繼續清blog系列，四月就完仲講緊三月尾嘅事，話說行咗幾次山之後我哋已經無乜idea去邊，於是米高得閒就會上網發掘吓好地方，忽然有日佢話想去塔門行吓，但又話呢到逢假日都逼爆，咁艾菲咪叫佢夾吓燒腩仔D學校假期，搵日平日放假去囉，結果等咗成個月有多，先等到燒腩仔呢日放假（佢學校因為暑假長，所以平日真係無乜假放），唔落雨就出發啦﹗
去塔門一定要坐船，可以喺黃石碼頭坐，亦可以喺馬料水坐（平日得兩班），咁我哋九龍人，屋企附近又有小巴到西貢，當然係揀黃石碼頭會方便D，但為咗順利坐到呢朝十點七嘅船，我哋晨早八點幾就要趕鴨仔咁出門口，一輪小巴再轉巴士，再加上呢日艾菲作感冒個頭痛到爆炸，要全程keep住食panadol頂住，都咪話唔辛苦（真係為咗米高同燒腩仔，唔想掃佢哋慶頂硬上㗎咋﹗）
坐咗半個鐘左右，終於都到達我哋嘅目的地塔門啦﹗一落船望見四周嘅環境，真係好漁村風味，好一個寧靜嘅小島呀﹗
由於成朝都無食過嘢落肚（頭痛到無胃口），再加上米高話呢到係行一個圈，離開咗下面D餐廳就開始進入郊外地方，回程先會再過來，見都十一點幾BB豆豬差不多夠鐘開餐，就決定搵間餐廳醫肚先，先叫個炒飯塞住燒腩仔把口，再點塔門名物之一嘅炸墨魚丸，之後米高再叫咗碟椒鹽魷魚，除咗名物墨魚丸幾好食之外，其他艾菲只會comment為入得口，畢竟家庭式經營唔好要求咁高就係啦﹗
食飽就開始起行啦﹗跟指示牌先上去天后古廟。
穿過天后廟就慢慢行入叢林，沿路都係石屎路只係少少斜，艾菲揹住BB豆豬行一D都唔辛苦。
行到上大草地，就開始見到塔門另一名物，大水牛啦﹗
再穿過個球場，已經去到海邊啦﹗好天涯海角feel呢﹗
之後就到全程最辛苦嘅一段，就係行呢條二百級左右嘅長樓梯上山，以為去到高位會有更靚嘅景睇，點知...上到去只係得個涼亭，四周都畀D樹包圍住乜都睇唔到，認真有D失望。
不過由涼亭落返來嘅一段路，就可以望到180度海天一色無敵大海景，只可惜呢日天氣麻麻，個天一直天陰陰，否則影出來D相一定會好靚﹗
由於艾菲個頭又忽然好痛，頂唔住要捉呢兩父子坐低抖一抖，同成班牛一齊吹住海風欣賞吓呢到嘅無敵大海景，而呢到嘅牛真係見慣人唔會點理D遊人，同燒腩仔影相嘅呢隻仲要勁醒目走埋來聞我哋個袋想搵嘢食添（帶咗幾隻蕃薯仔畀BB豆豬）。
其實球場下面有條路係可以落去石灘近距離睇海或者釣魚嘅，不過呢日天氣麻麻再加上怕燒腩仔輪盡有危險，我哋就無行落去，沿路行返出去開始見到D俾遊人坐低休息望海嘅長凳，見呢個位唔太大風，BB豆豬又咁啱瞓醒，所以坐低畀BB豆豬食吓下午茶，亦係咁畀艾菲影到呢日嘅picture of the day啦...啦...啦...
呢兩兄妹影親合照都貌合神離咁，不過搞搞震擒上凳又出奇地合拍喎﹗
由於個天真係落出雨，我哋喺張長凳到避咗一陣雨後，見雨細返D就快手完成埋尾段嘅行程，好快就經過咗塔門嘅指定景點疊石。
而行到尾就會見到位於塔門對面嘅高流灣。
行完一圈返到來碼頭，都仲有成個幾鐘先夠鐘開船，於是又同燒腩仔返去餐廳到食豆腐花，艾菲都順便同BB豆豬去公廁到換片（碼頭個公廁有換片板，真係好方便帶住BB嘅家庭，讚讚讚﹗），然後差唔多食完，餐廳個哥哥就問我哋坐唔坐快艇出去，雖然貴D（廿蚊位）但好過喺到呆等成個鐘，而且七分鐘已經返到黃石碼頭，仲趕得切坐前一班巴士出西貢（半個鐘一班），梗係gogogo跑出碼頭上船，亦由於開船後速度太快嘅關係，我哋係大風到嘢都講唔到咁滯，第一次坐嘅燒腩仔表示好好玩，個口幾乎無合埋過笑足全程勁high囉﹗kakaka...
沒有留言:
張貼留言