偷窺狂？﹗

以往一到睡眠時間，只要放燒腩仔落床就可以，他掙扎一會兒便會乖乖睡覺，但自從他懂得反身之後，每次放他落床都總是在床上滾來滾去，呯呯聲的踢床欄扯床圍自high一番，要逼艾菲出手拍pat pat才肯睡，而這個不肯自己入睡的小朋友最近又有新花招，就是躲在床尾做偷窺狂了﹗

事源最近天氣開始熱，但又未至於要開冷氣睡，為免總是一頭汗的燒腩仔熱醒，我們只好拆走床尾的床圍，讓他吹著風扇睡，然後艾菲放他落床後如常去做家務，抹玩具時卻忽然發現有個人望住自己傻笑﹗原來這個八卦燒腩仔發現了新大陸，由床尾望出去可以偷窺到大人們在客廳做甚麼的﹗

看見一直偷窺著自己的燒腩仔，艾菲實在哭笑不得，但還是忍著笑將他放好再去做其他家務，之後每次艾菲行過房間附近，便會聽見正在踢床欄的燒腩仔立即停腳，再九秒九爬去床尾望著艾菲傻笑。

望著這個平日不怎麼跟艾菲的燒腩仔，每次捉他去睡覺都會變得特別嗲，用盡一切方法要艾菲陪著他睡，就算艾菲派米高入房陪他睡，他都堅持要爬去床尾找艾菲，一見艾菲望他即甜甜的傻笑起來，艾菲的心當然是立即融化，再狠心都捨不得不陪伴在側啦﹗

安全門欄

說時遲那時快，燒腩仔已經學懂向前爬（正確來講應該係撲，佢唔係好似其他小朋友咁痴住地下向前，佢識用膝頭撐起個身好似準備跳遠咁前後un，跟住就會向住佢個目標撲埋去），而他最喜歡便是爬向座地風扇、電視搖控和手提電話（總之唔係佢嘅玩具佢最有興趣），艾菲和米高有見及此，都覺得是時候要在洗手間和廚房裝門欄，以免走漏眼發生意外。

由於蝸居的地方不大，兩道門只有63和66cm闊，基本上市面上絕大部分門欄都不適用，好不容易才找到兩個牌子有做特窄門欄，分別是C-Max和UNICHU，價錢大約是$380至$500左右，就算買兩個也不包送貨不太化算，所以艾菲決定試試上淘寶搜尋。

在淘寶輸入門欄，即有大堆選擇，但做特窄門欄的實在不多（人哋大陸D樓咁大，邊有人用特窄門欄吖，裝係露台同樓梯口要加闊就大把），最後找到一個可以訂造60-75cm門欄的店鋪，158人民幣一個，訂造再加20人民幣一個，順風運費到港要140人民幣（10kg重），一來一回跟香港買差不了多少，而且不知道門欄質素是否OK（訂造的話唔啱想退貨都難），計數後艾菲又猶豫起來。

不岔氣的艾菲當然繼續搜尋，無意間被艾菲見到Baby Kingdom有媽媽分享在淘寶買的baby safe門欄，更有安裝後圖片介紹，同樣是158人民幣一個，亦有其他媽媽回覆說質素不錯，眼見人家的廚房門闊度跟艾菲家的差不多，艾菲便即時聯絡淘寶賣家查問，對方勁詳盡地跟艾菲介紹，還教艾菲怎樣安裝門欄在只闊63cm的門框內（正常安裝係要65cm闊先得，特別安裝可以應用係63-64cm闊嘅門框，少過63cm嘅門框就安裝唔到），再加上直接到港的運費相對便宜（貨重11kg，到港只需65人民幣再加$20住宅送貨費），艾菲便決定淘兩個門欄回來用。

淘門欄之時，正值淘寶做每晚九時用信用卡付款便可以300人民幣減30人民幣優惠之時，艾菲這些精明消費者當然不會放過優惠，較好鬧鐘準時坐在電腦前搶優惠，難得艾菲如此有誠意就一定成功取得優惠啦﹗所以最後買兩個門欄的實際支出大約是$480（艾菲用中銀卡快捷支付找數，手續費只計1.5%），比在香港買節省了差不多$300呢﹗

付款後兩天便收貨，等米高放工回家後立即拆件安裝，基本上都沒甚麼難度可言，將附送的螺絲模貼著門框扭實即可，只是63cm那道要花點功夫，因為其中一邊不能用螺絲模而只能靠門欄直接頂著門框，搞了半小時左右便大功告成，整體結構算是穩固安全的。

