與草同行＠迪欣湖

復活節轉眼就到，難得米高有假放當然把握時間，又帶燒腩仔去公園玩啦，而今次目的地是迪欣湖。

第一天假期，雖然沒下出雨，但整天都是天陰陰，以為會沒甚麼人，結果五點到仍要等位泊車（如果天氣好肯定仲多人）﹗迪欣湖不算大，但勝在環境優美，多年前跟米高拍拖曾到此一遊，圍著湖邊漫步都可以行上個多小時，除了路邊的草地可以任坐之外，還可以踩單車和坐船仔，唯一缺點是沒有育嬰房，我們想替燒腩仔換片，工作人員教我們用家庭洗手間，但內裡其實跟傷殘人士洗手間沒分別，連換片的設施都沒有。

今次帶著燒腩仔同行，我們沒有圍著湖邊散步，反而艾菲帶了張地墊，想讓燒腩仔接觸一下大自然，讓他在草地上爬行，感受一下軟綿綿的草地，而燒腩仔都好像很喜歡，不停在草地努力地試爬（佢暫時仲未識向前爬，每次一發力都會變咗向後爬囉），還主動伸手去拾地上的草呢﹗



我們在迪欣湖逗留了一小時左右便離開，離開前米高更特別抱燒腩仔到鐵路旁看迪士尼列車，燒腩仔當然未識甚麼是迪士尼啦，但就望著快來快去的列車發呆，哈哈...你大個識行識走之後才帶你坐啦﹗

離開迪欣湖之後我們順路去了東薈城行outlet，米高和艾菲以前不時都會去閒逛，貪這裡沒太多人又有food court方便開餐，但這次重臨感覺是超差，幾乎行到那裡都是內地人，而重點是他們真是超沒禮貌和不雅囉﹗商場通道明明很闊很大，米高推著BB車艾菲在旁並肩行，居然有個內地女人可以推著BB車撞過來，害得艾菲幾乎仆低還可以直行直過﹗而在PUMA outlet內就見到個大約八、九歲，身穿米妮裙的女孩，拿起裙伸手入襪褲內「R pat pat」，而跟她在一起的兩個內地女人就霸了整條通道試鞋囉﹗

滑嘟嘟芒果布甸

因為燒腩仔最近開始食固體食物，連帶艾菲都勤力做起「煮飯婆」來，某天路過水果檔見有芒果賣，$12四個又香又甜，想起都是食芒果的時候了（以前明明係七至九月先係食芒果最好嘅時候，唔知由幾時開始變咗四至六月），於是便買了回來做芒果布甸。

雖然芒果濕熱好像不太健康，但艾菲和米高都是芒果怪（越唔健康嘅嘢通常越好食），而且芒果布甸實在超易做，自已整喜歡用多少芒果都可以，總比街買的假芒果布甸（只得味無芒果）抵和好味呀﹗

整了多年芒果布甸，大概都知道竅門，今次再在亂打亂撞下找到一個新食譜，自我鑽研調節一番後，決定原用不加蛋和淡忌廉的造法（一般食譜多數有生蛋同用花奶，但生蛋易有菌唔建議用，而用淡忌廉代替花奶就會令質感滑D），再參考食譜加入自製芒果汁，除了滑嘟嘟口感之外，還增添了濃濃芒果香味，GOOD呀﹗

材料：
羅拔臣啫喱粉            1盒（90g）
熱水                          250ml
淡忌廉                      250ml
芒果（細）               3個

芒果汁：
芒果                           半杯
水                               2湯匙
（原食譜有煉奶和砂糖，但艾菲覺得夠甜的話唔落會健康D）

造法：

1. 將芒果汁材料放攪拌機攪勻備用
2. 將芒果切粒放啫喱杯備用
3. 啫喱粉加熱水拌勻
4. 待啫喱水放涼後加淡忌廉拌勻
5. 芒果汁隔渣後加進啫喱水拌勻
6. 將啫喱水倒進啫喱杯（如果想質感再滑D可以過一次篩先落杯）
7. 放雪櫃30分鐘雪凍即成

