紀念日前幾個星期，米高循例都有問艾菲想點慶祝（主要只係問想食咩），艾菲亦循例回佢一句「無乜所謂」就拋返個波畀佢，結果呢排湊仔湊到好depress嘅艾菲，根本無放任何心思去慶祝，但就喺紀念日前一日，因米高咁啱呢個星期六要返工，無奈地單拖帶埋BB豆豬湊燒腩仔返學校上興趣班（平時多數係米高帶），再頻頻撲撲咁帶住佢哋兩個過海做D嘢，辛苦同忙咗成個朝早同下午後，返到屋企忽然收到紥花，wow...好驚喜喎﹗
之後星期日嘅正日，我哋喺屋企忙咗成朝做晒D家務後，米高就帶咗我哋去西貢，無特別嘅行程，只係隨意咁hea吓行吓，帶燒腩仔去碼頭睇吓人哋賣海鮮，睇吓海，睇吓船，睇吓花花草草，又畀佢試吓玩打鼓，雖然呢日係我哋兩個大人嘅大日子，實際都係以小朋友玩樂為主，拍拖？浪漫？情調？咩來㗎？食唔食得㗎？
一場來到西貢，無留肚食fish finger，點都買返幾包西貢名物魷魚絲，由細到大食咗咁多唔同款同唔同地方嘅魷魚絲，呢到嘅魷魚絲唔知點解係特別好味同鮮味，食過一次真係返唔到轉頭，每次入來都要掃幾包走，就連為食妹妹都想一齊食呢，kakaka...
行吓行吓我哋就行咗去網球場隔離個公園，未上車已經嘈住要玩韆鞦嘅燒腩仔當然第一時間去排隊，至於BB豆豬就有得睇無得玩，唯有八八卦卦四圍望。
打完韆鞦當然要玩佢嘅第二飛佛滑梯，呢期興倒轉個人趴喺到sir，講咗好多次危險都唔聽，咁唯有影低佢D罪證畀佢大個睇返。
臨走見到條孖梯無乜人，即刻叫燒腩仔上去扮同妹妹一齊sir，難得佢好合作之餘，仲識得伸手擋住妹妹，話怕佢跌咗落去，見到你有呢個保護妹妹嘅心，媽媽真係好感動呢﹗
陪哥哥玩咗咁耐，點都要畀返D嘢妹妹玩，所以我哋離開之前個公園後，就慢慢行咗去另一個有底褲韆鞦嘅公園，不過BB豆豬呢排開始怕搖同飛，就算我哋推得好輕手，佢都係全程呆呆豬咁嘅樣。
反而放佢落來玩呢D轉轉轉嘅玩意，同近期大愛嘅照鏡就勁hyper勁開心。
玩到差唔多天黑，係時候去搵食啦﹗入去前喺個牌匾到影返張到此一遊先﹗
本來米高係想食西餐，但考慮到我哋帶住兩個小朋友，為免騷擾到其他人，所以就改咗食海鮮餐，見間間嘅餐牌都係差不多嘢，就求其揀咗間入去叫個三人餐算，點知燒腩仔除咗炒飯同鮑魚外乜都唔願食，仲全程喺到麻麻煩煩咁撩D蔥走（但明明之前係食蔥嘅），不過佢同BB豆豬都好乖無搞搞震嘈嘈閉，算係好畀面好合作值得嘉許㗎啦﹗
食飽飽再搵人幫手影返張全家福，只係六年時間，我哋就由二變四，完滿啦﹗嘻...
離開西貢前，米高口痕話想食甜品，甜品控燒腩仔當然奉陪，於是就去咗試滿記隔離間嚐糖，鋪頭裝修到好似學校咁，D糖水名又改到同學校有關，都幾特別幾過癮，重點係都足料同好味，食完真係大滿足﹗
沒有留言:
張貼留言