門欄是雙向開門，更備有自動回彈功能，試用一星期後，艾菲覺得雙向開門都頗方便，不過正如Baby Kingdom媽媽所言，門欄上瑣的聲音比較大（但小心D拉住來瑣都可以好細聲），至於自動回彈功能呢...就不是每次都成功囉（成功與否視乎開欄嘅方向同力度而定），所以最好都是自行順手將它關上（咁我哋平日出入房間，都係要自己開門同閂門啦，所以艾菲又唔係好介意呢點），但正正是因為有這個功能，有時不太方便用手來關門欄時，可以用身體其他部位將門欄關上（例如用腳順勢一踢），所以艾菲覺得門欄尚算OK，希望至少能夠用到兩年（據BK媽媽講，門瑣壞可以叫賣家寄套新落來就可以繼續用），那麼便物超所值了﹗

後記：

收門欄時其實都有件事令艾菲不吐不快，話說淘寶賣家用嘅速遞公司係全日通，唔知點解無得查物流訊息，艾菲只可以憑平日收貨經驗估佢幾時送貨，收貨當日五點幾速遞員例牌打來問有無人，但佢問嘅唔係屋企有無人，而係問有無人可以落樓去隔離街拎件貨﹗原因竟然係佢唔想泊入停車場要畀錢，加上落雨唔方便﹗

聽到嘅時候真係嬲爆，畀錢你速遞公司送貨，目的就係想你送件貨到屋企門口唔想自己抬餐懵，你居然掉返轉叫艾菲自己落樓去隔離街搬件11kg嘅貨上樓？？？對於呢D咁唔合理嘅要求，艾菲當然一口拒絕堅持要佢送到門口，仲忍住道氣無鬧佢兼教佢去邊到泊車再行過來，但呢個速遞員居然應我話搞得來都夠鐘（明顯係指夠鐘收工﹗）要第二日先來﹗﹗﹗

不過當艾菲決定收貨之後打去佢公司同向淘寶賣家投訴時，呢個速遞員又無端端拎住件貨出現係門前，所以艾菲十五十六唔知仲投唔投訴好，但好明顯呢個速遞員就想偷懶，借頭借路想搵個客笨等自己做少D功夫囉﹗

燒腩用品~保溫壼篇（附加焗粥實況）

燒腩仔出世前，為方便他嫲嫲帶飯到醫院給艾菲吃又見有減價，所以買了一個0.5L的象印保溫壼用，但老人家有她的堅持一直不肯用，而減價的promotion則到現在都仍未做完，早知就遲一點買也可以...好不容易才等到燒腩仔開始食粥仔，立即拿它出來密密用，用它來焗兩餐粥就最perfect（由於艾菲係懶媽媽，所以多數一次過煮兩餐粥好少分開煮），但用來留第二餐就一定裝不滿，基於裝不滿的保溫效果會較差，而且帶出街都不太方便，所以艾菲決定多買一個細一點的保溫壼，這個就留待要帶兩餐粥出街，或者座熱食物時才用。

由於用細保溫壼的日子不會太長（基本上過咗呢個食粥時期就唔會有太多機會再用），所以艾菲實在捨不得投資太多，見象印有一款0.25L專for BB粥仔，就外型來說是頗吸引的，但一想到如果燒腩仔大食一點已經不夠用，加上價錢絕不便宜所以絕對不會考慮，再看較多媽媽用的Thermos 0.35L款，都差不多要三百元一個（價錢同我個象印0.5L差唔多），對艾菲來說還是有點不值，後來在Baby Kingdom見有媽媽推介大福口這牌子，說消委會測試保溫效果最佳，價錢更是非常便宜（只係幾十蚊個），所以都想買一個來用，只是找來找去都找不到適合的款式，然後某天路過Trendyland見做盤點減價，發現有0.35L卡通保溫壼賣，$129一個（原價好似$179），sales說可保溫十小時，更可以用來焗粥仔（即同象印嘅功能一樣啦），艾菲便抱著姑且一試的心態買了一個（除咗McQueen，仲有Mickey，公主系列同Daisy）。

膽粗粗用百多元買了個無牌子的保溫壼回來試，其實都擔心自己倒錢落海，回家後先用滾水測試，七小時後水還有點熱，八小時後水仍然是暖，即pass無問題啦（基本上保溫十小時艾菲就唔多信㗎啦，象印都係話保溫六小時之嘛-->辣手那種，但八小時係艾菲實際需要），然後便實戰用來放粥仔，中午十二時煲好粥仔便立即放進去（放粥前先倒滾水入去暖幾分鐘預熱個膽），到晚上七點半倒出來仍然是暖口的，試了幾天都沒有出事，即這個保溫壼既有外表又有內在美，艾菲沒有買錯啦，Good﹗

