20-21個月

恭喜發財﹗大吉大利﹗雖然新年都過咗好一段日子，不過話晒都係狗年第一次出來講進度，恭賀說話點都要講吓嘅，媽媽教落禮多人不怪嘛，唔...講起媽媽就連爸爸都問佢係唔係放棄寫blog，佢話唔係不過實在太忙啦，又新年又忽然停課又要忙私務，我又成日夜瞓搞到佢無晒私人時間，實在分唔到身返來清blog，不過佢會繼續努力㗎﹗



今次雙月記，都係由強項食開始講起，繼續一日三奶四固密密食，媽媽奶只係安撫作用已經可食可唔食，至於早餐下午茶就食餅乾麵包水果乳酪之類食物，午餐晚餐食一大碗有菜有肉嘅飯仔，食飽再搶住同大人一齊食佢哋D飯餸（個肚好似有黑洞咁唔識飽），全程自己食唔使人餵，亦開始識用水杯飲水（飲水會玩倒水，飲湯就一滴不漏），有見我食得咁叻叻，媽媽終於買咗張新Tripp Trapp畀我埋枱食飯，以後可以同哥哥平起平坐爭嘢食啦﹗



瞓依然係我弱項，成日貪玩唔願瞓兼越瞓越少，晏覺頂多瞓個半鐘媽媽就會叫醒我，否則夜晚飲完奶實唔願瞓，好多時明明拖到十一點先飲最後一餐奶，飲完仲勁精神喺大人床上搞搞震，玩到點幾兩點媽媽發火先肯瞓，亦由於已經識講嘢，出街會要求媽媽抱住瞓（艾菲：抱到手都軟），又會點名要媽媽R背脊陪瞓（艾菲：但成日R到手痺都未瞓呢）。

忽然有假放@觀塘海濱公園

唔知由幾時開始，每個星期六米高就算放假，佢都係要喺屋企做咗公司嘢先出得街，而我哋亦多數會揀呢日同燒腩仔上興趣班，咁啱呢個九月中嘅星期六燒腩仔無堂上，米高亦快快手完成佢嘅工事，於是我哋去咗觀塘海濱公園慶祝呢個天跌落來嘅假期。



最近我哋愛上咗去觀塘海濱公園，最主要原因係交通方便，又對住個無敵海景兼有靚靚日落睇，唔使帶咩裝備悠悠閒閒咁散吓步坐吓影吓相，咁就過咗一個下午。



行到悶又可以入感觀花園入面玩，沿路都有D設施啱燒腩仔玩，例如呢條會郁嘅平衡木，幾好玩㗎﹗

木乃伊@科學館

自從科學館上年八月開始做木乃伊展後，艾菲知道米高好想去睇，不過一直就唔到時間平日去就拖到九月，眼見展覽十月中會完，於是趁呢個星期日落雨，反正無嘢做到去同人逼吓啦﹗



我哋有博物館全年證，所以唔使排隊買飛可以直入會場，但場內真係超級多人，而且場內燈光極暗，再加上本身對木乃伊無興趣，燒腩仔又全程喊驚嘈嘈閉，搞到艾菲勁無癮，至於全程抱住BB豆豬嘅米高都睇得好唔自在，又怕佢畀人逼親又怕佢扭，只好匆匆睇完就走。



逼完一大輪出返來，我哋去咗科學館最低層玩咗陣，有得亂玩亂摸加亂走，燒腩仔即時生猛返晒。

開學日@大埔海濱公園

經過一個漫長嘅暑假後，終於都來到九月一日開學日，正當個個都喺facebook出開學相，我哋偏偏出去公園玩嘅相，皆因燒腩仔學校今年有工程，延遲到四號先開學，雖然天氣又熱又焗，但唔趁呢日公園無乜人去玩幾時去呀，艾菲一朝早執齊嘢就一拖二出門，堅係好有決心㗎﹗



由於想順手同佢兩個影吓靚相，呢日又約咗燒腩仔公公婆婆飲下午茶，所以好勇咁挑戰大埔海濱公園，點知...BB豆豬一踩入草地就爆喊，唯有食吓星星餅定驚先。



一直食呀食食呀食食唔停口， 妹妹嘅情況都係無好轉，就算燒腩仔哥哥好心幫手氹一樣無用，眼見時間無多（約咗婆婆就夠鐘）又應承咗同哥哥去遊樂場玩，唯有影兩張就收隊走人，好失望呀...

三點式妹妹@清水灣

繼續回到八月時，去完十幾日旅行返來，米高D大假仲未清完，所以放多個星期陪我哋，艾菲當然要抓緊暑假嘅尾巴，叫佢再帶我哋去沙灘玩，皆因上次喺日本沙灘實在玩得唔夠喉，重點係妹妹套三點式水著仲未有機會出場，上次去泳池怕佢凍所以著一件頭泳衣，去日本又怕麻煩懶得換無著到，今次再唔著分分鐘要等多年㗎啦﹗



本身有諗過再去半月灣，但諗起入到西貢仲要轉船，帶住兩個細又大包細包咁，都係唔好咁辛苦，近近地去清水灣算，食飽午餐再慢慢執嘢出發，去到都係兩點幾三點仲有大把時間玩，然後我哋set好帳蓬開好地蓆就放BB豆豬出來，以為佢有過上次日本沙灘嘅經驗應該OK，點知都係要D時間warm up。



花咗D時間終於適應咗個質感，但都係keep住呆呆豬樣。