燒腩用品~戰車篇

剛有了燒腩仔不久，Ice媽媽便送了一輛二手Combi Well Carry BB車給我們，艾菲於是一心打算省回買車的金錢兼完全沒研究過這個item，直至燒腩仔快將出世艾菲才將BB車拿出來清潔，雖然只用了一年但畢竟是二手總是有些戰跡，米高見狀即豪氣地說「不如買過架」（買playmat又唔見佢咁豪），雖然艾菲都知「阿媽係女人」的道理，新車一定比二手車好，但一輛BB車再便宜也要二、三千元呀，慳媽艾菲當然捨不得花錢買新車，於是便落手落腳將BB車洗乾淨給燒腩仔用。

直至燒腩仔滿月過後，艾菲和燒腩仔終於可以出關（其實未滿月都有出去，但就只係手抱），BB車亦是時候出動，不過燒腩仔就好像不太喜歡坐，只要他醒來發現自己在BB車中定必喪喊，所以除非我們外出時他睡足全程，否則一定是人有人抱車有車行，當時艾菲還以為是燒腩仔尚未適應，所以盡可能都由燒腩仔在車中哭訓練他，直至換車以後才知他原來嫌車身窄（因為換新車之後佢勁like，一坐上車就會笑唔會再喪扭）。

艾菲其實一直沒有換車的打算，怎料2012年12月31日當晚我們外出時卻發現左前轆彎了似要掉出來的摸樣，見到這個情況艾菲立即致電Ice媽媽問意見，她建議我們去維修，但艾菲上網search過有關資料，換轆價錢不貴但要等幾星期，而且要自行拿到粉嶺維修或到百貨公司代送（要收返運費），當時碰巧艾菲的産假快要結束，米高又不想花油錢車BB車到粉嶺維修，於是便又再一次提出買輛新車給燒腩仔的建議，他不停遊說艾菲說反正BB車的cost從一開始已是零，現在棄舊車買輛新的也沒損失喎...

於是2013年第一天的節目便是四出去看BB車，站於媽媽的角度，以及身型極矮小的艾菲的實際需要，要方便艾菲單拖帶BB出街，BB車當然不能太重，最好可以兩面推讓BB望到媽媽，能夠單手收車都是一個關鍵，所以艾菲一直主力看輕身車，例如Aprica和Graco的輕身車，但研究一輪以後發現太窄和有點不穩，平衡各樣需要之後一度打算買Combi Urban Walker Sporty，只是又買Combi便跟舊車沒分別這點讓艾菲有點猶豫，而米高就在這個時候終於發表他的偉論，說艾菲出入都有他車出車入，基本上不用太介意BB車的重量和收車的問題（well...事實根本唔係佢所講咁，而根據佢講法即佢唔係屋企艾菲唔使同燒腩仔出街），原來他想買座位較闊感覺較穩陣的車，例如Peg-Perego的P3。

經過一輪爭拗之後我們各自退一步再重新研究，好不容易終於讓我們發現一部能夠符合我倆大部分要求的BB車，就是Peg-Perego Pliko Mini，不算太重連艾菲都可以單手收車，收車後如士的車般直立式設計方便收藏，車身較Combi闊燒腩仔可以坐得舒服一點，用料感覺夠實淨，推起來也很順暢（感覺好似好推過Well Carry，但就一定要雙手推囉），價錢又跟Combi差不多，而最重要一點當然是燒腩仔試坐時已經會笑，第一次坐新車更是全程笑著口啦﹗

跟車沒有扶手，因燒腩仔只得幾個月人仔，為安全起見我們都加買了（但收車時一定要拆扶手），另外艾菲再上淘寶淘了個勁fit size的坐墊連睡袋，正好解決燒腩仔踢被的問題，到現在開始回暖便可以將睡袋拆出來，再在Ice媽媽推介下淘了個防UV遮光罩，大太陽時可以擋太陽，燒腩仔睡著了時可以整個拉下讓他安靜地睡，實在是Very Good﹗

食糊

早於燒腩仔三個月大開始，艾菲便開始搜集有關嬰兒食固體食物的資訊，又四出問朋友有關意見，到底那一款米糊比較好呢？有朋友說無所謂，那款特價她便給小朋友食那款，有些媽媽又說有機的會比較安全，然後某天在龍媽媽blog中發現只要加入Holle媽媽會便有米糊sample送，艾菲當然立即取了兩包，再順道還取了美素佳兒的米糊食譜來研究研究啦﹗