同場加映保溫壼焗粥實況：

當日買象印保溫壼時，sales姐姐給了艾菲一張紙教焗粥仔，不過懶醒的艾菲轉頭就丟掉，到要用時才急急上網搜尋，幸好最終都找到，否則得物而無所用就慘了，所以為免自己再失憶忘記，艾菲要step by step將焗粥的步驟記低。

1. 洗米後先用凍水浸米30分鐘
（田鼠媽教浸過夜，艾菲試咗之後發現D粥之後再煲時真係會快D綿）

2. 加米和滾水至全滿，扭上壼蓋預熱五分鐘
（我成日諗呢個step可唔可以唔加米住，就咁用熱水預熱算，因為倒返D熱水出來時又要小心唔好倒咗D米出來都幾煩）

3. 倒出滾水再放入滾水至全滿，扭緊壼蓋焗1-2小時
（一定要用滾水，艾菲試過有次D水唔夠熱即刻焗唔到）

4. 1.5小時後已變成潮洲粥

5. 按BB口味將粥煲至適合的稀杰程度

6. 開餐
（嘩﹗好好味呀﹗-->我餵燒腩仔時成日咁講，但實際好唔好味就...天知地知燒腩仔知囉...）

米和保溫壼的對應份量：
0.5L保溫壼＋1/2杯米 ＝兩碗半粥
0.5L保溫壼＋1/3杯米 ＝兩碗粥
（如果煲兩碗又唔想浪費，唔建議用1/3杯米，因為中途有意外黐底就會唔夠食，所以艾菲通常用差不多1/2杯米）
0.35L保溫壼＋1/4杯米 ＝一碗半粥
（艾菲試過用0.5L保溫壼焗1/4杯米，都一樣焗到粥仔，不過焗完之後都仲有好多水，所以0.35L應該fit D）

驚嚇三分鐘

燒腩仔最近除了愛上「bu」口水之外，飲奶後都總是喜歡咬奶咀啜空氣，每次艾菲將奶樽拉開他便會發難喪喊，於是艾菲便懷疑他大概是牙痕想出牙，所以的起心肝買牙仔餅給他咬，結果路過惠康時便順手買了亨氏的牙仔餅來試（本來想買米餅，不過又覺得太易腍止唔到痕）。

買回來後艾菲都認真看過包裝說明，寫明是適合6個月以上BB食用，亦親自試過質地真是超硬，大人用牙咬都很難咬開，於是艾菲覺得給燒腩仔咬應該都安全呀，所以便放心帶出街，打算在跟公公婆婆飲茶時給他一點小食。

給他牙仔餅前，艾菲還擔心懶蟲燒腩仔不肯自己用手拿著吃，結果他卻是意料之外的乖，很是滋味的模樣拿著牙仔餅不停咬，看著他將牙仔餅咬到缺了一角仔艾菲還高興得拍起片來，然後忽然之間牙仔餅斷開了一段，當時艾菲都懷疑燒腩仔能否吞下，但望一望他的咀巴已經空空如也，那麼應該沒問題啦，怎料不夠十秒之後，他即谷到面紅紅想哭的模樣﹗

婆婆見到他這個樣即說他大概是被餅碎「續親」，叫艾菲拍拍他的背脊或者給他水，艾菲還未來得及反應，燒腩仔的樣已經變得超辛苦，原來不是「續親」是「哽親」才真﹗懂急救的公公即超緊張地將燒腩仔抱起反轉，先拍背脊再扣喉幫他取出卡在喉嚨那塊被他咬斷的牙仔餅，那塊餅碎足有一隻拇指頭般大，拿起來還是超硬的﹗﹗﹗

吐出牙仔餅後燒腩仔當然立即無事，而艾菲就不停被公公怪責，說艾菲亂來不應隨便給燒腩仔食餅，婆婆就說以後都不要再給燒腩仔食這款牙仔餅（下刪幾百字）...在老人家和燒腩仔面前，艾菲當然要表現震定，但內心其實都超級驚，幸好當時公公反應快，否則有甚麼下場艾菲實在不敢想像﹗

