20個月

太好啦﹗媽媽終於寫完遊記，又到我出場嘅時候啦﹗話晒都係新一年，同大家講返句Happy New Year先﹗呢個聖誕新年，我同哥哥玩得好開心呀，仲收咗唔少聖誕禮物，媽媽話又係時候準備過農曆年，到時我哋可以著靚靚四圍去拜年逗利是，等我練定講恭喜恭喜先﹗



講返成長進度，食方面媽媽話完全唔擔心我，一日三奶四固無走雞，早餐下午茶食餅乾水果乳酪之類食物，午餐晚餐就一大碗有菜有肉嘅飯仔，最愛食烏冬粉麵同菜，食完自己碗飯會示意大人畀大人食物我一齊食，全程自己食唔使人餵，就算出街食飯爸爸媽媽都可以食得好輕鬆， 至於媽媽奶其實已經進入可飲可唔飲嘅階段，不過奶痴如我一夠鐘就會攬住媽媽錫，所以畀我搞到好冧豬嘅媽媽都無好強硬話唔畀同我戒。



瞓依然係我最難搞嘅嘢，開始唔願瞓兼越瞓越少，晏覺瞓超過一個鐘，夜晚就好大機會飲完奶仲眼光光，由夜晚十一點幾碌到凌晨一點要媽媽發火先瞓，然後一覺瞓到第二朝十點幾跟哥哥一齊起身，至於晏覺都係繼續無得逼，平日喺屋企就兩點左右飲完下午茶奶開始瞓，出街就玩到完全無電先肯瞓。



性格同脾氣已經相當明顯，trouble 2情況暫且未算好惡頂，越來越有主見會主動同我哋講想點點點，唔符合佢心意時會發難大喊甚至趴地，不過媽媽唔理我就會識趣收聲，事後冷靜落來可以慢慢傾返，肯聽人講會嘗試去改，模仿性好高成日望住哥哥做乜就跟住去做，又學爸爸嘟八達通，又學媽媽摺衫做家務，依然怕醜會避開陌生人，但相對上個月又進步咗D，會遠遠咁望住人笑，見哥哥叫姨姨叔叔又會跟住一齊講。



活動能力keep住A++以上級別，電力無限日日喺屋企四圍行同擒，再整到成個廳都係玩具，出街會扭落地要自己行唔畀抱，亦唔再願意坐hip seat，就連坐車都要自己坐，不過兩兄妹逼埋一齊坐，跟住就係一輪吵鬧，激到媽媽幾乎發火大叫頭痛，宜家去到公園會自動波上樓梯sir滑梯，識自己坐上搖搖馬到搖，見哥哥表姐玩D攀爬架又會跟住去試爬，當正自己好大個咁。



小手肌發展良好，疊到積木，識打開衣夾，識玩泥膠，識貼貼紙，識用顏色筆畫畫，識㩒玩具電話玩自拍，就連拉拉鏈開密實袋都無難度，自理算係還可以，有意識除衫除褲但仲未除到，講到自己想poo但唔肯坐potty，返屋企會自己除外套同除鞋除襪，玩完玩具會幫手收拾，換完片會幫手丟去垃圾桶，換出來D衫都識放去洗衣籃，認得晒屋企D衫邊件係邊個，仲識得揀著邊件衫帶邊個頭飾，超級貪靚成日照鏡。



講嘢越來越叻，宜家基本上係乜嘢都識講，只在乎我肯唔肯開口講，最鐘意學媽媽講D啦呀囉，成日話「唔緊要啦」「畀我啦」「得未呀」「咩呀」「吓」，尾音仲要特別拉高（艾菲：真係好學唔學），想食奶會講住「跟我來啦」拖媽媽入房，想食嘢就會講「謝謝爸爸畀餅餅」， 出門口想著外套會講「衫呀」，返屋企又會指住媽媽件外套叫「媽媽除衫」，臨瞓會話「night night爸爸」，再講「抱我」示意我哋抱佢上床，會跟口水尾數1-10（即我哋講完1佢講2同3），簡中仲會自己邊玩邊哼歌。



同哥哥感情越來越好，成日跟住哥哥尾去玩，佢做乜我就跟住做乜，出街會主動伸手畀佢拖，亦肯聽哥哥指令聽佢點，當然哥哥間中都仲係會整鬼我，忽然搶咗我手上嘅玩具，或者無啦啦話我裝佢換衫，但我真係好愛好愛哥哥㗎，只係一次忍唔住還手，事後畀媽媽話完就無再郁過手，只係喊兩聲投訴就算。



最後媽媽話要講返最強小三嘅進度，作為爸爸嘅前世情人，宜家每日起身就會不停問住「爸爸呢」，由起身問到爸爸放工返來為止，然後佢放工返來我就會大大聲咁叫「爸爸...爸爸...」，跟住當然係黐住佢搵食（艾菲：媽媽夜晚忙煮飯，所以多數由爸爸負責放BB飯），再全晚纏住佢陪我玩同睇書（艾菲：媽媽食飽要忙哥哥功課），直至臨瞓飲奶先回歸媽媽嘅懷抱（艾菲：如果唔係餵奶我應該一早無掟企）。