之前打四個月針時，健康院派了三本有關嬰兒轉食固體食物的小冊子，艾菲很認真地用一晚時間將它們全部讀完，更拉著米高一起看隨書附送的兩隻DVD，終於對嬰兒轉食固體食物的過程有了些概念，之後便襯Aeon BB展掃了大堆食具和相關產品，所有東西都ready就等燒腩仔一個，只要他OK我們便可以開始試食固體食物﹗

見燒腩仔食士多啤蓉食得如此高興，艾菲和米高都覺得是時候讓他開始正式食米糊，第一次給燒腩仔食米糊艾菲用了Holle的sample，根據眾多媽媽的意見都說開米糊是憑感覺，所以艾菲只是隨便倒入1
1/2茶匙米糊，加1/4茶匙奶粉（因為唔想浪費燒腩仔飲開嘅奶粉，所以艾菲用咗美素佳兒送嘅2號sample），然後加少量熱水至米糊狀便算。

第一次食米糊的燒腩仔竟然很喜歡吃，還懂得追著吃呢﹗吃了大概一湯匙米糊之後艾菲如常開奶給他飲，結果平日飲5.5安的他飲剩了80ml，到下一餐又可以如常飲奶，看來燒腩仔應該會很快適應食米糊，如無意外的話過幾天便可以讓他試食瓜菜蓉了﹗

第一口固體食物

自燒腩仔四個半月開始，艾菲和米高在家晚飯時，盡可能都會放燒腩仔在high chair跟我們一起吃，初時他勁無耐性總會發脾氣，慢慢隨著我們會邊吃飯變拿著筷子扮餵他吃，他開始對我們的食物表示有興趣，有時更會望著我們的餸菜流口水。

見燒腩仔開始對食物表示有興趣，艾菲曾經試過給他吃麵包，他立即笑到嘻嘻聲，但就因為不懂吞進去而吐出來，後來又試過給他丁點蘋果蓉，他都只是吞到少量，所以我們一直以為他仍然未ready。

直至今個weekend，好友米雪買了大大盒長柄士多啤梨來探我們，紅噹噹的士多啤梨當然吸引到燒腩仔的視線，我們吃時他更是眼定定望著，於是艾菲便忍不住將咬開了的士多啤梨給他啜，他竟然很認真地啜起上來，更懂得如大人吃東西般開合嘴巴，所以艾菲便立即切了一角士多啤梨磨成蓉給他吃，結果燒腩仔是成功將全部士多啤梨蓉食進肚﹗

看健康院的書教，小朋友食固體食物應該由較軟身和淡味的食物開始，怕他們吃慣濃味的食物不肯食啖味食物，艾菲還一直盤算著應該何時正式給燒腩仔吃米糊，實在萬萬沒想到燒腩仔的第一口固體食物居然是士多啤梨﹗﹗﹗還要是勁喜歡的模樣，就算酸到皺眉頭都一啖一啖食落口，那個樣實在是太太太可愛了（大家請原諒我呢個阿媽實在太愛自己個仔所以先會咁講）﹗

牛奶雪糕

話說有一日，米高放工回家時跟艾菲說：「嘩﹗我今日食咗Movenpick嘅士多啤梨雪糕，勁難食呀﹗」然後艾菲是冷淡地回應：「哦，咁下次食Haagen-dazs咪得囉﹗」於是米高終於忍不住說：「我都係覺得你整嘅最好味﹗」艾菲始終於一的冷淡地說：「咁你得閒買料返來咪整囉﹗」

Well...艾菲經常炮製不同食物，但這些年來，就只有這個士多啤梨雪糕，米高會主動叫艾菲整給他吃，不過因為上年有了燒腩仔要戒食生冷食物，所以雪糕機都順理成章地被打進冷宮，事隔一年雪糕機終於可以再次出山，但無理由又是士多啤梨雪糕和雲呢拿味雪糕這麼悶的嘛，所以艾菲決定試試新味道。

拿著《我愛冰淇淋》一書不停鑽研，款款都好像很好味，艾菲想整綠茶味又明知米高不會吃，想整芝麻味但芝麻醬好像不便宜，後來艾菲留意到一款叫香濃牛奶香草冰淇淋好像勁吸引，平日米高經過City Super都總愛吃杯牛奶雪糕才安樂（但人哋明明出名食綠茶雪糕架喎﹗），如果艾菲鑽研到他應該會喜歡，不過就對食譜中的「無糖煉乳」毫無頭緒。

