2016年8月30日 星期二

燒腩仔放暑假之長洲飲食團



除咗踩單車之外,另一個好想喺呢個暑假去嘅地方就係長洲,艾菲同米高N年無去過長洲,聽聞多咗好多好嘢食,諗起就流晒口水,但weekend去實係逼爆,只好留返平日放假去,悠悠閒閒咁漫遊,咁先似係遊離島㗎嘛﹗



已經晨早起身準備出門口,但唔知點解都要搞到十一點幾先去到碼頭,好彩有架快船半個鐘即到,啱啱好夠時間喺船上餵飽BB豆豬, 至於交通工具控燒腩仔,有得坐咁大架船就開心,全程船把口幾乎無停過。

2016年8月25日 星期四

燒腩仔放暑假之單車初體驗

為怕燒腩仔放暑假日日喺屋企搞搞震,會激到艾菲爆血管暈低,米高都好好咁趁公司無咁忙,喺八月初放咗兩星期假返來幫手,事前我哋已經plan定要趁呢個假帶燒腩仔四圍去玩,而其中一樣就係帶佢去踩單車。



自從燒腩仔識玩scooter之後,已經好耐無踩過屋企架BB三輪車,隨住佢個身型越來越大,我哋都知佢係時候升呢去踩真嘅單車,直至佢有日路過反斗城,忽然好堅持咁同艾菲講「我真係識踩㗎」,要艾菲畀佢坐上架單車到試玩,艾菲就知唔可以再呃佢幾耐,但基於屋企地方始終有限,附近又無單車場或單車徑,艾菲同米高早有共識唔會買車,要踩就去單車鋪租,所以呢日同佢去咗香港單車館,一圓佢踩單車嘅心願。



呢到租小童單車,$30一個鐘,$100一日,不過燒腩仔第一次踩,加上呢日天氣一直麻麻地(好彩屋企有個地下天文台長,我哋趁停雨拿拿聲去搏一搏,台長話呢日唔踩之後日日都狂風大驟雨更加唔使踩), 最後只係租咗兩個鐘。

2016年8月24日 星期三

Happy 100 Days!!!



一轉個頭,BB豆豬已經喺上兩個星期滿100日大啦﹗湊住兩個嘅時間真係過得特別快,好似無幾耐前先喺醫院開刀拎佢出來,咁快就已經變到咁大舊識笑識扁咀識扭計...



100日嘅正日,點都要一家四口慶祝吓啦,簡簡單單買個蛋糕返來切,妹妹你要繼續乖乖,食多D奶快高長大健健康康,要同哥哥一齊做個開心寶寶呀﹗



100日前一日收到美贊臣嘅媽媽會禮物,係好有心好靚嘅毛巾蛋糕,條毛巾入面個label仲印有妹妹個名添﹗讚﹗

2016年8月18日 星期四

燒腩仔放暑假之爺爺去哪兒

呢個暑假艾菲忙住湊BB豆豬,唔係好帶到燒腩仔出去玩,好彩仲有超錫燒腩仔嘅爺爺,喺燒腩仔放暑假前一星期,提出暑假帶燒腩仔去玩嘅建議,然後佢哋兩爺孫每隔一至兩星期就出去玩半日,爺爺有得享受湊孫樂,燒腩仔有得出去放電,艾菲就輕輕鬆鬆同BB豆豬單對單,真係一舉三得嘅安排﹗



第一次出去玩,其實艾菲都有少少唔放心,皆因燒腩仔平日擺明蝦爺爺,驚爺爺鎮壓唔住佢,不過返到來都無穿無爛,而且爺爺會間中whatsapp返D相返來,等我哋知道燒腩仔搞緊咩(呢個超讚),艾菲即時放心好多。

明明約去玩時燒腩仔只係話去樓下新開嘅公園,點知爺爺就帶咗佢去遊車河,過海兼去埋香港公園,sir滑梯玩沙睇魚睇雀之餘,仲呃爺爺請佢食甜筒(當時佢有D咳未清要戒食凍嘢,但佢忍到爺爺買咗先咳>.<),真係爽到呢...



