2013年9月30日 星期一

洗澡玩具收納袋@Aeon living plaza

燒腩仔有不少沖涼玩具,不過洗手間一直沒一個比較好的位置存放,每次跟他洗澡後都要找位置吹乾再放回玩具箱,所以這幾個月以來艾菲一直在物色那些放沖涼玩具的網籃,見過frisher price有但盛惠二百多元,感覺有點「搵笨」feel所以不捨得買,後來見過有一款只是兩個鈎加一個網袋都要三十多元,艾菲於是把心一橫決定自行DIY。



一直打算去Aeon living plaza找個網袋,再自行加兩個浴室鈎了事,還盤算著找不到網袋的話可能用洗衣袋代替,怎料逛著逛著的網袋未找到,便讓艾菲找到這款三層式玩具收納袋﹗還要是用洗衣袋的物料來造﹗即放浴室絕對無問題啦﹗Good﹗

2013年9月28日 星期六

Monkey呀﹗

隨住燒腩仔擒梳化嘅技術越來越好,由初初要擒幾次先有一次上到梳化,到中段上到但唔識落,成日用頭落地要我哋係playmat接住佢,再到後期隨時都可以係梳化到上上落落,可能佢已經覺得擒梳化呢個玩兒無乜難度,鐘意挑戰難度嘅佢,最近除咗鐘意擒上梳化頂搞D毛公仔之外,仲鐘意咗做空中飛人由梳化擒過放隔離嘅high chair...

話咗佢好多次唔可以,惡樣say no加打手仔都試過,但呢隻仔基本上係你越叫佢唔好,佢越要去做嘅朋友來,某一晚出完街返屋企,當艾菲同米高都忙住執嘢嘅時候,呢隻Monkey又唔知幾時擒咗上梳化,再完全唔知死咁擒緊張high chair,學肚B媽話事頭,係安全嘅情況吓,艾菲梗係要影低佢D衰嘢公諸於世啦﹗



2013年9月26日 星期四

紅雞蛋

今日係燒腩仔農暦生日,艾菲細個嘅時候,每逢屋企有人農暦生日,婆婆一定會晨早起身烚雞蛋畀大家食,宜家輪到艾菲做人媽媽,當然想將呢個傳統保留啦,但最近pat pat有D痕嘅艾菲就唔甘心於只係烚蛋咁簡單,而係想整紅雞蛋畀燒腩仔,點講都係佢第一次過生日嘛,梗係要花多D心思啦﹗

整紅雞蛋一般有兩個方法,一個係傳統用紅花粉染色,整嘅時候都有D技巧先染得靚,唔小心嘅話更加會染到成手紅晒,而且始終係化學嘢食落肚唔多好...第二個方法係想當日陪月姨姨教,就係用紅色玻璃紙將隻蛋包到好似糖咁,然後再縛條絲帶係上面,呢個方法最安全又簡單,但艾菲參考過網上圖片,覺得賣相始終麻麻...

正當艾菲十五十六,唔知揀邊個方法好嘅時候,忽然係google見到「天然染蛋法」呢幾隻字,click入去睇係教用唔同食材去染雞蛋,原來外國人好興係復活節時自己染雞蛋來做復活蛋,而染料就係唔同顏色嘅食物,例如紅洋葱皮,紅椰菜同藍莓等,而染紅色嘅只需要用紅菜頭就OK。


2013年9月24日 星期二

大風吹點算好???

天文台一早預告星期日打風天氣轉差,艾菲早已決定整天跟燒腩仔留在家那裡也不去,但一日時間這麼長,怎樣消磨才好呢?



