北海道名古屋之旅～Day 12 名古屋 part2

喺昭和橫丁食飽後，我哋就出發去第二站豐田產業館，諗住畀燒腩仔睇吓佢至愛嘅車，點知...



呢個燒腩仔居然好強勁地，喺接近40度高溫下，都可以喺BB車瞓到不醒人事﹗﹗﹗咁我哋唯有坐陣等佢起身先入場啦﹗



等咗半個鐘就叫醒燒腩仔入場，入面總共分咗兩個館，第一個館係介紹織布，由種棉花開始講到織布機，真係唔係來呢到參觀都唔知豐田係做織布起家，不過宜家好似已經無再織布，但佢哋D car seat嘅布就仲係自家製。

北海道名古屋之旅～Day 12 名古屋 part1

之前一日去咗長島玩，呢日就決定留返喺名古屋，一早起身食完早餐，我哋就出發去犬山城，但由於名古屋D火車線仲亂過東京，最終我哋遊咗好耐火車河先到，耐到艾菲同燒腩仔都坐到瞓著（艾菲平日坐車甚少瞓得著㗎>.<）。



艾菲向來鐘意睇D文化嘢，之前已經去過大阪城見識，今次來到名古屋都第一時間同米高講想去名古屋城，點知佢話犬山城係國寶級仲正，艾菲唔知係個伏來所以無反對，仲一直同艾菲講落車行十分鐘就到（網上睇旅遊資料係咁講），點知我哋落咗車喺36度高溫下行咗好耐，米高先話畀艾菲知目的地喺山頂﹗﹗﹗



行咗十幾分鐘終於見到登城嘅路，而隔離就有個神社，仲遇到一排嘅鳥居添，可惜艾菲已經熱溶咗，再無心機慢慢影靚相。

北海道名古屋之旅～Day 11 長島溫泉樂園 part2

行過見餐廳無咩人，時間又差唔多，我哋就入咗去開飯啦，呢到絕大部分食物都有麵包超人樣，就連外賣壽司紫菜，水同茶都係麵包超人packing，由於天氣實在太熱，無咩胃口嘅艾菲就只係叫咗碗腐皮烏冬同燒腩仔share，份量雖然一D都唔多，不過食完之後個碗係可以洗乾淨帶走㗎﹗



食食吓忽然出面又開show，艾菲即刻拉燒腩仔出去睇，呢個表演比起之前射水槍精彩得多，一眾麵包超人角色出晒來載歌載舞，我哋中途插入都好好彩咁搵到個中間握手位，D角色會輪流埋來同小朋友握手，燒腩仔仲成功同到咖哩包超人握手呀﹗



等到頸都長先終於輪到麵包超人埋來，第一時間叫燒腩仔遞隻手出去等握手，可惜...

北海道名古屋之旅～Day 11 長島溫泉樂園 part1

起身執齊嘢食完早餐，就又行返去Oasis 21嘅巴士站坐車出發去長島溫泉樂園，車程大概一個鐘唔係好長，燒腩仔睇吓車睇吓飛機就到，一落車已經見到麵包超人博物館嘅指示牌，包包人fans即刻笑晒口飛撲埋去。



就咁睇地圖介紹，長島溫泉樂園都幾大同幾多嘢玩，有遊樂場有水上樂園有outlet仲有溫泉浸，穿過outlet同魔鬼LC專門店打個招呼之後，就會見到呢條勁高勁長嘅過山車路軌，我哋專登喺到放慢腳步等燒腩仔見識吓咩叫過山車，不過佢都係一貫淡淡定定有錢剩咁樣，只係O咀望咗陣，可能心諗「乜搵包包人要坐過山車㗎」？



睇完過山車再行前少少就會見到細菌小子同紅精靈，身水身汗咁行咗十五分鐘終於都到目的地啦﹗麵包超人博物館係要收費嘅，一歲以上嘅小朋友已經要買飛，大人細路位位1500yen，不過小童飛就會有返個禮物仔送，我哋去呢日就係送麵包超人相機，㩒落去就會見到麵包超人彈出來，燒腩仔到宜家都好鐘意玩㗎。

花卉展覽2015

見有免費飛，又有智樂社區共建遊樂場玩，我哋啱啱個星期六下午就帶咗燒腩仔去花展，雖然明知呢D時間會多人同多龍友，但諗住有靚花睇，艾菲可以影吓相，小朋友又有得玩，理應都好happy...



