2015年6月23日 星期二

Beach Boy@半月灣



父親節正日,本來計劃一早起身湊仔,等米高可以抖吓休息吓,點知端午節當日有D意外,結果我哋邊到都無得去,錯過咗大好晴天,再見到唔少朋友喺FB洗版話游完龍舟水,恨到艾菲心癢癢,最後艾菲好衰咁聯同燒腩仔,一齊逼米高應承喺父親節當日陪我哋去海灘玩沙玩水,然後一大朝早執齊嘢,就一人拎住一袋出發啦﹗



一聽到去沙灘,米高只係諗住去最近嘅清水灣,不過清水灣假日一定逼爆兼夾等好耐車先出得返市區,見小豆子媽之前推介半月灣好似幾正,艾菲見都唔係太遠,有得畀燒腩仔坐吓船仔,出返來又可以喺西貢食飯,就決定跟風過來呢邊見識吓,由小巴站行出西貢碼頭好容易就會見到小豆子媽推介嘅貓記,成人來回$30一位,小童1米以下免費,買飛時阿姐仲提艾菲影低回程時間表,不過佢其實全日都keep住有船過去,只要見到佢哋船都可以隨時上船返返來。



買完飛等咗陣D阿姐就帶我哋上船啦,而準備上船嘅時候,居然畀我哋撞到一仔一家喎,原來佢哋都係去半月灣游水,嘻...小朋友可以有個伴啦,Good﹗只可惜燒腩仔係慢熱嘅朋友,唔係好肯主動埋去同一仔玩,再加上佢第一次坐呢D船仔,安全意識向來好高嘅佢,全程只係攬實袋沙灘玩具坐定定發呆,好似好緊張好擔心會有意外咁嘅樣,唔似一仔一上船就好enjoy咁睇風景。

2015年6月18日 星期四

Happy Father's Day

來緊個星期日就係父親節,唔知大家準備咗點同身邊嘅父親慶祝未呢?唔...艾菲到呢一刻仲未有任何idea點同米高慶祝,不過自己父親即燒腩仔公公呢,就早喺上星期日慶祝咗,慶祝方式並唔係往年勁hea嘅一家人出街食餐飯,而係由艾菲親自煮理一餐私房菜畀大家。



每逢大時大節,燒腩仔公公都一定會煮餐勁嘢畀我哋返去做節(艾菲屋企由細到大都係爸爸負責煮飯㗎),我哋翹埋雙手乜都唔使做就有得食,但話晒都係父親節,無理由仲要佢煮畀我哋食咁不孝啦,本來大家都諗住出街食餐好嘅就算,不過艾菲就唔知挑起邊條筋,居然自動請纓話煮畀大家食﹗

其實艾菲咁做係有原因嘅,一來係想挑戰吓自己嘅廚藝,二來都想叫大家上來幫手踩吓場熱鬧吓,等呢排成日話唔畀人來屋企,特別講明唔畀表妹上來玩嘅燒腩仔,嘗試吓做主人招呼客人嘅滋味,皆因我哋蝸居地方淺窄又無工人姐姐善後,所以朋友間嘅gathering都好少會選擇我哋屋企,只係好間中先有D朋友個別上來坐吓,好彩燒腩仔今次都無話好唔慣仲好期待添,燒腩仔公公婆婆上來之後,就懶叻咁同佢哋話「仲有好多人未來呀」,而經過艾菲密集式洗腦後,佢都無再專登蝦表妹,亦好願意借出佢嘅玩具同畀張舊highchair表妹坐。

2015年6月15日 星期一

Smaland@IKEA



由燒腩仔仲係BB時開始,艾菲每次路過Megabox IKEA個Smaland,都好想畀燒腩仔入去玩吓波波池,不過佢有高度限度,一定要over 90cm先玩得,而燒腩仔過去幾個月嘅身高,就偏偏一直停留喺88-89cm之間,終於等到上星期四晚心血來潮同佢度高,YEAH!!! 終於夠90cm高啦﹗梗係第一時間帶佢去玩啦﹗