第二次出去,爺爺本來想帶佢去第二到玩,點知燒腩仔好堅持要去返香港公園,超鍚佢嘅爺爺又點會say no,於是爺爺除咗帶佢去公園,仲有帶佢去埋上次無去到嘅茶具文物館,事後聽燒腩仔講返爺爺應該有同佢講解吓(good﹗),之後好似係帶咗佢去中環坐叮叮去堅尼地城再轉巴士返屋企,氹得燒腩仔呢個車迷不知幾開心。

2016年8月15日 星期一

燒腩仔放暑假之Let's get wet

燒腩仔放暑假遇著BB豆豬啱啱出世,艾菲自問真係無能為力一湊二帶佢四圍玩,就連落樓下公園都有D難度,但日日困喺屋企莫講話燒腩仔,連艾菲都怕會坐到發霉,所以一到weekend米高放假,艾菲就會極力爭取帶燒腩仔出去玩吓透吓氣,但之前要顧住泵奶畀BB豆豬,每次出門都要限時限刻唔去得遠,見BB豆豬上個月開始肯埋身食奶,我哋終於可以去遠D玩耐D,然後上個月底就一家四口去啟德郵輪碼頭玩咗半日。



我哋喺屋企食完午餐先出發去玩,不過下午兩三點嘅郵輪碼頭依然係好熱好焗,怕熱嘅燒腩仔一去到就呆呆咁,好彩艾菲早有準備帶定枝bubble去畀佢warm up。



開始有笑容啦...

2016年8月8日 星期一

三個月



真係眨一眨眼我就三個月大啦﹗媽媽話我呢個月好似無肥得咁勁,節瓜腳依然但D肉明顯無上兩個月咁實淨,所以叫爸爸幫手將我變做圓眼圓咀圓面喎...媽媽你玩我咋嘛...



我宜家一日食五餐,繼續做全人奶B,三個半至四個鐘食一餐,頭四餐全部埋身食,只係最後一餐用樽餵160ml,爸爸話等我夜晚食飽D一覺瞓天光,佢又可以餵吓我咁啦,不過可能慣咗埋身食,家陣就連飲樽都會側住條頸,對住爸爸個心口飲,搞到狂畀媽媽笑我傻豬,而嘔奶嘅情況亦隨住轉返埋身食而明顯改善咗,但唔知係唔係埋身食個量飲少咗,D肉無之前咁實,濕片都無之前咁爆咁多(不過個數都係合格嘅)。

2016年8月4日 星期四

海底奇兵2之其實明唔明?



BB豆豬出世前,艾菲已經不停同自己講,幾忙都要盡量抽時間同燒腩仔拍拖,等佢做咗哥哥仍然可以有獨霸媽媽嘅時光,奈何艾菲平日自己一湊二,要同燒腩仔拍拖又談何容易,咁啱早兩星期米高請咗全日假來陪燒腩仔去做物理治療,艾菲見樓下戲院早場《海底奇兵2》嘅時間啱啱好,可以餵完BB豆豬即出發,再睇完返上樓同佢沖涼加餵第二餐奶先去物理治療,就情商米高朝早幫手睇住BB豆豬一陣來成全我哋(其實都只係陪佢一齊大覺瞓之嘛)。

有過上次《功夫熊貓》嘅經驗,艾菲今次專登買定《海底奇兵》隻DVD返來,畀燒腩仔睇咗兩次,仲要佢嘗試講返戲情出來,make sure佢係知道第一集講咩同認得D主角,先應承帶佢去睇,點知一開場播《冰河世紀》同《麥兜.飯寶奇兵》嘅trailer,佢又係咁喊驚(連麥兜都驚?),艾菲只好叫佢驚就合埋眼唔好睇。

跟住到開場,無做功課嘅艾菲一心諗住個故事好似第一集咁簡單,睇落先知會不停時空穿梭講返多莉細個嘅情景,然後專注力其差嘅燒腩仔,應該都唔係睇得好明,所以全程不停喺側邊喊驚喊凍喊痕,煩到艾菲要用盡方法安撫佢,先終於睇得完成套戲,兼坐到完晒場聽晒歌睇埋最後嘅一幕(好彩朋友事前提醒,因為職員開晒燈D人以為無嘢睇走晒,無乜人知道要留底睇到最尾)。

不過當你以為佢睇唔明嘅時候,到散場行出戲院時傾偈,佢又講得出部分情節㗎喎,例如講到多莉叫阿亨做七爪魚,多莉同莎莎妹喺水管傾偈,多莉媽媽最鐘意紫色貝殼,同八爪魚有三個心臟之類,接收能力比艾菲想像中高。