米高一早被召回公司(完全唔明點解D老闆明知打風仲要人返工咁變態囉﹗D嘢唔可以早一日搞掂㗎咩?),燒腩仔一覺醒來已經見不到爸爸,為解相思之苦就讓他跟爸爸有九成似的伍餐肉哥哥(即Monchhichi :P) 玩一會兒啦(艾菲平日好寶貝佢,唔係好願畀佢掂伍餐肉㗎)﹗



要一整天留在家那裡也不能去,當然要想方法替燒腩仔放電啦,然後艾菲心血來潮就開了他的私家波波池出來給他玩。

2013年9月23日 星期一

出走港大&數碼港

米高難得地在中秋節有一連幾天假期,只恨有隻天兔跟尾破壞氣氛,為怕以後的天氣因打風而轉差那裡也不用去,唯有在追月日即爭取時間帶燒腩仔出去玩,而我們今次便去了港大和數碼港了。



之前plan去那裡玩時,米高已提過幾次想帶燒腩仔回他的母校港大逛,只是艾菲覺得燒腩仔仍未懂行,千辛萬苦去到又拍不到靚相好像有點浪費,於是便一拖再拖想遲一點才去,但見米高今次又興緻勃勃地提到去港大的事,艾菲還是不要再拒絕好了。



每次到港大必遊Main Building,艾菲真的很喜歡這些英式建築,超羨慕米高想當年能夠在這些舊建築內上課,未知燒腩仔他日會否有幸步爸爸後塵在這裡上課呢?不過燒腩仔你也不用感到有壓力的呀,爸爸媽媽屆時一定會放手讓你自行決定要不要讀大學和讀那間大學,一定不會逼你做非你意願的事﹗

2013年9月22日 星期日

鯉魚門半日遊

自從燒腩仔出世後,每逢米高放假艾菲都想一家人出去玩,讓燒腩仔能夠和陽光玩一玩遊戲,至少不要只懂留在有冷氣的商場嘛,而中秋節前的星期日,我們便心血來潮帶了燒腩仔去鯉魚門玩。

鯉魚門,是艾菲和米高當日影婚紗相的其中一個景點,亦是我倆拍拖時常到的地方,兩個人坐在海邊吹吹海風,看看人家釣魚和影沙龍,然後便是一個下午,不知多麼悠閒寫意,但今次帶燒腩仔同行當然不能如此hea啦,畢竟幫他放電才是此行最主要目的﹗



天文台說當天會有驟雨,但結果是超好天,先替首次到臨鯉魚門的燒腩仔拍張到此一遊照。

2013年9月20日 星期五

賞月@佐敦谷公園

雖然之前已經分別跟四大長老做節,但跟燒腩仔一起過的第一個中秋節總不能hea過吧,一家三口在家樓下吃過中秋飯便帶著燈籠出發到佐敦谷公園賞月了。



中秋夜的佐敦谷公園,雖然沒任何花燈裝飾,卻比上次星期日來還要多人和熱鬧,整遍大草地都坐滿了人,不過因為公園前身是堆填區,所以公園內不可點蠟燭,感覺是比較安全和清潔的,或者艾菲明年都可以試一試帶燒腩仔過來野餐賞月呀﹗



可能因為人實在太多,所以燒腩仔到達時有點呆滯,於是便先帶他去插針都難入的遊樂場warm up一下,上次來玩時燒腩仔只得兩個多月,艾菲完全沒留意遊樂場有甚麼設施,今次過來才發現遊樂場有一邊是專門給兩至五歲小朋友玩的,有些矮身滑梯和敲敲打打的玩意,都幾good喎﹗

2013年9月18日 星期三

音樂燈籠

一年一度中秋節又到,艾菲和燒腩仔先在此預祝大家中秋節快樂

記得去年這個時候還在期待著燒腩仔的來臨,今年已經可以和燒腩仔一起過節,而長輩們當然都搶著買燈籠給燒腩仔玩啦,幸好其他長輩們都很通氣用利是代替,買實物的quota便留了給四大長老。


集萬千寵愛在一身的燒腩仔,今年便收到兩個燈籠,分別是婆婆送的反斗車王吹氣燈籠,以及嫲嫲送的會行會走閃燈直昇機膠燈籠(呢個燈籠實在型爆﹗艾菲真係咁大個女都未見過呢隻燈籠呀﹗),而燒腩仔對兩個燈籠的反應都是一樣~O咀﹗﹗﹗他基本上是完全沒興趣去碰它們,艾菲好不容易才哄到他拿起燈籠拍張照片呢﹗