事後冷靜下來，艾菲思前想後，至今仍然不明白，那麼硬的牙仔餅，怎麼會給燒腩仔咬斷（佢只係個六個幾月大嘅無牙BB喎）？如果是因為口水浸軟了餅身而斷的話，怎麼中間還是那麼硬呢？那是否設計上出現了甚麼問題呢？為安全計艾菲都應該不會再讓燒腩仔吃這款牙仔餅，而有買這款牙仔餅給BB吃的媽媽都記得要注意安全呀﹗

BB展免費門票

昨天開facebook，見新城電台正在推廣5月17日至19日舉行的百家寶BB展，只要like新城的facebook，再share這個活動，然後到指定網址登記，便可以得到一套門票4張和一本優惠小冊子。

有著數，艾菲當然無執輸，昨晚登記今天便收到email（艾菲用咗兩個email登記，但暫時只係會員登記個email先收到飛），屆時只需拿著列印電郵到場領取門票即可。

雖然上年去過都知沒太多東西逛，但勝在不太多人可以帶燒腩仔同行，難得米高這幾天都不用上班，那麼當作一個weekend家庭活動都好呀﹗

固體食物進度

轉眼間燒腩仔已經食了個多月固體食物，因為艾菲隔兩至三天便給燒腩仔試新食物，所以短短一個月他已經試了不同種類的蔬果，生果類有士多啤梨、蘋果、雪梨、啤梨、香蕉、奇異果和堤子，至於蔬菜類就有冬瓜、紅蘿蔔、菜心、小棠菜、青豆、蕃薯、薯仔、蕃茄、南瓜和粟米，基本上艾菲給他甚麼都吃，沒太大喜惡的反應，只是對菜心不太熱衷，以及食紅蘿蔔和蕃茄的反應比較好。

燒腩仔之前一直食糊仔，食過Holle、Healthy Times和雀巢，因為燒腩仔喜歡杰身的食物，所以食Heathly Times的反應麻麻，艾菲本身都不太喜歡它太稀很難餵，所以吃了一盒便無下次，至於Holle便是艾菲和燒腩仔至愛，開出來較杰身又易餵，雀巢則開出來比較黏但仍算易餵，是Holle沒減價時的次選，因為之前收到雀巢送的$5 coupon，所以都買了罐在家旁身。

燒腩仔初食米糊時，艾菲其實一直搞不清該怎樣替他減奶，但見健康院的書仔說不要一下子減，所以起初都照開奶，不過隨著米糊的份量越來越多，燒腩仔飲奶的份量卻天天不同，有時全枝飲清光有時又飲剩兩安，明顯他根本不知飽為何物，為免他食滯只好自行減奶，用了個多星期的時間，每隔兩天便一安一安的減，直至一天不給他飲奶他又OK，那麼便成功取代一餐奶。

而在這個逐漸減奶的過程亦曾經鬧過一個笑話，因為當時要不停測試燒腩仔這餐固體食物的份量，所以艾菲每天都加兩三茶匙米糊粉，直至有天艾菲加到20匙他都像不飽般會拍枱叫食（當時咁啱食緊heatlhy times，可能太水唔飽肚），但到下一餐夠鐘飲奶卻完全不肚餓，自此之後艾菲便開始減份量，現在他一餐大概食12茶匙米糊粉（如果食澱粉質重嘅食物，好似蕃薯同薯仔呢D就會減兩三匙），就算沒心機吃都一定在半小時內全部掃清光。

隨著燒腩仔踏入六個月，艾菲亦開始讓他食肉，兩個星期內已經試過雞肉、豬肉和魚（健康院姑娘話蛋白同牛肉呢D易敏感嘅食物要等夠十個月大先試），見他食得不錯便開始煲粥給他吃，不過因為他吃太稀的食物會吐出來很難餵，所以粥一定要煲到超杰身才行（最好係一滴水都無），要餵粥的那天艾菲便會在朝早九點起床餵第一餐奶時用之前買的象印保溫壼焗粥（基本上係艾菲得閒就煲粥，如果比較忙就食糊仔算），到十一點左右米已變潮州粥，再開火加入肉和蔬菜煲半小時左右已經變成超綿超杰的粥仔（如果青菜我會另外加熱，到臨食先撈落去，怕一齊煲會有菜青味）。

自去完健康院，姑娘說燒腩仔可以再減一餐奶，艾菲便立即替燒腩仔轉一天吃兩餐固體食物，暫時試了幾天情況尚算理想，唯一是艾菲要準備多點食物給燒腩仔，亦要安排晚餐的煮飯時間不要相撞，為了節省時間方便自己，艾菲一直都是一次煮幾天份量，先用電飯煲將食物蒸熟（貪佢唔使睇火），再用上面的攪拌機將食物打成蓉，再放進田鼠媽推介的$12店矽膠冰模內雪藏，到要食之前便推一粒出來放暖奶器翻熱，或直接放粥仔內煲即可（一粒啱啱好係一餐份量）。

