開學日@大埔海濱公園

經過一個漫長嘅暑假後，終於都來到九月一日開學日，正當個個都喺facebook出開學相，我哋偏偏出去公園玩嘅相，皆因燒腩仔學校今年有工程，延遲到四號先開學，雖然天氣又熱又焗，但唔趁呢日公園無乜人去玩幾時去呀，艾菲一朝早執齊嘢就一拖二出門，堅係好有決心㗎﹗



由於想順手同佢兩個影吓靚相，呢日又約咗燒腩仔公公婆婆飲下午茶，所以好勇咁挑戰大埔海濱公園，點知...BB豆豬一踩入草地就爆喊，唯有食吓星星餅定驚先。



一直食呀食食呀食食唔停口， 妹妹嘅情況都係無好轉，就算燒腩仔哥哥好心幫手氹一樣無用，眼見時間無多（約咗婆婆就夠鐘）又應承咗同哥哥去遊樂場玩，唯有影兩張就收隊走人，好失望呀...



然後過到來遊樂場，呢個小妹妹即時生猛晒，自己喺條斜路到上上落落無難度。



難得燒腩仔心情好，主動埋去拖妹妹行，而妹妹又居然無反抗，媽媽睇見就心甜。



跟住兩個旁若無人咁一齊sir滑梯，睇相望落燒腩仔好似好溫柔，實情呢...佢係好粗暴咁扯BB豆豬隻手同一手推佢落滑梯，嚇到艾菲心都離一離，不過妹妹竟然唔喊唔驚仲好enjoy，成件事好變態囉﹗kakaka...



喺艾菲不停追住BB豆豬來影嘅時候，燒腩仔難得主動叫艾菲睇吓佢sir滑梯，艾菲當然唔會漏咗佢。



但就喺呢個無人看管嘅時候，超大膽嘅BB豆豬居然自己爬咗上樓梯頂，馬騮妹之名果然唔係浪得虛名﹗



玩到兩個好似跌咗落水咁，臨走叫佢兩個攬住畀艾菲影返張相先，雖然熱到兩個都樣衰衰， 不過艾菲就係鐘意佢哋呢種自然不做作，仲用咗呢張相做新電腦嘅wallpaper添。