2013年9月16日 星期一

幼兒教材@淘寶

花了個多星期的時間來搬blog,搬好以後卻沒了那股寫blog的衝勁,結果很多東西想寫都是遲遲未寫,一拖再拖的又一個星期了,為免這堆瑣碎事最終會消失於空氣中,還是的起心肝去寫吧,而今次要寫的便是拖了很久都未有時間寫的淘寶幼兒教材了。

Your Baby Can Read


之前聽妹豬媽介紹時已經想買,最buy它全部圖片都是實圖較迪士尼美語世界的圖畫好(雖然D相舊咗D),不過因為前陣子有事忙著所以一拖再拖,拖到五月底才淘回來,全set九件套裝有DVD,學習卡和圖書,270人民幣直接送到香港,研究過香港賣千多元的正版,跟這套基本上是沒多大的分別(只係圖書D字原裝有cover要拎起先睇到D圖,但呢套就無一打開就係圖)。

燒腩仔九個月大開始每天給他看一次starter那隻DVD(通常係艾菲煮飯時就放佢坐highchair睇),再間中給他玩學習卡和看圖書,內容當然不及迪士尼美語世界吸引,但中間都會有些兒歌間場,至今已經看了兩個月,他雖然未學識DVD教的詞語,但就因此而終於學懂了揮手,見到DVD中的小孩揮手,有時都會跟著一起揮。

2013年9月10日 星期二

無痛搬家?﹗

多謝小檬媽嘅報料,以及肚B媽嘅搬家教學,用咗超過半日嘅時間,艾菲終於都搬晒yahoo blog嘅所有字同相過來啦﹗仲好順手咁幫D舊相都加埋水印添﹗勁愛你哋呀﹗

Yahoo Blog問都無問話執就執,搞到本身已經忙爆嘅艾菲要拿拿臨搵屋搬,再好心急咁試唔同方法搬D舊blog過來,結果犧牲咗好多晚嘅睡眠時間(呢排燒腩仔開始瞓少咗,我更加少咗時間做自己嘢﹗) ,始終搬家程序一日未完成,真係無乜mood繼續寫新blog。

今次話就話無痛搬家,但過程中艾菲就覺得都幾痛苦,唔知係艾菲個人問題,定其他人都會遇到嘅同樣問題呢?大家不妨都share吓你哋嘅搬屋實況呀﹗

話說艾菲用Blogtrans搬過兩次過來,第一次匯入時仲未破解到救相嘅方法,結果D blog過到來齊字齊標題但就唔見晒D留言,艾菲本身都諗住back up file既然都有keep到留言,逐遍手動upload返D相過來就算。

到第二次破解到救相嘅方法,艾菲掙扎咗陣就決定delete晒舊D blog再由頭搬一次(當時已經手動搞掂咗大約三分一),今次D留言終於出返晒來,但就輪到D相變晒原始大小嘅超大size要逐張click入去改size(本身有瑣定size嘅就無事),亦有部分相唔知點解file name前有一點而show唔到要自己改html code(好彩以前份工都有整過html code,唔係真係完全唔識),兼艾菲個back up file唔知點解原來係唔齊相(可能我係兩部電腦之間搬來搬去整唔見掛)要逐篇開來望再upload返D相上google drive,最絕係有D後期嘅blog(yahoo blog升級前D blog)竟然不翼而飛,好彩艾菲有逐篇check先可以自己手動加返落去﹗

睇到艾菲對眼幾乎甩出來,差D發脾氣鬧爆yahoo咁滯,宜家總算叫做搬好晒安頓落來,可以同yahoo正式分手啦,真係希望以後都唔好再有下次﹗﹗﹗唔該﹗﹗﹗

2013年9月7日 星期六

十一個月


篤...篤...篤...篤...篤...篤...呢個牌到底係咩來?做咩插係個蛋糕仔上面阻住我食嘢㗎?


