Miss I......vy's world: 九州東京之旅~後記

呼~用咗五個月時間，終於成功喺出發去下次旅行前完成呢個遊記，無錯...喺去完呢個旅行之後無耐，我哋已經plan定2018年嘅旅行，亦已經一早買定機票，如無意外頂多四個月，艾菲又有得飛啦...啦...啦...（最近湊仔又湊到好低潮，把聲長期處於性感mode沙晒，幾乎發唔到高音咁滯，絕對需要D正能量頂住）

出發前同朋友講去旅行，大家嘅反應都話做咩咁勇，覺得我哋湊兩個去旅行係攞苦來辛，之但係我哋一向無老人家無工人姐姐幫手，唔通為咗自己舒服就無端端丟低BB豆豬或燒腩仔是但一個喺香港畀其他人湊咁自私咩，就算有長老肯捱義氣幫手，艾菲同米高都玩得唔放心啦，反正我哋都長期二打二四圍去，宜家不過係將個地點由香港轉移咗去日本之嘛，對我哋來講真係無乜分別，艾菲完全無攞苦來辛嘅感覺呀﹗

咁問心今次旅行辛唔辛苦，艾菲絕對唔會話唔辛苦，以前帶燒腩仔一個去旅行，佢仲細食咩玩咩我哋全權話事，宜家佢開始大開始有自己主見，有D位佢都會有意見，亦會玩到失晒控，更加會特登搞事唔配合，旅途上不停教仔基本上都已經係指定動作，如果同時間有另一個小朋友喺側邊扭眼瞓扭食嘢之類，都咪話唔惡啃。

不過我哋出發前最擔心嘅，反而唔係燒腩仔嘅搞事位，而係BB豆豬唔鐘意坐定定嘅性格，坐飛機艾菲姑且仲可以用媽媽奶迷暈佢一陣，但自駕遊幾日堅係好惡頂，燒腩仔成日扮專家教返爸爸揸車已經夠煩，再加上BB豆豬不停喺car seat到喊嘅噪音（艾菲已經keep住畀嘢佢食同伸手去後面安撫，但佢扭起眼瞓上來係點氹都唔收聲直至倦極入睡為止），米高仲可以繼續專心揸車，安全送我哋去每個景點真係要畀好多個讚佢。

當然有晒經驗嘅艾菲，都一早準備定大堆法寶招呼呢兩個小朋友，由兒歌到卡通片都應有盡有，亦帶定大量零食果汁收買人心，畫簿顏色筆再加即買即玩貼紙簿同小玩具，所以三程機都可以順利完成無騷擾到其他人，只係自駕遊時簡中要忍受佢哋嘅煩音算係超額完成。

另一個要煩嘅就係BB豆豬嘅飲食，今次BB豆豬出發時只係得15個月大，相對燒腩仔第一次同我哋去北海道時嘅22個月差好遠，始終仲細艾菲都唔想佢咁快食街外嘢住，所以艾菲都帶定炆燒杯同電熱水煲同行，亦真係煮足12日BB餐畀BB豆豬，主要都係喺超市買D沙律菜，蒸豆，本菇同免治肉碎，再加魚仔乾同烏冬蕎麥麵快熟通粉之類，朝早起身用燜燒杯焗熟，廿分鐘搞掂出得門口，亦間中出動BB肉醬/咖喱，去餐廳叫碗白飯畀佢撈來食。

至於行程方面，真係要讚一讚米高，艾菲基本上事前係無搵過任何料，米高問咗好多次艾菲想去邊玩咩艾菲都無應佢，只係話佢知要買乜買乜同買乜，佢就幫我哋安排咗呢個朝早畀小朋友放電去玩，夜晚畀艾菲shopping嘅親子遊，仲真係身體力行帶路格價同拎嘢，有需要時又幫手招呼患有媽媽shopping失心瘋嘅燒腩仔，等艾菲可以免受騷擾專心掃貨。

不過帶住兩個細去旅行，我哋都唔敢去得太盡，一日頂多安排兩至三個景點，盡量唔好太早起身，車程唔好太遠，中間有D休息位，夜晚早D返酒店休息，有D節目我哋都係即興諗到就去，無時間或者大家狀態不佳就取消，自遊行就係有呢D好處，大家有商有量想點玩都得，唯一唔好就係食會求其咗，唔想等位浪費時間亦怕餓親兩個小朋友，所以多數係幫襯食定食嘅餐廳，隨便一間門面望落似樣舒服就入去。

如果有睇之前遊記，都知我哋今次玩到連日本白車都坐埋，意外嘅嘢幾時發生真係無人知，所以旅遊保險係唔慳得，雖然未必賠足但至少有起事上來都唔使煩錢呢樣先（我哋今次有D文件費都無賠到），另外就係有起事上來一定要震定同震定，如果連爸爸媽媽都唔撐住小朋友就會更加驚，如果唔熟當地語言最好就諗吓身邊有無邊位朋友識，打返香港搵朋友即時電話翻譯，總好過雞同鴨講更加徬徨。

2018年1月18日星期四

九州東京之旅~後記

沒有留言:

張貼留言

2018年1月18日 星期四

九州東京之旅~後記

沒有留言:

張貼留言

2018年1月18日星期四