米高聽到煉乳這個term，即打算叫艾菲買雪印的煉乳（佢呢個自稱日本人，每次整雪糕都指明要我用北海道3.6牛奶話會香D喎﹗初初有咗燒腩仔仲逼我日日飲一杯搞到我體重急升添呀﹗），不過艾菲上網search了一大輪，發現煉奶即濃縮牛奶加糖，而淡奶正正就是濃縮牛奶，那麼無糖煉乳就即是淡奶啦，所以艾菲便買了罐三花淡奶回來試。

這款雪糕無需加蛋所以不用加熱，只需將淡忌廉，糖和淡奶攪勻雪凍即可落雪糕機（因為唔想變雲呢拿味所以無跟食譜落香草），只是艾菲太心急雪糕機未雪夠時間就開機，結果當然是攪不出雪糕，幸好轉用無雪糕機做法，用打蛋器打一次便成功變雪糕，雪了一晚之後立即試食，味道和日本的牛奶雪糕沒多大分別（只是偏甜），和士多啤梨一起吃更成為絕配，下次艾菲會試試減糖直接用煉奶整，希望味道會更像日本的牛奶雪糕啦﹗

三文魚扒Risotto

回家做FTM一個多月，初時艾菲叫米高要給時間艾菲慢慢適應（即叫佢唔好對我期望咁高住），但勁不喜歡返工的艾菲其實很快已經習慣新生活，除了日常照顧燒腩仔和打理家務外，亦終於有閒情重拾入廚的樂趣，除了日常的standard飯餸，間中都會試試新意思，今日便心血來潮用家裡的存貨泡製了這個三文魚扒Risotto。

其實艾菲是個喜歡入廚但勁不喜歡到街市的人，之前大肚可以推米高幫艾菲買餸，但現在做FTM就沒藉口了，不過今天因為想煮飯又沒時間去買餸，所以便在家中找存貨，碰巧家中沒蒜頭又沒蛋，很多想煮的菜式都煮不到，後來忽然醒起家裡有包煮了一次之後放了很久都沒再動過的意大利米，所以便拿了出來想將它KO。

開了的意大利米一直放在廚櫃的原因是之前那次煮出來的效果讓艾菲不太滿意，而且感覺上煮Risotto所花時間很長兼要長時間看火，艾菲完全沒時間分身監察燒腩仔不太方便（艾菲宜家煮親飯都係揀D蒸，或者好快可以炒完嘅餸來煮，方便艾菲煮煮吓飯走返出廳望吓燒腩仔搞緊乜嘛），但今次再上網參考別人的食譜，發現一般只需用二十分鐘已經可以煮好，秘訣原來是一煲微暖的雞湯（艾菲上次好豬咁用咗係雪櫃拎出來嘅雞湯）﹗

試過一次不太理想的效果之後，今次艾菲加倍小心去煮，結果終於讓艾菲成功煮出這個軟硬度適中，連米高都很滿意的三文魚扒Risotto（佢偏向鐘意食乾身飯），GOOD！ GOOD！ GOOD！所以一定要盡快記低食譜，否則艾菲下次很快就會忘記﹗

材料：
三文魚扒                   2塊
意大利米                   2人份量
粟米                          一杯
蒜鹽                          少許
黑糊椒                      少許
雞湯                          1 1/2杯
Parmesan Cheese    2湯匙
牛油                           2湯匙

造法：
1. 預熱焗爐
2. 三文魚扒洗淨抹乾，用蒜鹽和黑糊椒略醃，放焗爐焗至金黃色備用
3. 將雞湯煮至暖和備用
4. 下牛油略炒意大利米（如果鐘意可以係呢個時候落洋葱碎，不過艾菲屋企真係咁啱百無所以無落）
5. 下4湯匙雞湯，一直攪拌至意大利米完全吸收
6. 再下4湯匙雞湯，一直攪拌至意大利米完全吸收
7. 一直重覆step 6直至餘下少量雞湯（期間可以試味，如果意大利米未夠腍可以增加雞湯份量或者較細個火等D米吸湯嘅時間長D）
8. 下粟米及餘下雞湯，一直攪拌至意大利米完全吸收（如果煮其他料都係呢個時候加）
9. 熄火，加Parmesan Cheese襯熱攪勻即可上碟

轉眼兩年...