嘻...係我燒腩仔呀,媽媽話我今日十一個月大,佢整咗個蛋糕仔畀我應一應節喎﹗生日牌只係佢無意中係櫃桶底搵到,所以插落去等個蛋糕仔靚D咋﹗


呢個月我嘅飲食大致上都係一樣,一日五餐,三餐奶兩餐固體,份量都無乜點變,只係胃口差咗D,好多時下午茶餐奶都唔願飲,飲咗四安幾就會拎返個奶樽出來,就算固體食物都係睇心情,想食時我可以極速食完成個大人碗嘅飯,唔想食時食到碗飯凍晒都只係食到一半,不過自從媽媽買咗隻新杯畀我之後,我宜家用飲筒飲水叻咗好多,無漏到成身都係水啦,媽媽今日仲話畀隻BB匙我試吓自己「畢」嘢食添,但我就只係想拎實隻就算囉(拎實咗就唔畀人掂,一掂即超惡咁嘈到拆天,根本無可能教到佢畢嘢食﹗)﹗

今個月我都有試食新嘢㗎,有車厘子,冬菇,生菜,蛋白,牛肉同菠菜麵,因為去咗兩日澳門同病咗成個星期,加上媽媽呢排好忙所以只得咁少新嘢食啦,而媽媽見我前排食粥食得麻麻就試咗煮爛飯我食,我都幾鐘意覺得幾好味㗎,不過因為要咬就食得比較慢,始終都係得下面兩隻牙嘛,所以媽媽暫時都係煲粥多,爛飯只係爸爸朝早起身唔記得焗粥時先煮我食。


至於瞓覺方面媽媽就話我差咗好多,我係可以一覺瞓天光,亦keep住日頭瞓三次晏覺,但除非我無電好眼瞓,否則都要搞好耐先肯瞓,仲學識合埋眼扮瞓著添,只要媽媽一放低我落床,我就會碌大隻眼爬返起身望住佢笑,就算瞓著都好多時瞓半個鐘就醒,媽媽話來緊呢個月可能要同我調一調個schedule,或者減其中一覺晏覺睇吓我頂唔頂得順喎﹗


呢個月我除咗繼續四圍爬同扶住傢俬四圍行,跟住媽媽四圍搞搞震之外,亦開始可以鬆開手唔扶嘢行幾步碎步,但就依然唔鐘意用學步帶,媽媽一將條帶套落我身我就會即刻放軟對腳爬走,另外我仲學識咗自己坐上玩具車同自己落車添,每次返婆婆屋企一聽到獅子車個音樂停咗就會落車去車頭㩒返著佢。


媽媽話我呢個月嘅認知能力有好明顯嘅進步,佢終於明白我係唔逼得,D嘢我要識嘅忽然有一日就會識,我唔想做你點逼我都無用,例如佢忽然有日發現我玩推珠仔已經進展到玩中間D比較難嘅軌道,仲有佢教咗我幾個月嘅入圈圈,我一直都只係掟落條柱,但今晚就忽然開竅識得自己慢慢放入條柱到,而我呢幾日都終於識得見到人Say Hello時要揮揮手,Bye Bye就要開合手,至於媽媽講「好嘢」時我仲未識拍手,只係會好開心咁fing對手。


呢個月我講多咗好多嘢,成日係屋企依依哦哦,媽媽仲話屋企好似多咗個外國人係到住,成日講好多BB話係佢唔識聽,到宜家佢只聽得明我講爸爸,媽媽同mum mum,其他音就有疑似哎吔同婆婆,而我嘅表達能力都越來越強,例如我係街玩緊lego媽媽話要走,我會嘈到拆天話佢知我唔想走,行百佳來遠見到缸魚又會踢晒腳叫媽媽快D推我埋去睇,而我亦終於聽得明媽媽講嘅「NO」係唔准嘅意思,每次我想搞把風扇或者想跟佢爬入廁所,只要佢大大聲加惡樣講聲NO我就會停低同縮返隻手(但有時都會唔理繼續搞﹗)。


