2016年2月24日 星期三

拆利是



一年一度元宵佳節,連燒腩仔學校都叫大家著華服返去慶祝,可惜呢個小朋友星期六朝又忽然起燒,一燒就三日唔停,呢日唯有病假一天留喺屋企休息,然後成日無嘢好做又唔願瞓,同佢用泥膠搓咗D粒粒扮湯圓(艾菲都有係咁易同佢介紹吓咩係元宵),跟手就拎晒佢D利是出來拆啦﹗



拆利是似乎係每個小朋友最著緊嘅一環,一聽到有得拆利是,燒腩仔即刻收好晒D玩具等艾菲,而為咗令件事變得更有意義,艾菲就要佢幫D利是封做返配對,將一樣嘅封放埋一齊先准拆,起初都有心機做㗎,但對吓對吓開始同艾菲講佢「搵唔到」兼走咗去(因為個量其實都幾多),氹到口水乾先終於完成到。

2016年2月22日 星期一

飲糖水(25W)

由於燒腩仔公公有糖尿病,所以艾菲係屬於妊娠糖尿高危人士(之前燒腩仔姨媽係中咗㗎),第一次去QE見姑娘時,就已經畀咗個期艾菲喺年廿八返去飲糖水(糖水一般係26-28W去飲,不過艾菲個預產期係改遲咗幾日,但QE話唔超過一星期佢哋都跟最後一次經期計)。

呢胎無上次陀燒腩仔時咁大食,但就超鐘意食垃圾食物,杯麵薯片汽水之類嘅無益嘢,艾菲係完全無戒,仲要年廿七晚返咗娘家食團年飯,所以做test前只係戒咗一日白飯咁大把,雖則上次見Dr Wong時佢話應該無咩問題(BB豆豬size唔特別大),但心入面點都有少少怯。



凌晨十二點開始戒口,水都唔敢飲太多,然後第二朝未九點已經到咗QE(9:15嘅booking,不過怕好似上次喺健康院咁搞到十二點幾先有得走,所以專登早少少到),一到二樓就有個阿姐指示跟住排隊(完全無睇你係幾點期),9:10左右已經可以入抽血房抽第一次血,然後出來就埋counter位拎呢枝傳說中嘅糖水。

人生中第二次飲糖水,老實講艾菲唔覺得難飲,暖暖地又甜甜地咁啦,飲完亦無反胃嘅感覺,只係keep住要去洗手間,不過眼見其他明顯係第一次飲嘅媽媽飲之前好驚嘅表情,甚至畀隔離嘅老公嚇,真係忍唔住笑。

飲完交返去counter到,阿姐就會畀個時間你幾時去抽第二次血,兩小時內無得離開醫院同食嘢,咁艾菲都早有準備,一早帶定書去慢慢睇,不過啦...真心覺得宜家D人無乜公德心,雖則呢到唔係圖書館本身有開電視,但都唔好任由小朋友開住speaker大大聲喺到睇普通話卡通嘈住人啦,其實呢個世界有樣嘢係叫耳筒㗎,終於坐咗大半個鐘艾菲都忍唔住要轉個稍為寧靜嘅位繼續坐落去。

2016年2月18日 星期四

Kill Time好物

唔知點解,燒腩仔讀親嘅學校都無咩假放,就好似今次嘅農曆新年假,亦只係由年廿七放到年初七(無錯,佢今個星期一已經開始返學啦),但艾菲知道有D學校係放到初十,甚至十五先返學,放咁多日假,就算學校有假期作業,總不能消磨晒全部時間,艾菲又未必日日行得開帶佢去街放電,所以留喺屋企嘅時候總要搵D嘢畀佢做來kill time。



前排執屋,艾菲就搵返D之前in幼稚園或者學校生日會時收到嘅小手工套裝,平日無咩機會拎來玩,呢D放假嘅日子正好係拎出來用嘅時候,每套入面有齊所需物料,又有圖樣畀你跟住做,就算係無咩美術天份嘅艾菲同燒腩仔都可以輕易完成,就好似呢隻紙袋雞仔,燒腩仔做完不知幾有滿足感。



不過艾菲最推介嘅,其實係呢個馬賽克貼畫,可以訓練小朋友嘅小手肌之餘,亦可以考小朋友嘅認數字能力,耐性同觀察力,重點係艾菲上淘寶望過,呢種貼畫只需幾蚊一份(淘寶search馬賽克貼畫就會搵到),抵到無朋友﹗

2016年2月16日 星期二

相愛十年



十年,唔係一個短時間,能夠同一個人一齊走過十年,艾菲覺得絕對唔係一件容易事,特別係對艾菲呢D咁任性嘅人來講,十年前決定同米高一齊時,真係邊諗到我哋可以一齊到咁耐,認真半年唔分手已覺偷笑。

回望返十年前嘅時光,好多嘅剛剛遇著啱啱,原來緣份嘅嘢就係咁巧妙,喺跌跌撞撞之後畀艾菲喺對嘅時間遇上對嘅人,早一分遲一秒大家可能就此擦身而過,然後發現甚麼對的時間錯的人,或是錯的時間對的人,通通都忘記佢吧啦﹗

