2015年8月31日 星期一

少爺兵@大澳

之前提過燒腩仔因為轉校關係只得兩日暑假,為咗唔想浪費呢個難得嘅假期,艾菲一早吩咐米高拎定大假陪玩,而第一日我哋就先去上次玩得好不爽嘅大澳。



今次再臨,雖然正值暑假,但畢竟都係星期一,人流明顯無上次咁瘋狂,我哋喺東涌等咗十分鐘巴士就上到車(上次紅假去係等咗足足兩個鐘呀﹗),去到先搵返上次間抵食茶餐廳醫肚,然後就出發四圍逛,燒腩仔仲心情大靚,平日咩手飾都唔願帶嘅佢,竟然主動搶艾菲副太陽眼鏡去帶,好﹗就等媽媽遲D搵返副小朋友超畀你型仔吓啦﹗



平日來好多鋪頭都無開,不過真心行得好舒服,至少可以逐間鋪頭入去望吓,咁先似遠離煩囂嘅大澳㗎嘛﹗

2015年8月27日 星期四

又要威又要帶頭盔@佐敦谷公園

星期日,天氣好到不得之了,燒腩仔起身後米高就話帶佢去佐敦谷踩scooter,其實...艾菲早兩日都提過可以去泳池游水或者去玩「知蘭而行」㗎,但米高扮聽唔到(即唔想去)艾菲唯有配合,我哋去到都十一點幾,大草地罕有地無人,不過當你舉頭望見猛烈太陽,就會明白無人實屬正常。



去到公園,我哋就即刻同燒腩仔戴頭盔同護膝護踭,其實個頭盔已經買咗一排,係喺大埔墟嘅單車用品鋪到買,原先想買檬媽推介嘅BELL,但單車鋪個負責人話燒腩仔個頭未夠大帶,而且D款唔係太女仔就係太娘唔多啱佢,所以最終買咗鋪頭推介嘅Cannondale,同樣係美國牌子,摸落比之前單車公園介紹款台灣頭盔實淨。



燒腩仔本身好抗拒戴帽,試頭盔時都係不情不願咁款,係艾菲講明唔帶頭盔無得踩車先無奈就範,買完之後米高帶過佢落樓下平台玩,但踩唔夠十五分鐘佢就主動叫走,明顯就係唔慣帶頭盔,估唔到今次隔咗一排再玩,佢又出其地合作喎。

2015年8月25日 星期二

BMW兒童交通安全城@海港城

本來前一個星期六就帶燒腩仔來玩,但佢唔知點解忽然發燒燒咗三日,再加上佢班有個同組同學有手足口,安全起見都係同佢喺屋企隔離吓休息吓,好彩嘅係預約登記時,米高嫌艾菲第一個book嘅時間太夜,於是艾菲就趁仲有位時用佢電話,喺啱啱呢個星期六hold多一個時間,燒腩仔先唔使miss咗呢個活動無得玩。



reminder講明要早15分鐘到,怕遇上塞車我哋都早咗出發,去到見仲有時間剩就入咗反斗城逛,燒腩仔例牌行到車區即著晒迷咁企喺到逐架研究,然後有個慈父突然開聲話要送盒迷你工程車畀個仔﹗OMG!!! 明明屋企已經多車到玩唔晒,艾菲都講過如非必要唔好再買車畀佢,但慈父話個仔N班畢業好叻仔,想送樣嘢畀佢喎...咁你都講咗出口又點會收得返吖,燒腩仔聽見即好開心咁拎實唔放,艾菲無奈下都畀佢哋買咗呢盒車走。



等到夠鐘我哋就去登記拎飛,再去安全城門口排隊等候,見前一班小朋友未玩完,艾菲就剩機畀燒腩仔企側邊望吓,順便brief吓佢一陣嘅流程,提佢要合作聽姐姐話。

2015年8月24日 星期一

再見我的N班生涯



燒腩仔嘅N班生涯終於喺上星期五正式完結,諗返初初返學時未適應日日喊住返學,再持續幾個月日日放學喺呢條多人兼極斜嘅長命樓梯到拉拉扯扯,真係一殼眼淚永世難忘,曾經諗過退學唔讀嘅艾菲,完全無諗過我哋兩母子最終可以捱晒兩個學期。