星期五湊完燒腩仔放學就直接帶佢過去Megabox,已經即刻去4/F Smaland門口拎飛仔,以為平日下午頂多等一節就有得玩,點知已經派飛派到第十節八點半場,真係估你唔到咁誇張,有諗過同佢直接排後補位玩六點半場,但米高話反正唔急不如食飯先再慢慢玩。佢平日一節有45分鐘,每節15-20人不等,但周六周日假日的話,一節就只得30分鐘,而且每節成30人,所以平日來玩會舒服D盡慶D。



IKEA姐姐一夠鐘就會畀拎咗籌嘅小朋友入去玩(佢呢場得三個正選小朋友,所以拎唔到籌又想玩的話,真係可以試吓開場前早D去排後補位),大人拎返張飛尾就走得可以好放心咁去行街,場入面會有IKEA職員照顧小朋友同維持秩序,但今次話晒都係燒腩仔第一次入去玩,艾菲同米高都無走企咗喺出面等佢(有玻璃窗睇到佢哋喺入面做緊咩),而燒腩仔第一時間就跑咗去波波池到玩,一個人包場嘅感覺應該都幾正,之後後補大軍殺到就無呢枝歌仔唱啦﹗

2015年6月10日 星期三

P仔好煮意4

唔覺唔覺原來有成年無update過P仔麵包機喺艾菲屋企嘅近況﹗其實上年年尾的確有段時間冷落咗P仔,皆因燒腩仔開學之後成日發脾氣個人好燥,之後帶咗佢去睇中醫調理,點知醫師話佢個人好熱,要戒餅乾同麵包到12歲(中式包就得),雖然明知係不可能嘅任務來,但艾菲初時都好聽話真係無開P仔成四個月,後來發現我哋一家實在太為食,根本無可能戒得咁清,所以P仔又再次復活,艾菲包癮一起或者見到好食譜就會試整,只係開機嘅次數無之前咁密囉。:P

上年七月去日本時買咗兩盒cuoca預拌粉返來(其實香港都有得買,但硬係要去到日本先捨得買),返香港即刻試吓係唔係如傳說中咁正,於是一桶高大威加勁軟熟嘅楓糖吐司就此誕生,由落粉到焗完都聞到好香楓葉糖漿嘅味道,果然係貴得來物有所值﹗

試咗第一盒cuoca預拌粉之後好快就開埋第二盒來試,今次仲要爆桶添呀﹗又高大又軟熟超好味﹗真係好驚喜呀﹗用咗P仔咁耐都未試過焗得咁好,到底係酵母定係粉嘅比例令佢個效果咁好呢? 

2015年6月8日 星期一

32個月



我今日32個月大啦﹗不過今日唔係幾開心,爸爸媽媽無同我出去慶祝,因為我做功課時唔乖,連線時專登唔合作,結果搞咗大半日都完成唔到(艾菲:各位EE有無好方法氹小朋友做功課,每次遇著佢無心機做功課時,真係可以好勞氣同搞好耐都唔做),最終一家三口留咗喺屋企,白白浪費咗個美好周日...



喺食方面呢個月都係咁上下,每餐食一個大人碗嘅飯連餸,如果有汁撈飯會食得好積極,但如果係D唔特別鐘意食嘅飯餸就會搞好耐兼食到周圍係,就連飲杯水都會搞搞震唔多合作,一定要媽媽望實我飲先唔會倒瀉,但食零食或者飲湯飲果汁又可以食得好乾淨兼光速完成㗎喎﹗



瞓覺都係一時時乖, 成日唔願去廁所同刷牙瞓覺,爸爸媽媽十點叫我去刷牙,好多時搞到十點半差唔多十一點先入到房,上床後再同媽媽講東講西隨時搞到十一點幾十二點先肯瞓,不過一覺都可以瞓到第二朝十點,但半夜喊醒或者朝早七八點醒咗,就點都唔肯落床出房去廁所,會死忍到十點媽媽叫我起身除片先vee,至於晏覺都係keep住放學返來瞓一個鐘,好唔夠喉所以每次起身都要發一輪脾氣先清醒到。