其實燒腩仔未出世，艾菲已經決定買這部攪拌機，因為舊的那部太大funcion又少，這部夠細放在細小的廚房也不阻地方，又可以磨蓉、搾汁和磨粉，就算燒腩仔的食物日後不再需要磨蓉，艾菲平日煮飯都有機會用到（之前整芒果布甸時用過來榨汁，整薯仔沙律時又用過佢來整洋葱蓉，之後想整豆漿都可以用佢打爛D豆），最重要是用攪拌機真是「快、靚、正」，食物放進去幾秒即變蓉，最適合艾菲這種每朝要爭分奪秒準備食物的媽媽。

由於艾菲自問是個頂級懶媽媽，所以用攪拌機打完蓉之後一般不會再檢查過篩，只是憑肉眼看不算太過份就可以，即使有皮有渣都照餵燒腩仔（當然係指好細粒嘅皮同渣啦），就當作是訓練他咀嚼食物，而他亦對此相當受落，邊食邊「妹」很是滋味的模樣，嘻...艾菲總認為每個獨立小朋友背後總需要一個懶惰媽媽﹗

而每次外出用膳時，艾菲都一定會帶定之前淘回來的totseat，因為燒腩仔現在仍未坐得穩，就算餐廳有BB椅也有機會向前傾，但加了totseat後他便可以解決這個安全問題，至於回娘家時燒腩仔便會用Ice媽媽送的Fisher Price寶寶小餐椅，讓他有屬於自己的坐位。由於小朋友的耐性有限，很難要求他像大人般乖乖坐一小時聽我們吹水，所以方便的話艾菲便會帶果蓉餵他吃（等佢有多D參與感，覺得自己同大人一齊食嘢），如果不方便餵艾菲便會出動咬咬樂，給他拿著慢慢啜，到最後真是忍不住要發難時才抱他，這樣一來艾菲便可以爭取到十五至二十分鐘用膳時間了。

第一次發燒

燒腩仔滿六個月，又是時候到健康院做檢查和打針，指定動作都是磅重，見姑娘和打針。

除了第一個月要脫光光磅重那次曾向姑娘開水槍外，之後每次燒腩仔都相當合作，今次磅重有7.84kg，仍然保持在成長線50的位置。雖然燒腩仔擁有肥美的肚腩和大脾，但自從他成功以一餐固體食物代替一餐奶，以及開始勤力練習爬之後，肚腩和大脾都有明顯縮水的跡象，幸好體重的增長幅度沒有忽然下降，艾菲才得以放下心頭大石。

接著便到見姑娘的時間，因為滿六個月要做發展檢查，所以姑娘除了像平日般問燒腩仔飲奶和進食固體食物的進度之外，也特別拿玩具出來測試燒腩仔會否用手去取，又讓他試坐一會兒，並測試他能否在扶著時用雙腳站立，結果這個在家無時停的燒腩仔，當然是樣樣皆能全部pass不用艾菲太擔心啦﹗

最後便到打針時間，因為我們沒有join plan打針，所以燒腩仔今次要一次過打三針，姑娘叫名時米高還搶著抱燒腩仔過去，還以為他這麼勇肯抱著燒腩仔打針，最後這些壞人角色當然是由媽媽來做啦﹗打三針艾菲基本上一點也不心痛（燒腩仔嫲嫲一聽到要一次過打三針不停話健康院痴線，怪我哋做咩唔畀錢去私家打，但打針都係為佢好，痛都係一陣之嘛），唯一怕只是自己抱不穩燒腩仔害姑娘打不到或者弄斷針而已。

之前打兩針，姑娘是分別在燒腩仔兩邊大脾各打一針，今次打三針，艾菲一直很好奇姑娘打的次序是怎樣，還以為姑娘會先打兩邊再打回第一針那邊，最後艾菲發現姑娘們大概都計過數，姑娘首先如常打其中一邊大脾，燒腩仔當時仍然能夠保持冷靜，只是喊了兩聲便即時收聲，到轉身快手在另一邊大脾打第二針時，燒腩仔已哭出兩行眼淚開始失控，這時姑娘便休息一會兒準備第三針，亦讓我們先安撫一下燒腩仔，這個時候原來已經沒可能轉身打另一邊，到他稍為收聲之後即打第三針，燒腩仔已經由普通的哭變成發脾氣鬧人的哭聲，那一刻艾菲是不禁大笑起來（其實我發現自己都幾變態），而燒腩仔打針後不消五分鐘即收聲兼進入睡眠mode。

