繼續清blog系列，四月就完仲講緊三月尾嘅事，話說行咗幾次山之後我哋已經無乜idea去邊，於是米高得閒就會上網發掘吓好地方，忽然有日佢話想去塔門行吓，但又話呢到逢假日都逼爆，咁艾菲咪叫佢夾吓燒腩仔D學校假期，搵日平日放假去囉，結果等咗成個月有多，先等到燒腩仔呢日放假（佢學校因為暑假長，所以平日真係無乜假放），唔落雨就出發啦﹗
去塔門一定要坐船，可以喺黃石碼頭坐，亦可以喺馬料水坐（平日得兩班），咁我哋九龍人，屋企附近又有小巴到西貢，當然係揀黃石碼頭會方便D，但為咗順利坐到呢朝十點七嘅船，我哋晨早八點幾就要趕鴨仔咁出門口，一輪小巴再轉巴士，再加上呢日艾菲作感冒個頭痛到爆炸，要全程keep住食panadol頂住，都咪話唔辛苦（真係為咗米高同燒腩仔，唔想掃佢哋慶頂硬上㗎咋﹗）