2016年8月2日 星期二

K1家長日@下學期

燒腩仔嘅暑假早喺六月底已經開始咗,來緊九月就會升K2,媽媽真係好唔捨得佢大,偏偏時間轉眼就過,回顧返呢一年嘅K1生活,親眼見證燒腩仔由N班唔鐘意返學,轉變到宜家超鐘意返學,學習同行為方面都有明顯嘅進步,雖然唔可以日日親自去學校接送佢返學放學,但都感受到同學家長同老師之間好有愛,越來越覺得想當日揀呢間學校嘅決定係無錯㗎﹗

六月尾最後一日返學舉行結業禮,艾菲遵守承諾帶埋BB豆豬去接燒腩仔放學(之前坐月好耐無去學校接過放學),一心以為燒腩仔會好開心,點知有人全程鬧情緒,到夜晚仲發惡夢大吵大鬧,最終要叫醒佢問佢咩事,結果有人喊住咁同艾菲講「我好唔捨得X老師呀﹗」,OK...咁咪帶埋你一齊去見家長囉。



家長日前一日已經不停提佢要乖,因為要夾啱BB豆豬飲奶時間先可以出發,無奈呢個小朋友都係唔太合作,再加埋BB豆豬無心機飲奶用多咗時間,搞到我哋要匆匆忙忙咁飛的去學校,好彩前一個家長仲未出來,我哋去到就啱啱好入得課室。

老師先拎燒腩仔本成長冊出來,簡單講解吓燒腩仔嘅學習情況,大致上都無咩問題跟到進度,係英文同普通話堂,到下學期仲係唔專心上堂,完全唔驚兩個net teacher,成日聽唔明就同同學仔喺到大笑搞事,所以成績只係普普通通。

至於情緒控制同自理能力方面,老師就大讚燒腩仔進步咗好多,喺老師提醒下少咗鬧情緒,遇有不快時亦肯冷靜落來慢慢解決問題,見佢喺學校表現唔差,艾菲就請教老師應該點樣處理佢嘅壞情緒,皆因佢離開學校之後即變第二個人,有咩唔滿意即大吵大鬧甚至郁手郁腳,搞到艾菲同米高好頭痛...

2016年8月1日 星期一

行路問題@第四、五、六次物理治療

唔覺唔覺原來已經有三個月無update過燒腩仔嘅行路問題,就連物理治療我哋都已經完成咗三次,再唔記低佢怕且艾菲都唔會再記得,趁有時間要簡單D寫返出來。

第四次物理治療:



因為知道呢次會換新姑娘,米高又話唔係太方便請假,最終坐月中嘅艾菲決定自己跟返,偷走同燒腩仔去物理治療,順便同呢個仔拍吓拖氹吓佢開心。

第一次見新姑娘,燒腩仔表現尚可,亦明顯新姑娘比較識同小朋友相處,同燒腩仔溝通得比較好,例牌都係叫佢做單腳跳,雙腳跳,跳彈床,同撩圈圈呢D嘢,相對上次嘅表現明顯係有進步。

姑娘見佢OK,跟手就畀佢試行平衡木,估唔到第一次行嘅燒腩仔好OK,姑娘見佢行得悶悶地就畀個任務佢,要佢由平衡木嘅一邊運圈圈去另一邊,佢都完成得到仲玩得好開心。

臨走前姑娘話佢雙腳跳同單腳跳都合格,叫艾菲返去多D同燒腩仔練習腳貼腳(前後)咁行,目標係令佢喺四歲時行到四寸闊嗰種平衡木。

第五次物理治療:

呢次艾菲終於坐完月,米高又話請到半日假過來幫手,咁艾菲就一湊二咁帶燒腩仔去診所會合米高,一心諗住有米高睇住,可以同BB豆豬坐埋一邊望吓就算。

一去到姑娘先同燒腩仔做雙腳跳同單腳跳,再安排燒腩仔跳十分鐘彈床,喺艾菲同米高嘅督促下總算順利完成,之後姑娘就叫佢玩撩圈圈,明顯越做越順表現良好。

之後姑娘就教佢拋波波,畀咗一桶波波池D膠波佢,向住個窿拋過去,起初佢都係掟嘅多,但喺米高嘅幫忙下,都慢慢掌握到拋同掟嘅分別。

拋完波姑娘就畀咗個大size嘅波佢向住彈床掟,要佢學埋接波呢個動作,睇得出佢係做到,只係衰在唔專心同心急,我哋唯有不停喺側邊叫佢冷靜,教佢做好接嘅準備,數咗123先掟,最後總算成功完成到。

最後姑娘就叫佢去行平衡木,艾菲見差唔多時間就問姑娘借咗間房來泵奶,搞掂出返來米高已經話走得,話姑娘無特別嘢講喎... >.<