2015年11月27日 星期五

重聚(8W)

屋企兩位男氏被病菌打低,連帶艾菲都有少許中招跡象,好彩14W之後D早孕期不適已經消退得八八九九,唔係就真係苦上加苦,暫時單靠意志力同休息都仲勉強照顧到自己同燒腩仔,最好唔使搞到睇醫生食藥啦,雖然都知醫生實會開啱艾菲食嘅藥,但可免真係則免,不過就搞到寫blog進度又拖慢咗...哇...艾菲仲有成堆嘢未blog㗎﹗

5/10/2015

繼續Day back返BB豆豬嘅嘢先,呢日我哋約好咗Dr Wong覆診,最主要係睇BB豆豬喺呢兩星期入面有無長大,不過上次已經照到BB豆豬有心跳,出現血絲嘅情況亦喺第二日已經停咗,所以呢兩星期艾菲都唔算好擔心(但仍然係有D忐忑不安咁啦)。

送咗燒腩仔上校車後,艾菲就先返屋企休息,順便等米高放工返來會合(放下午),一心諗住拍拖去學校接埋燒腩仔放學,再一齊去TST診所覆診,點知兩點左右忽然收到姑娘電話,話Dr Wong有個病人就來生得,黃昏嘅appointment要取消,佢叫艾菲一係改第二日,一係就提前四點半要到,千辛萬苦先等到呢日,艾菲當然唔想改期,但燒腩仔又四點半先放學喎,唔通叫米高去接仔,艾菲自己去覆診,咁咪白白錯過咗俾燒腩仔見BB豆豬嘅機會囉...

同米高商量咗陣,艾菲決定照要四點半嘅booking,心諗Dr Wong實遲到,然後就同米高兵分兩路,艾菲先去診所報到,米高就提前四點去學校接仔,同佢早退半個鐘再飛的出TST會合,結果時間真係啱啱好,去到診所仲要等多陣先有得見醫生。

其實今次唔係燒腩仔同Dr Wong嘅第一次重聚,艾菲生完佢之後嘅一次產後檢查,佢哋兩個都已經見過面,不過當時燒腩仔係全程瞓著,今次就大個仔同知咩事,事前艾菲都大概brief過燒腩仔入到房會點,佢都好乖好合作無扭計,只係見到Dr Wong時怕怕羞羞咁唔肯叫人,咁Dr Wong唔係特別鐘意小朋友,反應唔特別興奮都係艾菲預計之中嘅。

2015年11月23日 星期一

第一次見面(6W)

一直都唔諗住Day back返BB豆豬嘅嘢,但諗吓諗吓又怕自己好快老人痴呆唔記得個感覺,所以就趁呢排得閒D精神D,記得幾多就寫幾多啦﹗

23/10/2015

自從月初驗到Bingo之後,艾菲個心一直蘿蘿攣咁,你話唔開心咩又唔係,但好興奮又無乜,畢竟衰過一次,都怕今次又食詐糊,而且我哋都有共識,再有意外嘅話就放棄,反正我哋一家三口都過得好開心,只係多一個小朋友又真係圓滿D咁囉。

沉殿咗幾日之後,先捨得話畀燒腩仔婆婆知同搵Dr Wong約期(今次係低調到連艾菲嘅好姊妹,到宜家都仲未知),然後大家都千叮萬囑艾菲要小心,就連一向崇尚唔戒口嘅米高都竟然叫艾菲唔好飲茶,最重要嘅係要艾菲唔好隨便動氣,well...大家都太了解艾菲嘅臭脾氣啦 >.<。

奈何燒腩仔,一如過往咁,專揀呢D重要關頭來搞事,一連幾日艾菲真係畀佢逼到癲咁滯,雖然每次艾菲都好快叫自己冷靜,又會事後摸住BB豆豬來纖悔,但動咗氣就係動咗氣,終於到6W6D呢日,一早起身個肚就拿住痛,然後去洗手間竟然抹到少少血絲。

嗰一刻,真係有D欲哭無淚嘅感覺,雖然理智都話畀自己知好小事,只要乖乖地唔好再操勞同動氣就OK,但情感上仍然難免會擔心,掙扎咗好耐決定即日約Dr Wong做個檢查先(本身約咗7W先見順便聽心跳),安排好燒腩仔爺爺過來接放學,艾菲就同米高飛出去TST搵Dr Wong。