艾菲之前聽過媽媽級朋友說小朋友打針前可以飲甘筍粟米竹蔗水，說這可以減低發燒的機會，艾菲一度想過煲給燒腩仔飲，但燒腩仔到目前為止仍未食過粟米，而且要特別到街市買料，後來艾菲搜集資料時發現有媽媽說蘋果雪梨水同樣work，既然燒腩仔已經食過蘋果和雪梨，而且這兩樣食物的性質都較溫和，滋潤得來又可以清熱，所以便轉煲這個，打針前兩天開始給燒腩仔飲，每天飲兩安的份量，直至打針後回家也繼續飲，煲過的雪梨則給他作果蓉食。

回家後燒腩仔只是有點疲累，體溫一直保持正常，艾菲還以為自己的湯水策略有效，怎料燒腩仔卻在晚上九時多發起燒來，37.9的體溫不算太高，立即跟他抹身，貼退熱貼和餵退燒藥，繼而他便像忽然無電般睡著了，睡醒一覺後燒已經立即退掉（只係瞓咗半個鐘），健康院的退燒藥果然有效，不過就讓艾菲發現健康院給的針筒原來比藥水樽的樽口粗，根本插不進藥水樽內吸藥水，幸好艾菲有留起上次看醫生的幼針筒，否則要倒出來再用針筒餵便會超麻煩了﹗

燒腩用品~食飯口水肩篇

燒腩仔自五個多月開始食固體食物，雖然他的進度都算理想，但畢竟是個小朋友，開餐完全沒儀態可言，有時會出「摛拿手」搶艾菲手上的碗仔，有時會邊食糊仔邊食手指（-->跟住D糊仔就會由佢個口去咗佢隻手-->再周圍摸就會周圍飛），食到不耐煩時更會捽頭捽面（-->佢一出呢招，手指上嘅糊仔即刻上晒頭髮），每次食完一定要替剛洗完澡的他作全身清潔，有時連衣服都要換一套新，所以一個好的食飯口水肩對艾菲來說實在是超重要﹗

經過一輪研究和測試之後，艾菲發現市面上的食飯口水肩都各有優點缺點，而燒腩仔現在使用的口水肩大致可以分為四款，第一款是像普通棉質口水肩般（麵包超人那條），但後面有一層防水料，（淘寶幾蚊貨仔，本來要黃色但發錯貨畀咗粉紅色），這款在餵食生果等多汁的食物時最有用，因為漏出來的汁可以即時吸乾，但缺點是清潔比較麻煩，每次餵食完畢要即時清潔否則會有印，清潔後又要吹乾才可以再用，出街會比較不方便。

第二款便是衫仔款（米奇和維尼），使用時要像穿衣服般穿上身，質地是防水料會冼水，（同樣係淘寶幾蚊貨仔，跟IKEA那個同款，size都頗大，估計兩三歲都啱著）這款口水肩暫時是艾菲至愛，因為可以給燒腩仔最全面的保護，連衫袖都不怕被弄污，免卻換衫的煩惱，但大一點可以自己食時，下面的飯兜則未必接得住掉下的飯餸，有可能會弄污褲仔鞋仔，用後最好即時清潔，但防水料都可以用濕紙巾清潔就算，出街用都可以。

第三款便是上面這款購自AEON $12店的輕身膠口水肩，因為夠輕身的原故，燒腩仔現在已經可以用，後面有個飯兜可以反出來用接著飯餸，而且膠的質地亦令掉下的糊仔不會貼著口水肩，所以清潔非常方便，不過餵食多汁的食物時便要特別留意，餸汁很快便會冼下來，而且圖案一洗即花，但帶出街用都頗OK。

最後一款便是上面兩個飯兜款（左邊個Monkey係路過藍田買嘅淘寶貨，承惠23大元，右邊嘅TT係AEON BB展時買嘅，同樣廿幾蚊一個），這款口水肩相對會較重，對小B來說不太適合，但當他長大後懂得自己食飯就應該很有用，因為下面的兜位可以裝著掉下來的飯，而且右邊那個是全膠質兼可以捲起方便清潔和收藏。

