轉眼六年

話都無咁快又一個312，湊住兩個D時間好似過得特別快咁，呢一年堅係辛苦到艾菲同米高都捱到殘晒，但睇得出大家為咗頭家，好努力咁將不可能變成可能，不過育兒路上總有低潮，好多嘢唔係做父母嘅想點就可以點，一家人一齊跨過眼前嘅障礙大概就係來緊呢幾年嘅目標，我知道我哋會撐得過嘅﹗一定會﹗一定會﹗一定會﹗（好重要所以要講三次）



紀念日前幾個星期，米高循例都有問艾菲想點慶祝（主要只係問想食咩），艾菲亦循例回佢一句「無乜所謂」就拋返個波畀佢，結果呢排湊仔湊到好depress嘅艾菲，根本無放任何心思去慶祝，但就喺紀念日前一日，因米高咁啱呢個星期六要返工，無奈地單拖帶埋BB豆豬湊燒腩仔返學校上興趣班（平時多數係米高帶），再頻頻撲撲咁帶住佢哋兩個過海做D嘢，辛苦同忙咗成個朝早同下午後，返到屋企忽然收到紥花，wow...好驚喜喎﹗



之後星期日嘅正日，我哋喺屋企忙咗成朝做晒D家務後，米高就帶咗我哋去西貢，無特別嘅行程，只係隨意咁hea吓行吓，帶燒腩仔去碼頭睇吓人哋賣海鮮，睇吓海，睇吓船，睇吓花花草草，又畀佢試吓玩打鼓，雖然呢日係我哋兩個大人嘅大日子，實際都係以小朋友玩樂為主，拍拖？浪漫？情調？咩來㗎？食唔食得㗎？

Super Pool@海事博物館

之前喺facebook見到有人介紹香港藝術節搞嘅Super Pool，見D燈會不停變色幾得意又幾靚，估燒腩仔應該會鐘意，就試吓mark定日子上網報名，原先以為會好搶手好難報（之前智樂嘅報名經驗實在太差），點知又唔係喎，仲畀艾菲揀到前星期日，喺海事博物館搞嘅四點半親子時段。



出發前收到大會嘅溫馨提示，叫我哋要廿分鐘前到，但check完飛入咗場又未玩得，於是成班小朋友就走咗去落地玻璃前望海，估唔到燒腩仔咁都可以識到女仔喎，艾菲見佢同隔離個妹妹有傾有講，堅有交流㗎﹗

快閃赤柱

呢排米高成日都撞正星期六日要返工，搞到連行山都無時間，所以趁前一個星期六一家大細出咗灣仔，艾菲就提議去赤柱行吓hea吓，放空一吓正正是艾菲最近需要嘅嘢...



入到赤柱差不多四點，遇著米高要先搵地方處理D工事，於是就齊齊去咗圖書館hea（原先想帶佢哋去體育館個遊戲室，點知咁啱維修緊無得玩），好彩嘅係BB豆豬好合作無大叫大喊，亦畀我哋喺到搵到好多平日喺屋企附近圖書館好難搵到嘅好書睇，走嘅時候我哋仲借咗五本Thomas書同一本視覺圖畫書返屋企睇添﹗

拆利是

趁有時間快手講埋農曆新年最後一件事拆利是先﹗由細到大艾菲都會將D利是儲埋一堆，一到農曆十五即拆利是，但今年湊住兩個堅係忙到氣都無時間透，再加上想畀燒腩仔自己利是自己拆，所以就一拖再拖居然拖咗成個幾星期先得閒同佢哋坐低拆利是。



一如往年，拆利是前先影返張戰績相，不過就無上年咁好閒情慢慢擺pose影啦，皆因人多混亂多，燒腩仔個心早已飛咗去拆利是，BB豆豬亦勁快手咁將D利是逐封塞入口咬，為免情況一發不可收拾，影到張見樣有少少笑嘅，收貨啦﹗

宜家燒腩仔大個仔，利是都係自己拆，而今年都拆得好叻仔，無整爛晒D利是封，只係少少被整皺咗，絕大部分拆完都可以循環再用，而佢拆完後亦識得自己跟返D紙幣面額來分返一堆堆，算係有系統咗進步咗，而最搞笑嘅係佢拆完一大輪，居然問艾菲「點解咁少十蚊紙嘅？」，原來呢個傻瓜好鐘意十蚊紙嘅紫色想收多D。



記得上年我哋特登留咗四蚊畀燒腩仔落樓下超市買嘢，但實情只係買到一包餅咁大把，今次艾菲就決定留$150畀佢買玩具，事前同佢商量好決定買Kinetic Sand（實情係媽媽想買所以氹佢同意買呢個），然後就出發去反斗城搵，搵到Kinetic Sand個貨架後再叫佢自己睇吓價錢可以買到邊款（又其實媽媽一早上網格好價，呢個價錢只可以買到最basic嘅一盒），經過一輪認真搜尋終於搵到佢要嘅嘢啦﹗



至於BB豆豬嘅利是，當然係由艾菲代拆啦，然後趁某日哥哥返咗學，艾菲就同佢去建行開返個同哥哥一模一樣嘅戶口（原來宜家開戶口要搞成粒鐘﹗），連埋上年代為保管嘅利是錢一次過存晒入去，貪佢方便近屋企兼夾有張相片銀行卡送返，而有過哥哥當年整銀行卡嘅經驗知道製成品顏色會偏暗後，艾菲今次就專登揀返張光D嘅相放上去，睇網上試玩嘅效果好似幾好，希望製成品同樣OK啦﹗

十個月

Hello!又一個月啦﹗媽媽呢排畀我同哥哥玩到謝晒，所以失晒蹤無晒影咁，一於由我代佢出場，update吓個blog唔好種菇，順便報告吓我呢個月嘅進度啦﹗



先講食呢樣，我宜家每日食兩餐固體，大概一個大人碗嘅份量，由於媽媽實在太懶太hea，所以呢個月只係試咗荷蘭豆，豆腐，紫菜，蘑菇，白蘿蔔同芝士呢幾樣新嘢咋，不過佢就開始搞吓D新花臣，見我出咗兩隻牙仔開始咬到嘢，就簡中整吓切粒水果，天使麵同薯蓉我食，亦會畀我飲吓湯同自家製果汁，等我唔使日日食粥同飲水飲奶咁悶蛋喎（艾菲：實情係比起哥哥當年真係煮少咗好嘢佢食>.<），而我D手指仔喺呢個月都變得靈活咗，可以自己拎起D星星餅再放入口食啦﹗