《美女與野獸》係眾多迪士尼公主系列卡通片入面艾菲最鐘意嘅一部，之前聽聞佢開拍真人版即嘈住要入場睇，千呼萬喚終於等到佢上畫，已經一早同米高請定假叫佢預個期畀艾菲睇戲，亦咁啱畀艾菲搵到附近戲院有個星期四晚夜場嘅期好good fit（盡量唔揀星期六日，想留返來做family day），可以湊完燒腩仔放學陪做功課同沖涼，再等米高放工返來交更先閃，仲要睇完啱啱好趕得切返來餵BB豆豬最後一餐奶。
但到底係自己一個去睇好，定還是帶埋燒腩仔一齊去睇好呢？艾菲事前都掙扎咗好耐，由於呢排湊仔湊到情緒唔多好，米高其實係極力建議艾菲自己一個睇去relax吓，佢話自己絕對有能力一湊二一晚，艾菲唔係唔信佢搞得掂（其實之前艾菲有事要出去時，佢都已經試過一湊二幾次），只係自覺唔係幾好意思要佢咁辛苦，於是決定由燒腩仔決定一唔一齊睇。
艾菲：媽媽去睇戲，你一唔一齊？
燒腩仔：好呀﹗
艾菲：睇美女與野獸喎，全部講英文㗎喎，但有人唱歌好好聽﹗
燒腩仔：ar...咁唔好啦...
艾菲：有歌聽喎...D嘢識郁好得意㗎﹗
燒腩仔： 好呀好呀，睇丫﹗
艾菲：都係唔好啦，有野獸好得人驚，一陣你又話好驚啦﹗
燒腩仔：唔驚㗎﹗我大個仔㗎啦﹗唔驚㗎啦﹗
艾菲：真係？有D位黑麻麻㗎喎﹗
燒腩仔：我試吓啦﹗就來四歲半，唔驚㗎啦﹗
就係咁，艾菲就拋夫棄女一晚，同忽然大個仔嘅燒腩仔拍住拖入場睇戲，而為免佢入場後嘈嘈閉，艾菲都醒目買定爆谷招呼佢，果然一入場佢就顧住食爆谷，D trailer播咗咩都唔知，開場嘅歌舞更加係佢嘅飛佛，艾菲只需喺側邊作簡單解畫即可，直至野獸出現嘅一幕，佢就開始來料發作，無話驚但不停大大聲咁問東問西，由於呢場幾乎全場係大人，艾菲實在驚佢嘈親人而要不停提醒佢靜D。
兩個鐘嘅戲，加埋佢唔熟悉嘅英語對白，艾菲都驚燒腩仔坐唔定，點知佢真係好乖乖坐定，無叫過去洗手間，只係嘈要飲嘢，同有問住幾時完，而最爆嘅一幕係當你以為佢唔明故事講咩，忽然到最後一塊玫瑰花瓣落下時，佢喊到眼紅兼聲震咁同艾菲講「我唔想玫瑰花死呀﹗」嗰一刻真係嚇親艾菲，仔你幾時變得咁感性？即同佢講有人已經救返朵花同全部人，所有人同花都無死到，佢先似明非明咁收聲冷靜返落來。
見佢難得睇到咁投入，散場返屋企時艾菲就剩機考吓佢劇情，點知佢已經一秒變返無心肝嘅燒腩仔，乜都答艾菲唔知同唔記得，唔忿氣返到屋企再同米高一齊chok佢，終於發現佢唔係唔知唔記得，只係唔知野獸叫野獸，又唔識形容畀我哋知姐，部分劇情佢都係記得嘅，表現明顯比之前幾次有進步，不過就明顯係驚同唔鐘意套戲，點解艾菲咁肯定？下回講到佢睇《藍精靈迷失的村莊》時再講。
沒有留言:
張貼留言