兒童戶口

菲爸菲媽自少便替艾菲三兄妹開了銀行戶口，將每年的利是錢全數儲起，雖然數目不算多但總算成功令艾菲養成儲蓄的習慣，直至艾菲滿16歲他們才將銀行戶口交回艾菲自行管理，而艾菲就立即以為自己是富婆般不停喪買，不消一會兒便將戶口內五位數字的存款全部花光，現在回想起來如果自己想當年節檢一點，大概現在都可以有多個錢旁身（至少讀U時不用捱窮喪做part time），不過都因為這次的經驗讓艾菲知道花錢一定要有節制，有錢都不要隨便亂花要盡量儲起以備不時之需。

燒腩仔去年出世和百日宴時收到了不少親友的利是，當時艾菲已經決定要替他開個戶口將利是錢儲起，以防艾菲再次「有錢便身痕」，亦想燒腩仔養成儲錢的習慣，將來長大以後有個錢旁身，只是當時已經接近年尾，艾菲便索性等到農暦新年後才action，貪銀行多數在農暦年後promote兒童戶口優惠會較多，而錢就暫時由米高負責保管（咁樣感覺上安全D）。

直至農暦十五拆利是之後，艾菲便四出搜尋各銀行開兒童戶口的優惠，最後發現基本上是沒那間的優惠特別吸引，曾經一度想過將錢用來買金粒代替放銀行，但米高又不太情願，所以最後維持原判開戶口，而千挑萬選後便選定了建設銀行，除了有$50麥當勞現金券送之外，還可以每年免費為燒腩仔做一張有個人照片的查數卡，至少都叫做有點紀念價值嘛。

艾菲拖拖拉拉的拖到三月中才去開戶口（雖然銀行就在樓下，但一個人湊著燒腩仔，就總是有十萬個理由不方便去囉），不過開戶取得密碼後就九秒九回家替燒腩仔影了一輯新相，再極速將相片upload上網做查數卡，然後不消一星期便收到查數卡的實物了﹗

開戶口的三寶，存摺，立體貼紙（原本話派晒無，不過職員見艾菲特登問就話有貨叫艾菲去拎，其實都幾娘爆，不過可以留返燒腩仔大D畀佢玩），和個人相片查數卡，不過製成品的相片顏色比網上試玩版暗，所以都有丁點失望，但沒辦法啦，唯有下年轉相時小心點選相片囉﹗

溫泉蛋雞絲胡麻掛烏冬

之前在朋友家打邊爐吃過烏冬後便一直念念不忘（其實都只係普通急凍讚歧烏冬，不過係太耐無食所以覺得好正），想自己煮又懶得買料買湯汁，結果星期日晚路過自家烏冬便打算去止癮，很久之前已經食過一次覺得很普通，今次再食簡直是超失望，艾菲叫的是溫泉蛋雞絲胡麻掛烏冬，溫泉蛋的蛋黃幾乎是實心完全沒蛋汁流出，最要命是烏冬居然是韌丁點也不彈﹗

一怒之下艾菲即時揚言要自行回家煮個翻版出來（因為真係無難度），米高聽到之後立即大表支持（明顯係因為佢想食溫泉蛋），更替艾菲買日本蛋和急凍讚歧烏冬回來，然後艾菲在廚房搞了不足一小時，一碟比自家烏冬好味十倍的溫泉蛋雞絲胡麻掛烏冬便面世（相對於正版只係差伴碟嘅芝麻同天婦羅脆粒）﹗

米高是超喜歡吃溫泉蛋的，不過艾菲就一直覺得麻煩沒有煮過，今次都一度想買7-11溫泉蛋了事（都不過$9.9一隻，其實計落都幾抵），後來上網找到個超簡單和聲稱一定成功的食譜，結果又真是讓艾菲第一次做便成功，所以為免日後忘記要立即記低﹗

材料：
日本蛋            2隻
急凍雞枊         4條
青瓜                1條
讚歧烏冬         2個
日式芝麻醬     適量

1. 青瓜洗淨切絲放雪櫃備用
2. 雞柳解凍洗淨後用少許鹽醃15分鐘，然後蒸熟撕成雞絲放雪櫃備用
3. 煲熱水至75度左右，將水和蛋放保溫瓶浸30分鐘備用（我用咗之前買來準備畀燒腩仔食粥仔用個象印保溫壼）
4. 煲滾水將烏冬煮熟，然後將鳥冬放冰水降溫（一定唔可以放雪櫃降溫，因為放雪櫃會令麵條痴埋）
5. 先放烏冬上碟，再放青瓜絲和雞絲，下日式芝麻醬（按自己口味決定多少），最後放上溫泉蛋即可