由於係臨時約嘅booking,所以都等咗OK耐先有得見醫生,Dr Wong循例都先問情況,聽到艾菲到下午已經無再肚痛,佢就話唔太膽心(其實艾菲都估到肚痛應該係因為腸胃敏感),至於有血絲嘅情況,都係例牌幾句安慰說話同開安胎藥嘗試幫幫忙。

2015年11月20日 星期五

黑面神@迪士尼

艾菲本來想喺十月來多次夜遊迪士尼,等燒腩仔星期五放學入去玩吓黑色世界影吓相咁,但自己同燒腩仔都長期處於唔穩定嘅狀態,最終都係打消念頭留返十一月頭嘅特選周末先入場,一早約好米高plan定去玩,出發前一星期先知遇著會員特賣周,O...即又要同人逼逼逼,但我哋已經有共識來緊應該唔續會,所以宜家真係去得一次就一次。



事前無同燒腩仔講,但佢好似估到咁,早幾日放學忽然同艾菲講:「媽媽,你可唔可以帶我去迪士尼玩」,咁我哋就剩機叫佢要乖要合作先有得去,結果佢喺星期六都叫做乖咗半晚啦,但到星期日朝早起身又發作,不過見佢都唔係好扭就照出發。



人多係我哋事前已經預計到嘅事,沿途艾菲都有同燒腩仔做定心理輔導,但天氣熱就真係無預到,呢個少爺兵逼完車之後,行入park嘅短短路程入面,已經叫咗幾次要飲水,眼見入場條人龍長到無朋友,仲要行兩步就突然停喺路中心要我哋畀水佢飲,點勸都唔肯行多兩步排住隊先飲,唔畀就即時黑面神上身兼發難喺到嘈,堅係搞到大家都好無癮。

2015年11月17日 星期二

hea爆賀壽

11月2日係米高嘅生日,為咗留返D假陪艾菲去覆診,加上燒腩仔都要返學,所以今年米高無特別請假慶祝,本來艾菲都想認認真真咁同佢食返餐好,奈何艾菲呢期嘅胃口總係反反覆覆,米高就好貼心咁話保留食返餐好嘅權利之後用。



生日前一日嘅星期日,理應一家人去好好慶祝,但艾菲實在畀BB豆豬搞到無乜電,於是呢朝米高照舊做湊仔公,畀艾菲瞓到十一點幾先起身,等艾菲瞓醒後佢就建議過海行吓同燒腩仔遊吓車河,其實艾菲攰到唔係好願郁,但主角興致勃勃,艾菲都唔敢掃慶,唯有撐起身陪呢兩父子去玩。



過海喺銅鑼灣食完飯後,以為米高會話去行商場,點知...佢居然好神心咁話帶個仔去維園玩﹗仲帶咗燒腩仔去水池睇人玩船添﹗睇住D船片來片去,燒腩仔係勁興奮,仲好浮誇咁笑到咔咔聲添﹗

2015年11月11日 星期三

BB豆豬來了(13W)

終於都捱到13W,艾菲D私務亦總算忙完,可以正式同大家報喜,本來艾菲今次想低調處理,一直打算照埋結構先公布,但其實好多聰明嘅blog媽已經估到,甚至比艾菲自己仲緊張,所以艾菲都決定唔瞞大家,係...燒腩仔終於有機會做哥哥啦﹗

點解艾菲話呢段日子係捱過來呢?皆因今次陀住BB豆豬,真係無想當年陀燒腩仔咁舒服,想當日陀住燒腩仔,除咗大食咗好多之外,基本上係食得瞓得玩得行得走得,今次呢...由初期尿頻,成日突然斷電同腸胃敏感,到後期反胃作嘔同堅嘔,平日用開嘅沐浴露同lotion都嫌臭,入唔到街市煮唔到飯(聞到生肉味就反胃),連青菜同魚都食唔到(好彩仲食到水果),簡單如食粒Materna都食到飲苦茶咁嘅樣,甚至晚晚瞓唔好不停醒,真係無諗過兩次嘅分別可以咁大﹗

再加上今次湊住燒腩仔,佢又正值最難搞嘅terrible 3,永無合作扭擰鬥氣已成每日嘅指定動作,所以早期不適嘅日子就更加難捱,最記得有次手軟腳軟咁去接佢校車,同佢講「媽媽唔舒服要快D返上樓」,佢嘅反應係即時企喺到扭唔行,嗰一刻真係十萬個唔開心,但艾菲都明佢始終仲細,亦的確係個粗心大意嘅男仔,都無得要求佢咁多,所以早有準備帶定粒糖等佢跟住返屋企就算。