2015年6月3日 星期三

透心涼鮮果雪條



天氣越來越熱,除咗玩煮飯仔嘅雪糕雪條之外,都真係要食返D真嘅雪糕雪條來消吓暑先掂﹗對於屋企有兩部雪糕機嘅艾菲來講,都唔知幾多年無買過盒裝雪糕返屋企啦,不過呢排打爆咗屋企個冰箱無咩位,所以米高order嘅芒果牛奶雪糕要遲D先整到,但唔太阻地方嘅雪條就無問題,襯米高星期日返工獨留我哋兩母子在家無所事事,一於同燒腩仔一齊整幾枝健康又好味嘅鮮果雪條來消磨吓時間先﹗



燒腩仔:嘻...媽媽話屋企唔養懶蟲,想食雪條就要幫手整喎,所以我燒腩茂又出場啦﹗

材料其實好隨意,咁啱打開雪櫃有奇異果同菠蘿,我哋就決定整呢兩隻味,如果鐘意嘅話整西瓜,士多啤梨,蜜瓜,荔枝或者芒果都OK㗎﹗



燒腩仔:首先係要將D奇異果批皮切粒粒,然後加幾滴檸檬汁落去,再用攪拌機打成蓉就可以畢落雪條模到啦(打完蓉可以先試味,好似奇異果比較酸就可以加D糖落去中和吓)﹗

百厭星@九龍城寨公園



天意總是弄人,落咗兩個星期雨,終於等到個可以同陽光玩遊戲嘅weekend,點知撞正艾菲有D私務要做,無得帶燒腩仔出去郊遊,好彩做咗半日湊仔公嘅米高,喺屋企忙完之後就帶咗燒腩仔出來接艾菲食飯,見時間尚早仲話帶燒腩仔近近地去九龍城寨公園玩。



一聽到有得去公園玩,燒腩仔立即進入興奮mode,但艾菲就立即啟動港媽mode,怨米高無同燒腩仔搽防曬就出門口,又怨佢無預早通知等艾菲做定防蚊措施,重點係臨時臨急無帶大機喺身,只可以用iphone影相,不過呢日有D日落嘅太陽光反射返落來,最後影出來嘅相都acceptable喎。



九龍城寨公園其實都幾大,不過我哋帶住燒腩仔通常只會去兩個遊樂場玩,貪佢近住九龍城廣場一入返去就有冷氣,而呢到亦有唔少讀名校or名playgroup嘅小朋友來玩(睇小朋友著嘅校服同家長姐姐拎嘅書包就會知),家長們一般都會睇得小朋友比較緊,唔知係唔係呢個原因呢,呢日就有兩個家長,搞到要搵警察來分隔調停,其實帶小朋友來公園都係尋開心姐,小朋友亦唔會故意傷害其他小朋友,些少碰撞跌傷總係難免,有時做家長都要睇開D先得。

2015年6月1日 星期一

賣萌雪糕男@淘寶



多得波媽之前放波哥玩煮飯仔D相出來,成功毒到艾菲心思思去淘寶,左睇右睇套套Mother Garden嘅煮飯仔都想要,終於趁住呢排天氣越來越熱,淘咗套雪糕組合返來消吓暑,有齊雪糕水果棒同雪條仲連埋個架,都係六十幾蚊人仔咋﹗實在抵到爛呀﹗艾菲一收貨即刻拆出來玩,最意外係連燒腩仔都好like,日日一起身就塞D雪條雪糕畀艾菲食,Sweet到呢...



見呢期興搵D肌肉男來賣豬肉賣生果,睇到D姨姨們個個心心眼,艾菲都要出動屋企個背心男,等佢賣雪糕順便賣吓萌來吸引吓視線先﹗



艾菲:唔該,我想要個抹茶扭紋筒
燒腩仔:好,即刻整畀你