六個月

嘩﹗發生咩事呀？爸爸媽媽今朝一起身就同我講生日快樂，仲專登拎咗兩件蛋糕返來同我慶祝（實情係艾菲同米高剩機去拎蛋糕食）﹗乜我咁快就半歲啦？係唔係真㗎？我仲係BB來㗎喎﹗

呢個月我嘅最大改變就係開始咗食固體食物，奶量就keep住5.5安無增長（只係食剩嘅次數減少咗，其實有無需要加㗎？），而媽媽就幫我轉咗個新schedule，宜家我每日九點半先起身食第一餐奶，跟住玩一陣就會瞓返，之後十二點起身沖涼同食糊仔，抖半個鐘就食果蓉，兩點前一定會瞓第一次晏覺，呢一覺我開始瞓少D，大約一個鐘左右就會起身玩，然後四點半食完奶五點半就一直瞓到七點半爸爸放工返來先肯起身，大人食完飯就輪到我食八點半餐奶，呢餐奶之後媽媽只會畀我瞓半個鐘就叫醒我，到十一點半我就會飲最後一餐奶然後乖乖地去瞓。

至於食固體食物方面，我食咗個幾星期糊仔就可以代到一餐完全唔需要補奶啦，初初我都唔識飽㗎，媽媽開幾多奶畀我都掃晒，搞到下一餐奶唔願食，咁媽媽就唯有逐少逐少咁同我減奶，到忽然有一日佢唔再畀奶我飲我又OK喎，咁就開始每日飲少一餐奶啦﹗短短三星期我已經試咗好多嘢食（艾菲係無跟足每樣食物試三、四日先試新嘢嘅法則，大概兩日左右我就會畀一樣新嘢佢食），全部都係生果同瓜菜（食咗咩之後會開一篇講），媽媽話我足六個月就可以開始食肉，食得好就會煲粥仔我食，再之後就要一日食兩餐固體食物，嘩﹗好似好正咁喎﹗

吖﹗仲有呀﹗我呢個月最大嘅進步就係學識咗反身啦﹗我宜家唔使一秒就可以反到身扒係playmat到，尤其係媽媽同我換片時，佢一除咗條片我就好自然反轉身想走佬，搞到佢要用暴力將我反返轉先可以著返條片﹗（艾菲：）係playmat到滾來滾去亦已經變得無難度，爸爸媽媽仲成日話我出界夾硬捉返我入playmat添，但爬就只係識得向後爬，發極力都係向唔到前囉...

由於我未夠五個月大已經成功爆睡袋而出，再加上我學識反身之後硬係要圍住張床碌來碌去搞一大輪先肯攬住個床圍瞓（右下圖），就算媽媽會等我瞓著時將我反返正，但我都會瞓瞓吓又突然半夜扒咗係到，搞到媽媽大叫無覺好瞓兼頭痛，然後佢係小檬媽嘅啟發下，決定去搜尋一D全拉鏈無啪鈕嘅睡袋畀我著住瞓，結果我就從此被困，乖乖就範每晚扭一陣就會正正經經咁打平瞓。

除咗繼續喪流口水，狂啜手指同乜都塞落口試味之外，我最近唔使人抱住都可以自己坐到半分鐘（因為又要驚佢跌，佢本身又郁來郁去，所以暫時影唔到相），同埋已經唔滿足於只係坐係到，成日扭計要大人抱住畀我企同學大人行（佢對腳真係勁有力），最鐘意有人同我玩up and down同swing。

至於認人方面，我暫時都只會係見到陌生人時皺吓眉頭，唔鐘意都唔會喊只會keep住皺眉頭，但都可以畀佢抱一陣嘅，見到爸爸媽媽當然會笑，但只要有人同我玩，我唔使佢哋係到都OK（第時佢識行識走艾菲都要睇緊D佢先掂，佢咁嘅款應該好容易畀人拐咗去）。

雖然我好似都幾乖，但媽媽就話我呢個月扭計咗好多，因為宜家一無人理我就會喪喊投訴，搞到媽媽一路做家務都要keep住同我玩peekaboo先掂，而且有時瞓醒晏覺我會合埋眼發狂喪喊，要爸爸媽媽攬住呵我一陣先肯收聲，媽媽話我半夜有時都會瞓瞓吓係到喊要佢拍吓我先收聲，佢跟住就會襯朝早飲奶時問我係唔係發惡夢，嘻...都過咗咁多個鐘我仲邊記得喎﹗