好彩嘅係燒腩仔對於BB豆豬都好接受,由於艾菲每日都會長時間對住燒腩仔,燒腩仔又最鐘意喺間屋到橫衝直撞,為免有意外發生,艾菲一驗到bingo就即時同燒腩仔講,佢都好期待又不停問艾菲BB豆豬幾時出來同會點樣出來,仲四圍同人講自己有個妹妹(妹妹呢樣嘢純粹佢自己亂估>.<),叫佢錫錫BB豆豬都會埋來錫艾菲個肚皮。

就連BB豆豬呢個名其實都係燒腩仔改嘅,原先艾菲仲諗緊今次應該叫伍花茶定伍香肉丁(燒腩仔原本嘅乳名其實係伍花腩,kakaka...),然後有晚燒腩仔臨瞓前拎住自己隻小布豬,慣性瞓落床仲不停講嘢嘅佢,忽然好正經咁同艾菲講隻小布豬叫BB豆豬,艾菲下意識就問佢係唔係講緊肚入面個BB,之後我哋就有共識叫佢做BB豆豬啦﹗

2015年11月10日 星期二

爸爸去哪兒?

估唔到大家真係咁掛住艾菲同燒腩仔,趁今日又偷到時間出來,快手寫返篇blog表揚吓燒腩爸米高先﹗

之前都提過,艾菲近排私務繁忙,成日出咗去唔喺屋企,平日多數會叫燒腩仔爺爺嫲嫲過來幫手湊一陣,但到weekend湊仔呢個責任就好自然咁落咗喺米高身上,好彩燒腩仔都好肯跟米高,所以艾菲都好放心將個仔交畀佢,兩父子喺屋企作反極都有個譜,至少人生一定安全先嘛。

然後上個月中某個星期六,艾菲又臨時有事要出去忙,米高忽然喺星期五晚臨瞓前同艾菲講,想帶燒腩仔坐纜車去山頂再行落去HKU,吓?行山?咁認真?燒腩仔出名少爺兵來㗎喎...上次去大澳行兩步嘈一次飲水嘅記憶猶新,就算平日佢跟米高出去踢波,回程時都定必詐型話眼瞓扭計,米高係邊到來嘅膽量挑戰呢個仔呢?

艾菲起初以為米高只係講笑,敷衍佢叫佢諗清楚就瞓,點知第二朝佢真係好認真咁執嘢準備出發,咁...艾菲唯有祝佢好運,同循例提醒燒腩仔要合作,而最重要嘅係吩咐唔鐘意影相嘅米高影返幾張相畀艾菲望吓,確保佢哋兩父子一路平安啦,kakaka...



就係咁,佢兩父子好開心咁出發啦﹗而成個行程中艾菲覺得最富有挑戰嘅check point就係排隊等坐纜車,宜家平日等坐纜車條隊都長到嚇死人,更何況佢哋呢日係星期六,睇相都睇到燒腩仔等到呆晒,不過可能未坐過嘅關係,米高話佢都無點扭好合作,GOOD!

2015年11月5日 星期四

Mini生日會

消失咗成個十月咁滯,除咗顧住玩廚房個新玩具之外,其實主要係因為呢排私務繁忙,成日早出晚歸唔喺屋企,返到來又要招呼屋企個不合作運動忠實粉絲燒腩仔,晚晚惡戰連場之後再加埋自己身體上確實出咗D狀況(其實都無咩嘢,呢個遲D有機會再講),衡量過之後唯有暫時放棄blog務一排,但實情艾菲係有好多好多嘢想blog㗎﹗



(呢排D相唔知點解好暗,得閒要較吓部機先)

所以難得今朝俾燒腩仔激到爆血管個人勁精神,快手寫返之前好想寫嘅Mini生日會先,一如往年艾菲都係喺燒腩仔婆婆屋企搞,婆婆仲專登揀咗燒腩仔農曆生日嘅正日添,而有過上年淘寶遲出貨嘅經驗,今年未九月已經開始準備所有物資,今次主題係燒腩仔近期至愛《Cars》,雖然明顯唔係艾菲杯茶,但為搏個仔一笑,艾菲都盡量滿足佢。



因為預多咗時間訂,所以有部分裝飾可以加埋燒腩仔個英文名落去,出來效果都幾唔錯,但其實呢到係來自兩間唔同淘寶店嘅decoration,一間靚D有特色D可以印名亦貴D,於是慳媽艾菲訂咗必須嘅用品之後,就喺另一間買standard款嘅枱布同餐具,mix埋一齊完全唔覺。