十一個月

媽媽忽然又消失咗成個幾星期，佢話佢好忙好多嘢blog唔切，但為免拖到我足一歲都未寫十一個月嘅進度，所以畀我打尖出咗場先喎...



先由食講起，我宜家每日食兩餐固體，大概一個大人碗多D嘅份量，另外就早午晚三餐媽媽奶加多餐小食，簡中會飲吓湯同果汁，由於媽媽已經諗唔到仲有乜新嘢可以畀我試，所以呢個月只係試咗翠玉瓜，木瓜，烏冬，兒童麵同星星粉，上面兩隻牙都開始生緊出來，可以原條粟米咬同識成條烏冬啜入口，雖然我十足哥哥咁食得，仲要一見星星餅即雙眼發光，餐餐食完又會爆喊扭再食，但我唔知做咩三個星期都無重過啦，條生長線又忽然跌咗落去，媽媽開始擔心我一歲返健康院時又唔合格...



瞓覺方面終於有D好轉，經過媽媽兩個月嘅努力，我宜家每晚十一點食完最尾一餐奶就會乖乖去瞓，然後一覺瞓到第二朝六點幾七點，飲完早餐奶再繼續瞓到十點幾十一點先正式起身，簡中我會五點幾就起身，不過媽媽同我講未夠鐘我都會乖乖瞓多陣，但前排流鼻水唔舒服，就試過四點起咗身後玩到七點幾八點先瞓返， 搞到爸爸媽媽都叫晒救命。

至於晏覺就好似之前咁，送完哥哥返學後就返屋企瞓，通常可以由兩點瞓到四點半，但出咗街的話我真係可以完全唔瞓，又或者扭眼瞓嘈一大輪先瞓一陣，然後瞓唔夠就夜晚喺到抆抆憎憎搞搞震，不過媽媽話為免我夜晚一覺瞓得差，已經下令過咗傍晚六點後唔准再瞓，寧願夜晚提早畀我瞓喎。



黐媽症開始有所好轉，雖然見到媽媽時都係要全天候跟到實，甚至成日爆喊要媽媽陪唔畀佢做嘢，但佢真係有事要出去時，都肯跟爸爸甚至婆婆公公，全程合作無扭計，直至媽媽返屋企先再黐過扭過。



活動能力繼續係A++級別，開始可以自己鬆手企到幾秒，尤其喺playroom D軟墊上面會易企D，但就未有鬆手自己行嘅意慾，隱陣派要扶實先行又或者索性爬就算，但就唔知驚成日擒高擒低做D危險動作，坐唔定成日想喺high chair同hip seat到爬出來，坐上Rody到識得要un對腳，然後坐上豬仔車都不停un，到發現架車推得郁即好驚驚嘅樣，就連底褲韆鞦都唔多頂得住，上親去都即時變身呆呆豬。



小手肌發展唔錯，已經可以自己拎星星餅同切粒水果食，仲會自己拎水杯飲水，又識拉紙巾同打開D硬皮書來睇， 喺媽媽幫助下開始入到圈圈，亦識得自己拉開入形狀個玩具個蓋拎入面D嘢出來玩，仲會學哥哥去㩒D玩具嘅開關掣，知道波波係用來掟，最鐘意就係玩照鏡。



依舊多多聲氣，但就keep住都係「啊」「唔」「巴」「打」「嗲」呢幾個音，成日「ai」同「hea」咁叫人，一急起上來又會瘋狂「媽」媽媽，叫我全名或者妹妹都會識應你，知道媽媽鬧會即時停低扮乖半分鐘咁多，心情好時叫「錫錫媽媽」會九秒九撲埋媽媽身到錫佢咀咀（艾菲：呢個只限媽媽獨享，叫錫錫爸爸係零反應，kakaka），叫我飛吻會放隻手喺咀到笑但唔飛出來，同我講bye bye諗一大輪後會嘗試開合手，其他拍手請請之類就仲未識，不過由於我笑點低成日笑笑口，所以出街時都深得一眾姨姨叔叔歡迎㗎﹗



我呢個月明顯開始有自己嘅喜好同脾氣，亦越來越鐘意同哥哥一齊玩，成日望實哥哥做咩跟住喺後面一齊搞搞震，無端端會跟住佢一齊喺到大笑，有哥哥陪玩時甚至可以放過媽媽一陣，等佢安心去做吓家務，不過當哥哥來者不善明蝦我時，都會嘗試出手反抗同大喊來求救，一D都唔好惹㗎﹗