我宜家好鐘意黐住人㗎,係屋企好鐘意跟住媽媽四圍走,如果瞓醒晏覺唔見咗媽媽我會喊到癲,爸爸返來又會好開心咁即刻爬去要佢抱,有時自己玩緊時都會忽然走去扯住佢哋條褲攬實佢哋唔畀佢哋走咗去,見到佢哋換衫我更加會大叫提佢哋帶埋我走,出到街我就會好似放監咁四圍撩人玩,不過如果你同我講嘢,尤其話想抱我或者掂我手仔嘅話我會驚到喊,我除咗識得嘅人之外唔畀其他人抱同掂㗎﹗

2013年9月5日 星期四

真正的再見

由於呢幾日真係好忙,忙住幫燒腩仔報N班(已經係hea報,但都要認真填吓form嘛),又忙住上網去阿卡將敗家(咁啱有fd臨時臨急話我知佢去日本問我有無嘢買,咁艾菲梗係唔可以miss咗呢個難得嘅敗家好機會啦),仲有就係忙住準備燒腩仔來緊慶祝一歲生日嘅濕星嘢(頭炮生日慶祝活動原來下星期就係,但我居然顧住敗家唔記得就來無時間準備﹗),兼夾來緊星期六係燒腩仔十一個月大嘅日子要幫佢寫返篇blog(呢個係我每個月好唔想miss嘅嘢﹗),所以新blog入伙咗六日仲係無乜進展...

之前艾菲一直用螞蟻搬家嘅方式去搬D blog過去,因為覺得呢個方法雖然最白痴最麻煩但最安全可靠,到今晚開始見大家陸續直接將yahoo呢邊嘅備份搬過去,真係有D心動想照跟(因為呢排真係無乜時間可以咁樣慢慢搬),但最關鍵係D PM留言會變成公開留言,同埋save係yahoo呢邊D相會變死圖,令艾菲超級苦惱唔知點搞先好,於是心大心細下上網再爬吓文,結果畀我搵到一個可以將yahoo相簿全部備份再放落blogspot嘅方法,即換言之如果呢個方法成功嘅話,艾菲只需要逐個post換相就OK,感覺好似比宜家逐篇blog copy and paste D字同逐張相donwload再upload去新blog簡單好多呀﹗

由於要試新方法,艾菲就必須將yahoo呢到備份,而備份後呢到就會變成read only,所以如無意外今次係真正嘅bye bye啦﹗大家以後就要係艾菲個新blog到再見啦﹗希望今次呢個搬家方法真係成功啦﹗wish me luck﹗

2013年9月2日 星期一

踩單車@九龍灣公園


自從上次跟燒腩仔試車之後,艾菲一直在尋找一個比較就近我們家,可以帶他去踩單車的公園,卻在search資料時才發現之前去過的佐敦谷公園不可以踩單 車,見朗朗媽介紹交通安全公園可以踩單車艾菲又試著找找看,但原來只有沙田那個才可以自由出入和踩單車,其他交通安全公園均需預約兼不可以踩單車,莫非要 將燒腩仔的單車搬去婆婆家,只可以一星期帶他去一次大埔海濱公園踩?

好不容易艾菲終於都找到了九龍灣公園可以踩單車,聽聞來的人不多但位 置都頗為偏僻,在啟業邨的後面近工業區那邊,就連艾菲的朋友自小在啟業邨居住都說未去過,艾菲如果想在平日一個人帶著燒腩仔和他的戰車去應該有點難度,但 為了燒腩仔艾菲還是想試試看,於是上星期便叫米高陪艾菲去探路,還很勇的不肯坐小巴過去,而是推著單車和燒腩仔由九龍灣地鐵站附近開始行過去,結果用了大 半小時行到艾菲身水身汗才到(已經係黃昏時間無咁熱)﹗
 