細水長流嘅十年,講真唔係完全無考驗,但我哋都一一跨過咗,宜家雖然已經變得老夫老妻,但艾菲敢講關係肯定比十年前更好,彼此更了解對方嘅需要,一句說話一個眼神已知對方心意,既是情人亦是知己好友,咁嘅關係真係好難得。

自從結婚之後,好耐無慶祝過拍拖紀念日,雖則話今年係十周年紀念,艾菲都無諗過要慶祝,難得比艾菲更無心肝嘅米高,居然提出早一日買個蛋糕來食(因為正日遇著年初一),點都叫做有D表示咁話喎,一打開蛋糕盒見到蛋糕面有朵花,艾菲係完全無冧冧豬嘅感覺,只係心諗「乜你揀個咁老土嘅款嘅」(但個蛋糕其實係幾好味),仲專登唔食朵花留返畀佢自己慢慢歎,kakaka...

2016年2月15日 星期一

猴年大吉﹗



新年快樂﹗

我燒腩仔喺到祝大家猴年生生猛猛﹗身體健康﹗心想事成﹗大吉大利﹗一團和氣﹗財源廣進﹗

今年我遲咗出來恭喜大家,全因我D燒係一直燒到年初一先肯退,到宜家仲係兩行鼻水同勁咳,兼夾胃口keep住麻麻(艾菲:除咗食糕食糖食朱古力食蛋糕,餐餐食唔到一半就話唔想食),但好彩嘅係無影響一年一度嘅拜年活動,由年初一就一直跟住爸爸媽媽四圍去拜年到年初五。

宜家我大個仔知道多咗新年嘅嘢,識得講恭賀說話同收利是要雙手接加講多謝,不過媽媽就話我比上年更有個性同脾氣,成日入屋唔願叫人要warm up一輪先好少少,同埋成日失手喺個全盒到,期望我出年再大一年會做得好D喎...

而我亦想喺到祝爸爸媽媽身體健康﹗繼媽媽同我病完之後,緊接住就係平日好少病嘅爸爸病倒了,你要快D好返畀心機搵錢養我同妹妹同媽媽㗎﹗媽媽就要順順利利生個妹妹畀我玩﹗自己呢就聰明伶俐快高長大同收多幾份玩具啦﹗恭喜恭喜﹗

2016年2月7日 星期日

小幫手齊備年



燒腩仔嘅病情keep住反反覆覆,由年廿七晚開始又燒過,一直暗暗燒食藥都唔多退,但見佢好精神咁樣,我哋唯有當佢無乜嘢,自我安慰佢可能係發骨折(又真係高咗1cm喎),不過就唔多敢帶佢四圍去,連洗邋遢都拖到年廿九先做,然後米高一拎個吸塵機出來,燒腩仔已經第一時間搶住話要幫手,哈...今年真係大個仔啦喎﹗



見佢咁積極想幫手,梗係又畀返入全盒呢個任務佢做啦,一邊黑瓜子一邊紅瓜子,話咁快就入滿。

2016年2月6日 星期六

燒腩仔揮春



一年一度燒腩仔揮春終於都出場啦﹗今年艾菲咁嘅身勢,的確係有諗過唔整㗎,但整開咗忽然停產,燒腩仔婆婆實會好失望,所以見仲頂得住就照整啦﹗



第三年整揮春,每年都同自己講早D開工,一月頭已經同燒腩仔剪定頭髮,一月中就同兩個小model影相,今次不得不讚燒腩仔大個仔咗好影咗,以前成日影影吓走咗去無來合作嘅佢,今年喺氹吓玩吓嘅情況下,艾菲一個單對單同佢影一個鐘就搞掂晒(不過影完腰骨痛咗成晚>.<),反而表妹仔啦...真係影到艾菲無晒心機,成村人勁落力氹佢都唔肯就範,全程扁晒咀好可憐好委屈嘅樣,要出動至愛姨丈米高先肯畀少少面笑吓(佢好奇怪由BB開始已經係要見到米高先肯笑)。

2016年2月5日 星期五

行年宵@學校



年廿六,亦係燒腩仔農曆新年前最後一日返學,學校一早安排咗行年宵嘅活動畀大家玩,仲叫大家一齊著華服返去應吓節,點知燒腩仔早一日忽然發燒(其實艾菲病完都一直擔心佢中招㗎啦,唉...),到第二朝仲有少少低燒,keep住食藥就退唔食藥又燒咁,正常情況下艾菲應該係會同佢請病假唔返學,但佢呢朝係超精神咁喺間屋走來走去,艾菲話同佢請多日病假即大叫「唔好」,好堅定咁話自己好返同好想返學校玩(之前一日問咗妹豬媽,畀佢知道呢日會有好多嘢玩啦),的確難得一次嘅行年宵活動,錯過咗係好可惜嘅,所以同米高商量後決定搏一搏,畀佢食多劑退燒藥同帶好口罩先准出門口,亦感恩佢之後真係成個下午同夜晚都無再燒,呼~