燒腩仔讀呢間學校,性質似托兒所咁只放紅假,就連暑假都只放一星期,對在職父母來講係相當之好(K1-K3仲只得全日班),個人自理會比較著重,但學術方面就唔好抱太大期望,老師們都算有愛心,不過可能工作繁重嘅關係,間中會出現甩甩漏漏,亦唔會有時間幫你教仔,就算艾菲日日親自接放學,都唔係幾同到佢班主任講到D咩(更加唔好旨意會有主動打電話來報告啦),不過勝在有駐校社工,燒腩仔就全靠佢幫忙先成功揻甩摞地呢鋪癮。

睇住燒腩仔由一個乜都唔識嘅BB,到返學後開始識得同同學仔相處,知道要守規矩聽老師話,到後期學識照顧自己,亦開始講到學校嘅點點滴滴,直至近半年開始enjoy返學,又記得老師教過嘅嘢,仲會咀gel gel咁同老師講同學嘅是非,艾菲呢11個月以來嘅淚水同汗水總算無白流。

2015年8月21日 星期五

開卷有益第二回

自從年初決定要培養燒腩仔成為一個愛閱讀嘅小朋友後,艾菲就一直向住呢個方向努力,除咗keep住借書同買書畀佢睇,亦喺上個月開始的起心肝,展開睡前故事時間,確保做到每日一書,同時喺佢嘅玩具堆中,千辛萬苦咁搵咗個位來放書,等佢唔使成日顧住玩玩具唔睇書,可能佢學校都有呢方面嘅教導(接佢放學時佢有時唔係玩玩具而係喺到睇書),所以佢對艾菲呢D安排都頗為受落。



為咗令燒腩仔keep住閱讀嘅熱情,艾菲都唔敢怠慢,成日去圖書館借書畀佢睇,亦好快已經摸索到佢嘅喜好,車同畫靚字少嘅無厘頭故事絕對係佢杯茶,其中竹下文子一系列關於車,同長谷川義史嘅繪本佢都好鐘意,偏偏呢D熱門書喺圖書館嘅書架上係特別難搵到,好彩圖書館仲有$2.5一本嘅預約服務,上網或者用圖書館app搵本書出來,㩒個制就hold到,收到email即可以去圖書館拎書,無人跟尾hold的話可以睇足十星期,實在係超級方便﹗



既然預約服務咁方便,艾菲當然用盡佢啦,一口氣將之前好想借但搵唔到嘅書hold晒返來,《小豬別哭啦》同《爸爸別急著說晚安》係上網見有人介紹故事又幾啱燒腩仔而借,《便便》就係之前喺書局打書釘睇過覺得幾有意思而借,至於《小雞逛超市》同《小雞過生日》就係朝聖心態,想睇吓呢系列嘅書到底有咩咁吸引而借,點知燒腩仔真係一睇就愛上,本《小雞逛超市》因為後面有人hold,只睇兩星期就還咗,但燒腩仔居然好記得內容,之後同佢睇書見到類似超市嘅畫面,即刻話係小雞個超市,本《小雞過生日》更加係睇到背得出內容,所以上次去台灣就決定買成套《小雞幸福書包》返來畀佢慢慢睇。

2015年8月17日 星期一

放學tea一tea

艾菲係個懶煮正餐嘅媽媽,但甜品零食呢就出奇地有心機研究,皆因屋企有米高同燒腩仔兩個甜品控,無論正餐食到有幾飽都好,聽到有甜品食一定食得落兼爭食,所以為咗滿足佢哋嘅胃,艾菲一得閒就會整D好嘢畀佢哋食。



首先介紹個正氣D嘅甜品先,小朋友成日一咳就唔斷尾,真係聽見都心痛,除咗靠睇醫生食咳水之外,艾菲都會試吓食療,雖然成效唔係好顯著,但幫輕吓舒緩吓都好吖,呢個川貝燉雪梨就係其中一樣艾菲會試嘅,先將雪梨頂切開,然後用匙將雪梨芯挖走,之後放少量磨成粉嘅川貝(用攪拌機個乾磨打就OK),同一粒仔冰糖入去,再將雪梨頂用牙簽固定返落個身到,放燉盅燉45分鐘就食得,製成品甜甜地都幾好味㗎,至少燒腩仔唔會抗拒先啦﹗


燒腩仔除咗係甜品控亦係一個蛋控,無論係炒蛋,煎蛋,蒸蛋定烚蛋,佢都好可以食唔停口,所以見佢無扭計,專登趁佢返咗學快手整呢個滑滑鮮奶燉蛋,等佢放學返來有得食,材料同造法係參考簡易食譜嘅超滑的鮮奶燉蛋,基本上將全部料撈勻就蒸得食得,絕對係easy job﹗