雖然辛苦,但沿路見單車上的燒腩仔一直笑笑口很enjoy的模樣,艾菲就覺得再辛苦也是值得的﹗而到達單車公園後艾菲更是興奮,不停跟米高說「呢到好靚呀 ﹗」一大個車場有兒童和初學者專區以及一條高架橋,傍晚時份開了燈以後格外美麗﹗雖然沒九龍城那個單車公園大,但勝在「人影都唔多個」,對小朋友和初學者 來說比較安全(之前經過九龍城個單車公園,好多時都聽到小朋友尖叫聲,跟住就係「哎吔」跌低咗嘅聲),Good呀﹗


我們先到兒童和初學者專區走一轉,地方不大但對小朋友來說,大概在同一地點轉一百個圈也不會厭吧﹗


之後便「偷雞」帶他走上高架橋(好似話小朋友同未識踩單車嘅唔准上㗎),有灣有上斜落斜都有點難度,感覺幾好玩﹗


落橋後有雪糕筒分格兩邊行車線,讓大家踩定了才慢慢轉灣,應該是用來減低意外發生的機會吧﹗


離開單車公園範圍,我們便帶燒腩仔到公園的另一邊玩,這裡有一個OK大的遊樂場,但沒有燒腩仔最愛「底褲韆鞦」﹗


 艾菲再一次特訓燒腩仔玩滑梯,但他依然超緊張,要挺直身滑下來,並送艾菲一個「O咀樣」﹗


 之後再帶他去玩這些音樂條,看著他很認真在玩這些音樂條的樣,艾菲頓覺燒腩仔最近長大了很多,早兩三個月前他對這些玩兒還未有興趣的呀﹗

本來想讓他多玩一會兒,怎料「雨神」再一次來找艾菲,天空忽然灑下一陣勁大的過雲雨,而艾菲還要懶醒的為減輕媽媽袋負重而沒帶雨具在身,只好和米高急急腳抱著燒腩仔和拉著他的戰車跑出去截的士速逃了﹗

新blog入伙@Blogspot


考慮咗一晚之後,艾菲決定唔等yahoo宣布啦,因為實在覺得佢信唔過,宣布關閉yahoo blog但又遲遲唔講到底輕鬆搬家搬去邊,如果係去佢收購嘅Tumblr艾菲更加係零興趣,所以自己先行行動,去blogspot開咗個新blog,螞蟻搬家式咁搬住過去先﹗

星 期六襯落大雨邊到都去唔到,於是爭取時間係屋企研究咗一輪,終於搞掂D版面同backdrop(睇怕都要等遲D有時間先整到個新header),始終用慣 yahoo blog一下子要適應新環境,真係需要一D時間去摸索,blogspot唔算難用但D相嘅擺法就硬係唔多啱艾菲心水咁囉(定只係艾菲未識用?),但無得揀 之下都要接受啦,艾菲仲好傻咁專登將個新blog嘅setting整到類似呢到咁添﹗

艾菲唔知大家來緊會搬去邊,真係好唔想同大家失散 呀,好想睇住大家嘅小朋友一齊長大,所以如果最終多人轉過去pixnet,而pixnet又可以提供一個方便嘅搬家方法的話艾菲都會係pixnet開多個 account(呢幾日上網睇文有講話pixnet可以提供幫忙搬家嘅服務,只需開一個pixnet account,然後email yahoo blog嘅account名畀佢就可以幫你全部倒過去pixnet個新blog到,但到底係點運作同要搬幾耐就無資料顯示囉),咁blogspot呢個 account就會做backup,in case咁好彩又是但一邊要關門大吉的話,都唔使好似今次咁傍惶啦﹗
唔經唔覺艾菲已經係 yahoo blog呢到寫咗263篇blog,但艾菲到宜家都只係搬咗11篇過去blogspot,進度緩慢到艾菲都唔知幾時先見到家鄉,仲要遇上mouse無電要 暫用米高隻mouse勁唔慣,但為咗燒腩仔艾菲一定會繼續努力搬㗎﹗來緊D新blog都會係blogspot到寫(呢到除咗有關搬blog嘅嘢之外都應該 唔再update,廢事之後越搬越亂啦),大家有時間就過來「追蹤」吓艾菲同燒腩仔啦﹗

新blog: http://missivyworld.blogspot.hk/