學時畀老師問係唔係出疹，艾菲只好同老師解釋紅點點來，只要佢心情平伏落來就會退，唔會惹到其他小朋友。



之後去接放學，吸收咗之前嘅經驗，同米高商量過後，決定唔再帶任何嘢食畀佢，廢事畀佢剩機扭計，只係同佢講快D返屋企有咩好嘢食，但佢似乎都唔係好受，依舊去到天橋中間就唔行扭抱，同佢彊持咗成十五分鐘，無論艾菲點氹佢都唔肯行仲開始喊唔停，直至有輪椅坐專用電梯落來，佢聽到D alarm聲先忽然清醒，終於肯跟艾菲行埋最後一層樓梯，不過之後都係邊行邊喊住咁大叫自己嘅訴求，一時話自己要食麵包，一時話要媽媽攬，一時就話自己要瞓覺，最絕係返到屋企連艾菲換件衫，都會畀佢話「唔要媽媽換衫」，唉...

Day 17 30/10/2014

又係一早起身已經喪扭唔停，誇張到艾菲不過話幫佢抹咗D鼻水（D鼻水由Week 3開始起，到宜家都仲未停過），都發晒脾氣咁嘈成半個鐘先肯收聲，再加上額頭D紅點持續唔散（佢keep住忟其實都好難退），艾菲已經決定等燒腩仔星期五放學後帶佢去去婆婆屋企附近睇中醫。

繼續返到學校門口就話「我唔返學」，不情不願咁嘅樣入學校但無喊，到接放學時艾菲忽然心血來潮袋定架玩具的士喺袋， 到佢去到天橋底開始想扭唔行時，艾菲就拎出來叫佢帶的士上天橋，估唔到呢招都幾work喎，拎住的士乖乖上晒全部樓梯，之後仲有時間奬佢去超市坐一陣車仔添﹗

Day 18 31/10/2014



之前一日瞓醒晏覺後燒腩仔隻眼忽然腫咗，本來都有諗過要唔要同佢去睇急症，但觀察咗幾個鐘之後見D腫已經開始退，估佢應該係轉天氣敏感，再加上瞓覺時發夢喊過，同起身前狂捽眼所至，所以決定呢日請病假提早返去婆婆到睇中醫，不過呢日星期五派功課，我哋出發前要先返學校拎功課袋，明明去到學校附近都仲叫住「我唔返學」㗎，不過艾菲拎功課時喺學校門口同校長傾多幾句，燒腩仔就忽然擰轉身同艾菲講bye bye，之後仲唔願跟艾菲走添，well...其實佢都唔係唔鐘意返學吖﹗

N班開學回顧～week 3

大家睇完week 2嘅戰況之後，大概都想像到燒腩仔返學後嘅情緒有幾唔穩定，其實艾菲已經無寫佢返到屋企之後嘅不合作運動，否則肯定肯定肯定係更加嚇人，不過呢個都係等遲D group埋落《trouble 2事件簿》到一次過寫，宜家繼續集中回顧佢返學嘅情況先﹗
  
Day 11 22/10/2014

經過之前一日嘅惡劣戰況，艾菲呢朝直情誇張到唔想燒腩仔瞓醒起身，不過事實又點會有呢個可能吖，好彩呢個世界都仲有奇蹟發生，之前一晚飲咗七星茶後，燒腩仔呢日終於可以一覺瞓天光，瞓醒之後心情明顯唔差，雖然都有扭扭擰擰唔多合作，但氹吓氹吓咁都順利食飯換校服出門口，返到學校門口都仲有喊，但入到去坐低換鞋已經收聲。

到放學艾菲去接佢時，仲玩玩具玩到唔知艾菲已經來咗，之後換鞋離開學校都算順利，係去到天橋底又開始扭抱唔行，上咗一半樓梯之後企咗喺到同艾菲拉扯，好彩同學仔同媽咪喺另一邊上天橋時見到佢唔肯行，專登過來鼓勵佢幾句叫佢繼續行，結果佢又好開心咁追住同學仔行，唉...明明自己行到但硬要扭艾菲抱，艾菲講一百句都唔夠人哋講一句咁有效，連同學仔媽咪都話佢係明蝦艾菲，但既然佢都係自己行返屋企就算啦﹗