佢哋返到學校無耐,已經有做義工家長嘅同學仔家長send相過來,睇到成班小朋友著晒華服,cute到不得之了,而學校就超好心機,真係好似年宵市場咁set好晒一個個booth,畀小朋友排隊埋去玩,而每個小朋友都獲分配一定數量嘅假錢來買嘢,單係睇相已經覺得好好玩啦﹗

2016年2月4日 星期四

行年宵@維園



一年一度行年宵嘅日子又來到,原先艾菲計劃星期六先去行去逼,點知星期一天雨關係,學校個親子陸運會取消咗,忽然停課兩日無咩好做,星期一落雨加艾菲成手嘢未做又唔去得邊,星期二點都要帶呢個小朋友出去放放電,同米高商量完之後就決定呢晚帶佢過海接爸爸放工,順便去行維園年宵,呢個燒腩仔一聽到有得接爸爸放工不知幾興奮,仲一早就嘈住要坐叮叮車,廿四孝慈父當然會滿足佢啦,喺灣仔食完飯我哋就坐叮叮去維園。



記得之前幾年都係熱到要除衫,今年難得可以喺11度低溫下行年宵,感覺係有氣氛好多,而且燒腩仔今年開始大個,知道行年宵係咩嘅一回事,未入場就已經識得同我哋講價,話自己要買個風車走(佢唔知點解係好鐘意風車㗎),艾菲反問佢波波同風車只可揀一樣,佢都誓神劈願咁答艾菲話買風車,真係咁堅定?姑且睇吓點...

2016年2月1日 星期一

一切安好(24W)

以為捱過最凍幾日咁叻豬會有運行,點知兩日後回暖即中招,大傷風勁流鼻水兼喪咳,到宜家仲係咳到甩肺咁滯,被逼休息幾日咩都做唔到,好彩星期六朝米高幫手帶燒腩仔返興趣班,等艾菲可以抖返半日,燒腩仔今日又乖乖肯陪艾菲瞓咗兩個鐘晏覺,叉吓電總算好少少,預計來緊一星期會忙到爆廠(唔好問忙咩,其實艾菲都唔明點解每個農曆新年前都咁忙,重點係已經唔諗住大掃除),連本來諗住上星期整嘅揮春都仲未郁過,刻不容緩都係寫咗上星期BB豆豬去覆診嘅嘢先,否則應該唔知會拖到幾時先記得再寫。

星期一下午,離開青衣公園後我哋就直接坐車出尖沙咀覆診,呢日診所超多人,入到去連想搵個位坐都難,照例都係登記,量血壓,磅重,同驗小便,so far血壓同小便都正常,重量應該都OK,到目前為止只係重咗12磅左右, 至於個肚就仲未過34寸,試過喺樓下撞到兩pair街坊朋友(米高兄弟),完全無人發現艾菲有咗(我哋到宜家都無特別同親友講),連燒腩仔D同學仔媽咪都睇唔出艾菲個肚,係燒腩仔走去同同學仔講「我媽媽肚入面有BB」,先忽然畀同學仔媽咪發現...

不過個肚唔大,肚紋嘅危機就已經四伏,呢排天氣乾燥,個肚係長期處於超痕同甩皮狀態,已經密密搽肚紋膏保濕,但基本上半個鐘後又打回原形,沖涼時更清楚見到一條條充晒血嘅血管,真係唔到艾菲唔擔心個肚皮今次保唔住,而另一樣令艾菲好唔舒服嘅就係鼻敏感,上次陀燒腩仔頂多係間中流鼻血,同後期瞓覺時有透唔到氣嘅情況出現,今次就好早期已經瞓覺時覺得透氣唔舒服要墊高瞓,更加係鼻敏感嚴重咗好多,幾乎每朝都邊打乞嚏邊同燒腩仔刷牙洗面,特別係早幾日凍就更加嚴重。

入返正題講覆診,呢日等咗大半個鐘先有得見醫生,好彩唔使返學嘅燒腩仔心情大好,喺出面等嘅時候都算合作無扭無大叫,入到房又識大大聲叫醫生叔叔,仲走去同Dr Wong講自己喺青衣過來,同埋話自己有個新嘅McQueen水樽,見佢咁口乖Dr Wong都有同佢吹咗兩咀,但佢兩個都應該係本身就溝通唔來㗎啦,哈哈哈...

Dr Wong先同我哋睇返之前個結構報告,解釋BB豆豬一切正常,然後就埋位照超聲波,例牌睇頭,睇肚,睇腳骨,睇眼球,聽心跳,結論係BB豆豬一切安好,已經有磅幾重(Dr Wong話出世時通常會重過第一胎),臍帶暫時無纏頸,頭仔仲未調落下面,艾菲笑指今次真係想理都無乜時間理BB豆豬,Dr Wong即安慰艾菲,話事實證明就算唔理佢都會自己正正常常咁大,而且第一胎難湊第二胎通常會好湊好多,really?係艾菲就唔使咁驚啦﹗