時間真是過得超快，特別是燒腩仔出世以後，轉眼間便是艾菲和米高結婚兩周年的日子。

這一年最大的轉變當然是二人世界增添了新成員，艾菲的身份由太太升呢為媽媽，亦因為燒腩仔的降臨令艾菲更欣賞米高，平日總是愛理不理丁點浪漫也沒有，但由之前的姐姐事件，到燒腩仔出世時緊急開刀，再到艾菲為餵母乳抗爭兩個多月，以及突然讓艾菲轉做全職媽媽，連同日常生活中照顧艾菲和燒腩仔的種種，都足以見證米高對艾菲的愛有多深，所以艾菲無以為報，唯有盡力做個好媽媽好太太，照顧好燒腩仔和我們的家，讓米高能夠專心工作無後顧之憂。

結婚當天，我倆一起到西九龍海濱長廊影相，去年我們陀著燒腩仔一起冒著寒風冷雨重遊舊地，今年天氣那麼好當然要帶燒腩仔一起去玩啦﹗聽聞西九快要起博物館，明年今日都不知道還有沒有機會帶他一起去懷緬當天的美好時光了﹗



艾菲真是很喜歡西九龍海濱長廊的日落﹗希望這個地方能夠繼續開放，不要被移為平地啦﹗

見燒腩仔望著其他小朋友玩的樣子勁興奮，艾菲和米高決定讓他也玩玩看，第一次玩韆鞦的他還笑到咔咔聲呢﹗做媽媽最開心莫過於見到自己的小朋友開開心心，你快樂所以我快樂嘛﹗

至於慶祝晚餐，艾菲和米高都勁無心思去plan，無良心的米高更一度意圖買料回家自製日式海鮮鍋呢（雖然佢聲稱會自己一手一腳搞掂，但艾菲深信最終都係要幫手執手尾﹗），幸好艾菲及時用無情調這個理由ban了他，然後三個人誤打誤撞下去了西貢一間叫Grande的餐廳，吃了一個很relax的晚餐（開餐時咁啱燒腩仔忽然無電瞓著咗，呵呵呵﹗），雖然我倆都沒有互送禮物，但能夠和艾菲人生中兩個最愛的男人一起食餐好，艾菲已經自覺很幸福了﹗

反啦﹗反啦﹗

就係我五個月零兩日嘅呢一晚，就係媽媽顧住同姨媽What's app笑緊我扭晒腰食手指就好似D人偷食唔畀人知咁嘅款時，我...燒腩仔終於反...反...反身成功啦...啦...啦...

我呢個咁偉大嘅第一反，除咗我自己之外基本上係無人睇到﹗媽媽一見到我忽然自己扒咗係個playmat到，開心到尖叫起上來，仲差D嚇親沖緊涼嘅爸爸添﹗然後媽媽就不停咁氹我反多次畀佢睇，我見佢咁有誠意就表演多次佢睇啦﹗

嗱﹗各位街坊叔伯兄弟，你哋睇清睇楚啦，我燒腩仔宜家要反身啦﹗

一開始來個交叉腳先

跟住等我歎住手指慢慢轉個pat過去

然後就要桔起少少個身鬆返隻手出來

話都無咁易就完成成套動作啦

不過咁...我宜家只係識反轉自己，唔識將自己反返轉頭，所以扒係到一陣就會開始扮慘，叫媽媽來幫我反返轉，但媽媽就好衰咁要叫好耐先肯幫拖囉﹗仲話我要快D學埋反返轉嫌我慘叫煩住佢添﹗哼﹗呢個媽媽實在太狠心啦﹗

靚媽有禮﹗

早前已經join了KIEHL‘S媽媽會，只要到KIEHL’S網頁登記資料，就可以到指定分店領取上面這枝迎新禮物，30ml Baby Cream for Face & Body，禮物才新鮮熱辣拿到手（接受登記第一晚已經去拎但竟然話無貨要今日先有﹗），今日又在facebook見到Sofina的ALBLANC系列送正離子美白精華5天體驗裝，艾菲當然又第一時間填表領取一份來試試啦﹗

只要到上面這個網頁，按照指示先like Sofina的facebook page，再填寫有關個人資料，便會收到他們的email，然後就可以到指定分店領取試用裝，不過艾菲收到email沒多久便收到另一個新email說要3月15日才可領取，路過Sofina順便問問他們的staff，原來是公司運貨安排有問題所以要遲一星期才有，但就非常強調只要成功登記就「一定有得拎」﹗所以有興趣的媽媽可以去登記呀﹗