Day 12 23/10/2014

見佢之前一日飲完七星茶有效，就決定畀佢飲多一次，呢晚都係順利咁一覺瞓天光，朝早起身尚算合作，只係食飯時同佢開咗場大戰，最終都係狠心由佢餓，由佢食半碗薯蓉都無就去返學，呢日去到學校門口都想喊想喊咁，但同學仔媽咪鼓勵咗佢幾句之後就無喊到，好平靜咁跟老師入咗學校。



由於之前一星期實在畀燒腩仔搞到好stress，所以的起心肝決定要畀自己鬆一鬆，湊咗燒腩仔返學之後就一個人去咗又一城食tea行街，咁啱見到pageone減價就買咗本tomica磁石貼遊戲書畀燒腩仔大個D玩，唔...唔係話要放自己幾個鐘假㗎咩？點解最終都係買嘢畀個仔？

之後準時去學校接佢放學，仲預先準備咗盒維他奶仔喺身，諗住必要時用來鼓勵佢行上天橋，而今次艾菲都專登等到出咗學校門口先畀佢，但佢都係顧住飲唔多肯行，結果未到天橋位已經畀佢飲晒，好彩佢啜住個已經飲完嘅維他奶盒都叫做勉強肯行（行得勁慢），如果唔係艾菲就真係偷雞唔到蝕渣米啦﹗

Day 13 24/10/2014

一早起身同返學都算順利，把口雖然仲提住話唔返學，但去到學校門口都無喊，好乖咁跟老師入學校，見到佢情緒終於平伏返，艾菲真係覺得鬆一口氣放心好多，然後買定件蛋糕去接燒腩仔放學，明明返學前講好上完天橋先有得食，但到放學就乜都唔記得，未上天橋已經嘈住要即刻食，艾菲唯有畀佢食住一啖先，然後一唔肯行又畀佢食一啖，最終都成功呃到佢行晒成條天橋，不過返到屋企又即刻發難乜都話唔好囉﹗唉...

試用：Hoppetta六重紗防踢睡袋

燒腩仔係個超級反瞓嘅小朋友來，自從自己瞓一張大人床之後就更加嚴重，每晚瞓到打風咁由床頭碌到去床尾，至於張被就更加係有用等於無用，每朝都唔知畀佢踢咗去邊，所以無論係咩天氣都好，我哋都一定要佢著睡袋瞓，以防凍親冷病，而最近艾菲就好好彩，又抽中MyBB嘅試用，可以試吓日本人氣品牌Hoppetta六重紗防踢睡袋。



呢個睡袋喺日本同台灣都有好多媽媽推介為育兒好物，事關佢六重紗嘅層疊設計，經過預縮加工之後，凹凸部分就會自然形成空氣層，透氣性同吸濕性都極佳，凍嘅時候保暖唔怕焗，熱嘅時候又夠通爽同吸汗快，一個睡袋一年四季都啱用，仲要係100%天然日本綿，媽媽可以放心畀小朋日日用，據講仲會越洗越軟同貼身添﹗



睡袋係拍鈕設計，打開全部拍鈕就可以輕輕鬆鬆咁幫小朋友著上身，而且佢個腳仔位係無封實，小朋友仲係BB時可以當睡袋，好似燒腩仔咁大識行識走嘅就可以當背心咁著，唔怕佢哋瞓瞓吓想起身時會跌親，而燒腩仔宜家著緊呢個就係toddler-kids size，可以由2歲著到7歲，超級抵著﹗

N班開學回顧～week 2

又過咗好嘔血嘅一星期，忙應付燒腩仔D壞情緒，準備K1 interview大戰，同米高慶祝生日，再一家三口互傳感冒，終於今日有D精神可以寫blog，快手繼續回顧先﹗

Day 6 15/10/2014


 
同之前一日一樣，去到學校門口就變臉爆喊攬實艾菲唔肯入學校，但艾菲都係好狠咁講低句我會準時來接放學就將佢交畀老師，然後老師放學時話佢入咗課室無耐已經收聲無事，咁見到自己個仔喊成咁又點會唔心酸吖，於是放學時就專登帶咗盒維他奶仔去打吓氣，點知...燒腩仔一見到就堅持要艾菲即刻開畀佢飲，仲要飲完之後話畀艾菲知佢唔返屋企，同佢去圖書閣借埋書都唔肯換鞋離開學校，要學校D嬸嬸埋來幫手氹佢先肯換鞋走，沿路行返屋企都行到有氣無力咁，唉...麻煩友現形啦﹗