2015年8月13日 星期四

懶媽廚房

作為一個無工人無老人家幫手嘅FTM,艾菲每日真係好似打仗咁做到無停手,既要完成全屋大小事務,又要應付燒腩仔呢個小朋友,再加上宜家D天氣咁熱,可以嘅話真係唔想留喺熱廚房咁耐,所以艾菲呢個懶媽,就唔覺唔覺咁喺呢大半年入面,煮咗D懶媽飯餸出來,將全部料放晒入煲一鑊熟,話咁快就食得,得咗﹗



要介紹懶人飯,呢個網上hit爆嘅整個蕃茄飯實無走雞﹗步驟超級簡單,先洗米,然後將蕃茄洗乾淨同介十字,再放其他鐘意食嘅料,加幾滴仔油,少少黑椒同鹽調味,㩒飯煲製煲飯,煲好將蕃茄壓爛撈勻就搞掂,而鐘意食有味飯嘅艾菲,仲會喺撈飯時加D parmesan cheese落去,個味係出奇地夾同正﹗



之後出場嘅係蕃茄飯變奏版嘅南瓜飯,同樣道理同方法,先洗米,然後將南瓜去籽去皮切件,再放其他鐘意食嘅食材同落調味料,㩒飯煲製煲飯,煲好將南瓜壓爛同加parmesan cheese撈勻就OK,艾菲有時會唔加芝士,而改加一大匙日本麵豉醬落去,又係另一番風味,咪睇佢賣相唔特別吸引,次次都食到燒腩仔舔舔脷㗎。

2015年8月10日 星期一

34個月



Hi! Hi!又到我一個月出場一次嘅時候啦﹗我話咁快就34個月大,媽媽話仲有兩個月我就足三歲,而仲有半個月我就會正式升K1,我好快就變大個仔啦﹗



呢個月肚仔無再唔舒服,食方面叫做正常咗,但無再好似細個時咁拆得,每餐食到一碗飯連餸,多數食到尾都無心機,成日食晒D餸唔食飯,要爸爸媽媽出盡法寶氹先肯食埋佢,不過有個突破就係終於肯用手食雞翼,以前一拎上手就會嫌污嘈,要爸爸拆肉畀我先肯食,宜家可以自己食到得返兩條骨好乾淨啦﹗



瞓覺方面嘅最大轉變,就係媽媽終於的起心肝加插睡前說故事時間,我每晚可以自己揀兩本書入房畀媽媽講(其中一本一定係小雞系列>.<),對於呢個安排我超級滿意,仲成日聽完一次要媽媽再講多幾次,直至媽媽講到口水乾堅持唔再講先肯去瞓,大概十點半熄房燈,通常都碌到十一點幾先瞓到,然後第二朝九點左右就會自己醒,至於晏覺都係keep住放學返來瞓一個鐘左右,有時有街去有嘢玩可以唔瞓,不過大人就要忍受一陣扭眼瞓發癲時間我先會正常返。

2015年8月7日 星期五

熱爆迪士尼+快閃愉景灣

因為怕熱怕曬兼怕逼,一直都諗住等到九月初先再同燒腩仔去迪士尼,但宜家新學校八月尾就開學,燒腩仔得返兩日暑假咁大把要好好珍惜,所以難得星期二佢學校畢業禮有假放,就決定點都帶佢入去玩轉先,仲專登叫米高放半日假來會合我哋。



早一晚知道有得去迪士尼,燒腩仔已經進入興奮狀態,同佢出發去坐車時,仲開心到周圍同D完全唔識嘅陌生人講「我去迪士尼呀」,行過迪士尼牌坊開始聽到音樂時,仲用勁讚歎嘅語氣講咗句「D歌真係好好聽呀」,可愛到艾菲幾乎暈低咁滯。



來遠就指住噴水池話好靚,艾菲巡例都問佢一句影唔影,難得心情大好嘅燒腩仔話影,幾熱幾曬都即刻埋位影﹗

2015年8月6日 星期四

試食:CATALO健康食品

自從燒腩仔上年十月開始返N班之後,的確係比之前容易病咗,就連皮膚敏感同濕疹嘅情況都嚴重咗,所以來緊九月轉新學校,艾菲呢排都一直諗緊要唔要畀D健康食品佢試,幫佢增強抵抗力無咁易病,咁啱就喺呢個時候收到CATALO送來一大籃嘅健康食品,Good﹗



