燒腩仔喺情感發展方面係好敏感，性格慢熱需要D時間先接受到新事物，所以開學前一個月艾菲已經不停同佢洗腦，話佢知生日後要去新學校返學，學校有好多玩具同小朋友，不過一提入學校前要bye bye媽媽，佢把口雖然話OK做得到，但就成個月都表現不安，無論去邊都叫住媽媽，出街一定要媽媽拖，瞓教要媽媽陪，去到婆婆到沖涼都要媽媽沖（之前次次都係婆婆沖），艾菲放低佢喺婆婆到落一落街會嘈，之後就一直叫住媽媽或通屋走搵艾菲，仲突然唔畀艾菲抱表妹。
正式返學之後佢都係勁黐艾菲，甚至出街時指明要艾菲抱，連米高埋來幫手都畀佢一掌推開，多咗夜晚瞓唔好嘅情況，聽過佢發開口夢都叫住媽媽，仲試過有晚半夜醒咗大叫媽媽，到艾菲過到佢房就話「要媽媽喺到瞓」（調轉米高係連床都唔畀上），唔知係唔係瞓得唔好啦，個人開始變得好忟，經常扭扭擰擰唔合作，我哋叫佢咩都話唔好唔要唔做，係確確切切嘅不合作運動。
唔好以為佢呢個不合作運動係放學返來扭眼瞓先有，實情係由佢朝早起身食完早餐就已經開始，初時就話唔換片，之後就話唔刷牙唔洗面，再來就話唔去VV，然後話唔執玩具，到夠鐘開飯就話唔食飯唔食呢樣唔食嗰樣咁，千辛萬苦的咗佢返學，到接佢放學第一句就話唔換鞋，再講就直情話唔返屋企，試過有次氹佢行帶佢去麵包鋪買蛋糕，佢居然拎住個砵仔糕大叫唔排隊唔畀錢，繼而坐咗喺麵包鋪地下摞地，激到艾菲即刻放低所有嘢好似抬犯咁抬佢返屋企﹗
放學返到屋企當然係扭眼瞓啦，一入屋第一句就會話唔除鞋唔除襪唔擺好對鞋咁，然後就話唔沖涼，到瞓醒晏覺就話唔起身，拖到佢起身之後呢又話唔食飯，到九點幾食完晚飯正常咗一陣之後又夠鐘瞓覺，例牌大叫唔入房同唔瞓覺，絕對係24小時無限loop無停過，最死係佢唔單止用把口同我哋say no， 亦用自己嘅身體語言來說不，唔沖涼就死都唔會畀你除到衫，就算你夾硬掟佢落水都會掙扎爬返出來，唔做其他嘢都會誓死坐喺地下唔郁加爆喊喪叫，無論你惡鬧還是軟功氹佢都係唔work，仲會贈艾菲一句「唔要媽媽講」來叫艾菲收聲，跟住嘈足粒幾兩粒鐘都唔停，嘈到你頭痛暈低佢都未夠喉﹗
作為媽媽見到燒腩仔返學之後變成咁，真係覺得好心痛好唔開心，亦有一刻懷疑要佢返學嘅決定係唔係錯，一個啱啱足兩歲嘅小朋友係唔係太細未適合返學呢？但眼見佢其他同學都好正常喎，點解就係佢一個有咁大嘅反應呢？為咗呢件事艾菲日日都同婆婆呻，亦有向媽媽級嘅朋友討教過，再同燒腩仔學校校長傾過，大家一致嘅回覆都係佢呢D反應係好正常。
婆婆嘅意見係唔開心嘅就唔好記住，最緊要係控制大人嘅EQ，無謂同一個兩歲小朋友計較，唔好因為一時衝動太嬲，而做出D傷害咗大家親子關係嘅嘢，媽媽級朋友嘅意見就係佢哋係特登畀呢D反應父母睇，可能係怪爸爸媽媽做咩捉我去返學咁，但佢哋其實一返到學校就無事仲勁開心，所以唔使擔心太多由佢慢慢適應就得，至於校長嘅見解就係佢哋呢個年紀最鐘意同大人搞對抗，不停測試父母嘅底線，有D原則性嘅嘢父母要堅持，亦可以等佢冷靜之後解釋佢知，但要明白講完話完都唔會改善，呢個階段只可以由佢自己慢慢過。
聽完大家嘅意見之後，艾菲都開始嘗試調整自己嘅心態，無謂逼得大家咁緊令大家都辛苦，記得查媽美子推介過汪培珽老師嘅《管教啊，管教》，即刻去圖書館預約借來睇，宜家遇到燒腩仔病發喪扭時，會盡量要自己先冷靜，明知佢發癲中咩都聽唔入耳就無謂同佢拗亦無謂鬧佢，等佢都癲到知道自己好過份時，先埋去同佢傾吓偈講道理，有時明知佢係同我哋鬥氣嘅說話或一D無理嘅要求，就要有技巧地回應，唔好鬧佢亦唔好直接拒絕佢，更甚係嘗試順住佢意思去答，例如佢放學話要艾菲抱，艾菲會答：「咁我哋行返學校問吓校長得唔得先（艾菲即刻轉身作勢行返學校，燒腩仔通常都會即刻話唔返學校），咁不如你聽日問咗校長抱唔抱得先，佢話得我就聽日抱你啦，你聽日記得問喎」，又例如佢話唔食飯，艾菲就簡單話：「好，唔食就唔好食啦」，然後大人繼續食當無事發生，通常佢見奸計唔得呈就會自動轉口話「我要食飯」，再面懵懵咁爬上high chair同我哋一齊食。
除咗注意說話的技巧之外，艾菲最近仲專登拎返個speaker出來放燒腩仔房，因為燒腩仔由BB時已經好鐘意聽歌，艾菲播親佢D兒歌都一定會有反應，之前每次佢瞓醒晏覺都會大發脾氣，宜家艾菲索性唔好浪費口水同氣力同佢嘈，夠鐘埋去開歌然後拍一拍佢講句「起身啦」就出返去做自己嘢，佢聽到自己D飲歌時自自然然會坐起身唱，有時甚至要氹佢食飯沖涼我哋都會播吓歌，等佢分散吓注意力同心情好D無咁扭，呢招暫時都幾work㗎﹗
沒有留言:
張貼留言