點知呢個小朋友超唔識貨，一入場已經猛話好熱，一時話要飲水，一時話要食糖，講多兩講仲話唔睇花，叫佢埋位影相仲即話唔影扭到爆炸﹗﹗﹗



千辛萬苦，先氹到大少影相，睇呢兩張個樣好合作，實際都唔知影咗幾多張屎面or擰歪面先成功...

北海道名古屋之旅～Day 10 札幌>名古屋 part2

喺新千歲機場掃咗一輪手信之後，pack返好D行李我哋就check in準備登機啦，呢程機係估你唔到咁爆，所以燒腩仔今次真係要全程手抱，但可能係第二次坐飛機，開始熟悉環境就想搞搞震，明明一早起身加玩咗成朝，仲要撞正午睡時間理應無晒電，佢偏偏就係唔肯乖乖地瞓，終於都扭咗半程機先畀艾菲扑暈，好彩無畀其他乘客投訴，而同來嘅時候一樣，空姐都有送小禮物畀燒腩仔，艾菲今次就揀咗顏色筆（唔拆開來睇仲以為係擦膠來呀）。



因為係內陸機唔使過關，拎完行李即刻走得，話咁快就搞掂，但米高check過機場巴士一日先得幾班，為咗慳時間我哋就揀咗坐機鐵去到名古屋站轉的士去酒店，否則天黑都仲未出到市區呀﹗



我哋今次揀咗住榮嘅酒店，不過由酒店行去地鐵站都要十分鐘路程，係勝在近機場巴士站，走嘅時候唔會太狼狽，去到酒店放低行李就即刻出返去地鐵站附近搵食，千挑萬選之後去咗間親子丼專門店，左邊呢碗係艾菲嘅芝士親子丼，睇個樣就知好味啦，連燒腩仔都食到半碗，另外叫set有名古屋名物雞全翼一隻，都好OK呀﹗

北海道名古屋之旅～Day 10 札幌>名古屋 part1

喺北海道嘅最後一個上午，我哋喺酒店食完早餐就拿拿聲check out坐JR去新千歲機場，呢架車係可以唔預先買飛，但我哋帶住燒腩仔又拖住兩大件行李，米高怕太多人上唔到車，都係寧願畀多少少錢買預定席，至少確保有位坐唔會太辛苦先啦﹗唔...真係要走啦...都唔知下次再來北海道會係何年何月何日lu...



我哋其實係下午機先走，咁早來機場係有目的嘅，之唔係搵艾菲細個時嘅偶像叮噹囉﹗上次來北海道已經好想來探佢，但上次我哋無走回頭路所以無時間，今次點都要米高預半日畀艾菲同燒腩仔來Doraemon Wakuwaku Sky Park玩。



去到機場搵locker放低行李就即刻畀錢入去玩啦，一入場即刻見到大雄間房，唔...真係好令人懷念嘅場景呀，只可惜間房係圍住咗唔可以行入去參觀（不過畀遊客入去參觀又確係好危險嘅...）。

北海道名古屋之旅～Day 9 札幌

唔知點解最近有好多朋友去咗旅行（唔係四月先復活節連放五日咩），仲要十個有九個都係去日本，日日喺facebook睇大家嘅旅行相，再加埋知道米高今個月尾會去日本出trip，真係恨到艾菲心癢癢，恨不得丟低燒腩仔一個喺香港，暱喺米高個喼到跟佢過去影櫻花，但現實係我哋已有共識，今年內應該唔會去旅行，唯有的起心肝寫埋個就來隔咗一年，幾乎爛尾嘅北海道名古屋之旅來止痕啦﹗（艾菲肯寫埋個遊記，相信領隊米高就最開心，事關佢真係催咗艾菲好多次艾菲都無理佢:P）