燒腩仔一聽到呢籃健康食品係PR姐姐送畀佢,即笑到四萬咁口勁開心﹗



仲不停問艾菲幾時食得,不過艾菲想睇清楚功能同食用方法先畀佢食,所以畀咗三盒啱佢食嘅DHA藍莓忌廉魚油,藻油DHA奧米加3軟糖同益生菌強健配方來砌住積木先﹗

2015年8月4日 星期二

Happy Gathering@郵輪碼頭公園

等咗成個月,終於又到我哋一班blogger小朋友出來聚一聚嘅時候,今次仲約咗去燒腩仔上年玩水玩得好開心嘅郵輪碼頭公園,實行齊齊let's get wet﹗



呢個小朋友,臨出門口又扭計,結果搞到艾菲再一次遲大到 >.<,去到艾菲仲四圍望緊大家去咗邊之際,燒腩仔已經飛奔咗去南瓜仔同南瓜妹身邊,哈...證明佢上次出來係有認住佢D朋友仔㗎﹗



等齊人我哋就埋去玩水啦﹗燒腩仔玩慣玩熟,一埋位就玩到成身濕晒﹗

2015年8月3日 星期一

K1大作戰 ~ Close file

雖然燒腩仔讀N間學校只得一星期暑假,但隨住八月嘅來臨,艾菲都開始諗燒腩仔升K1嘅問題,先係煩幾時開始tone佢嘅睡眠時間去適應讀上午班,亦開始同佢洗腦要轉新學校認識新老師新同學嘅事實,而暗地裡艾菲都一直盤算住要唔要畀佢以大B身份再戰K1,如果去馬就又要開始準備影相報名填表,為咗呢D濕濕碎碎嘅嘢,都無覺好瞓咗成個星期,點知...當艾菲終於有定案,決定再試多次K1大戰,但只報最最最心儀間學校時,呢間學校居然喺上星期初打畀艾菲call waiting﹗﹗﹗

收到心儀學校電話後,艾菲真係唔敢相信呢個係事實(其實到宜家都仲覺得成件事好夢幻),畢竟已經係七月尾,而且當日收到放榜信時,正值艾菲身體同心情最差之時,只係勉強撐起身體好hea咁寫咗封求位信,叫米高拎過去學校,艾菲就無再特別跟進過,完全無諗過到宜家仲會有機會﹗收線後打畀米高報喜時,艾菲傻瓜到忍唔住喊咗出來添呀﹗

其實艾菲點解咁鐘意呢間學校呢?全因佢係出晒名嘅Happy School,絕對唔會死谷學生學術,而且特別著重德育,上至校長下至校工都好有愛心(當日去簡介會同interview時都感受到),呢D都係燒腩仔好好好需要嘅嘢﹗而另一個好吸引嘅因素係佢係一間龍校,3年後100%直升自己嘅私小,亦可以參加官津校嘅大抽奬,對一眾家長來講絕對係進可攻退可守嘅選擇,畢竟燒腩仔係龍年細B,今年考K1都戰況激烈,稍為熱門嘅學校都無佢份,喺我哋主張唔谷嘅管教下,真係唔見得佢到升小時考小學有任何優勢,所以入到呢間學校,艾菲真心覺得安樂晒,我哋終於唔使再參加K1大混戰啦﹗

不過學校畀個offer係PM位,而且要坐校車返學放學(其實坐巴士的話車程連等車都係半個鐘左右,艾菲係可以親自接送,但米高怕燒腩仔途中搞事搞著艾菲,一早講明讀呢間一定要坐校車),艾菲都有一秒猶豫過,但衡量到呢間學校畀到嘅嘢,係原先註咗冊間學校完全畀唔到嘅,艾菲已經頭也不回咁決定take offer,畢竟燒腩仔都返咗成年下午班,係放學時扭D同時間無咁好用姐,要佢晨早爬起身返學都唔見得唔會扭呀,再加上坐校車之後艾菲比宜家多咗時間做自己嘢,間中又可以自己接放學等佢開心吓期待吓,好過宜家日日接唔識珍惜﹗

而為免夜長夢多,我哋已經好快手咁去咗新學校註冊,亦confirm埋校車booking,仲趁weekend去買埋校服添啦﹗但有樣嘢艾菲覺得有D可惜嘅,就係宜家轉一轉校,燒腩仔嘅暑假由原先兩個星期(原先間學校九月第二個星期先開學),變成得返兩日咁大把(八月尾開學),好彩嘅係佢都未識咩叫放暑假,基本上返學仲開心過喺屋企對住艾菲,只係我哋少咗好多帶佢四圍玩嘅親子快樂時光啦﹗