不過呢日都有樣嘢開心嘅，就係嬸嬸埋來氹佢換鞋時，都不忙話畀艾菲知燒腩仔好醒目，每日食茶點時都有主動舉手要求添食，仲話佢係全班唯一一個會要求添食嘅學生，艾菲聽到呢番說話真係忍唔住笑出來，然後解釋畀嬸嬸知佢之前返playgroup慣咗食完茶點可以舉手添食，所以佢呢個為食貓有得食實無執輸。

Day 7 16/10/2014

呢日米高請咗假，前一日燒腩仔已經話想爸爸陪佢返學，點知米高病咗要休息，唯有艾菲自己湊返學，而佢去到學校前半條街已經開始喊定先，意圖及企圖唔肯行，不過艾菲唔理堅持要佢繼續向前行，再將佢交畀老師就走。

放學時因為艾菲有事要做，接完燒腩仔就要即刻出去處理，咁米高就同艾菲一齊接放學，以為燒腩仔見到爸爸會好開心，點知佢勁心急老師未叫就想自己衝出課室，畀老師叫停就即喊，老師話佢返學時入課室無耐已經收聲，但到放學時間就又有D情緒，艾菲唯有解釋燒腩仔知放學嘅流程，等佢明白要等老師叫先可以走。

之後換鞋離開學校尚算順利，不過行咗陣燒腩仔已經扭米高抱，無論艾菲點氹佢都唔肯妥協，最終米高敵唔過燒腩仔抱咗，但當佢知道艾菲準備走時，就即刻撲過來要攬實艾菲，可惜講極佢都唔肯畀艾菲走，最後畀佢送到地鐵站，然後米高就話自己好似拐子佬捉咗人哋個仔咁，抱住個爆喊勁掙扎嘅燒腩仔返屋企囉﹗kakaka...

Day 8 17/10/2014 

為咗有多D時間安撫佢情緒先入學校，艾菲決定早十分鐘同佢出門口返學等佢輕鬆D，由著校服到出門口佢D情緒都OK，沿路仲同艾菲有講有笑添，但開始到學校附近佢就變咗靜音mode，十問九唔應仲越行越慢，去到學校前半條街就唔肯行，本來想行埋一邊join其他早到而未入得學校嘅同學仔，不過燒腩仔死都唔畀艾菲過去，甚至同學仔主動埋來想拖佢都唔得，艾菲唯有指住學校門口嘅相，逐張睇逐張講咁呃佢向前行，但去到學校門口都係爆喊收場。

到放學接佢，佢終於肯坐定定玩住玩具等艾菲，老師話佢入學校門口無耐已經收聲，見燒腩仔換咗後備衫就順口問吓咩事，以為係爆片搞到校服污糟咗，點知老師話佢係vee vee時唔記得拎起件衫，聽到呢句艾菲真係十萬個問號，乜燒腩仔識自己vee vee咩？艾菲同佢喺屋企試咗成個夏天，都從來無成功vee過一次喎﹗艾菲追問落去老師先話喺佢堅持要燒腩仔試vee嘅情況下，原來燒腩仔第一日返學已經成功vee到，學校每日三次排洗時間，都總有一次係成功﹗wow...聽到呢個消息，艾菲真係勁興奮呀﹗果然返N班對小朋友戒片係有幫助㗎﹗

正當艾菲懷著滿心歡喜，邊行邊讚燒腩仔自己vee vee好叻仔之際，燒腩仔就忽然喺上返放學必經嘅天橋前放軟手腳唔肯行，之前已經同佢講過好多次著咗校服唔會抱嘅艾菲當然堅持唔抱，亦喺心入面怨緊米高之前一日抱佢做壞規矩，結果兩母子拖拖拉拉上到天橋，燒腩仔繼續堅持唔肯上樓梯，艾菲都堅持唔肯抱佢， 好彩喺艾菲都唔知點算嘅時候，返學時想拖燒腩仔嘅同學仔同媽咪就路過，同學仔主動埋來拖燒腩仔上樓梯，燒腩仔起初有D唔願意但都肯畀人拖，然後兩個好開心咁拖住上樓梯再追追逐逐咁，燒腩仔嘅情緒先終於回復正常肯自己行。