由於睇天氣報告，知道呢日天氣相對較好，所以米高早就鎖定呢日去小樽，但一朝早起身食完早餐又未夠鐘出發，於是帶燒腩仔去大通公園逛吓，點都叫做影張相到此一遊，之後行吓行吓就去咗時計台，上次我哋入過去睇，都係得D鐘嘅歴史同零件睇，燒腩仔絕對唔會有興趣，所以都係門口影張相就算。




行到返去札幌車站見仲有時間就去咗睇叮噹《Stand By Me》嘅Road Show，有好多個叮噹放咗喺到任人影相，又有隨意門玩，最正係有竹蜻蜓頭箍帶住扮飛，相對香港架叮噹車，日本嘅宣傳真係揼本好多囉﹗

轉眼四年...

話咁快就結婚四年，燒腩仔越大，D時間就好似過得越快咁，呢一年本來都係平平凡凡咁過，不過上年年尾嘅一個大意外，無論艾菲定米高都唔好受，但亦正好係呢個考驗，令我哋更加了解對方，感受到對方嘅愛，認清對方嘅重要性，彼此關係明顯因為呢件事而close咗好咗，所以啦...凡事有失必有得係真嘅，或者呢個就係個天畀我哋嘅message掛。



今年米高公司好忙唔係好行得開，就算請咗半日假都要三點幾先走到，上半part得艾菲同燒腩仔兩母子，見天氣麻麻地就無謂去戶外地方（好似除咗我哋結婚嗰日之外，都無一年嘅312係好天），改咗帶燒腩仔去歴史博物館玩（本來想照帶佢返學，但又怕佢放學會好攰夜晚勁扭就同佢逃學一天啦），雖然佢唔係好明D展品講咩，不過入面都幾多嘢睇。



就來行完第一層時，發現有間房入面有棵許願樹，咁啱米高呢個時候來到，艾菲就同燒腩仔入去許吓願hea吓等佢，間房入面仲有D客家衫同帽放咗喺到畀人扮村姑㗎，不過燒腩仔向來都唔like呢D玩意，連帶頂帽都呱呱嘈。

拆利是

又到一年一度財主燒腩仔拆利是嘅時間啦﹗艾菲由細到大都係等到過咗農暦十五先拆利是，所以好希望燒腩仔都會有呢個習慣，拆利是要成堆咁拆先有feel㗎嘛，嘻...



上年嘅燒腩仔仲係一舊飯，對住成堆利是都只係識狂抓狂飛，今年已經識得咩叫「拆」利是啦，出盡力咁將個利是封拆爛，再夾硬拉張銀紙出來，睇到艾菲眼都突...



為免佢咁落力拆會連D錢都撕爛埋，艾菲唯有畀個特別任務佢，就係幫手將D錢分類啦，只係簡單跟顏色分，絕對係easy job啦﹗

hea遊迪士尼

啱啱過咗嘅星期六係燒腩仔29個月大嘅日子，亦係迪士尼銀卡嘅特選周末，見佢病咗成個星期終於好返，我哋又就到時間就帶佢入去玩吓啦，今次決定hea玩唔睇parade同煙花，所以等燒腩仔瞓到自然醒，食埋個早晨全餐先慢慢入去，估唔到佢今次真係清醒過上次多好，一出地鐵站就見到歡迎牌上個Mickey Mouse（之前兩次路過都見唔到），仲來遠就見到噴水池兼肯行埋去畀艾菲影相。



唔知點解呢日唔太多人，甚至比上次平日來少，好容易就喺門口影到後面無人嘅相，之後叫迪士尼影相哥哥幫手影全家幅都好順利，哥哥仲有心情主動送貼紙畀燒腩仔添（好多都要問先肯畀）。



上次見到呢架巴士時已經不顧一切咁衝埋去，今次一入去又係咁，仲主動叫艾菲幫佢影相，好彩佢仲未知架巴士係可以坐人，唔係實摞我哋同佢坐。