十個月

Hello!又一個月啦﹗媽媽呢排畀我同哥哥玩到謝晒，所以失晒蹤無晒影咁，一於由我代佢出場，update吓個blog唔好種菇，順便報告吓我呢個月嘅進度啦﹗



先講食呢樣，我宜家每日食兩餐固體，大概一個大人碗嘅份量，由於媽媽實在太懶太hea，所以呢個月只係試咗荷蘭豆，豆腐，紫菜，蘑菇，白蘿蔔同芝士呢幾樣新嘢咋，不過佢就開始搞吓D新花臣，見我出咗兩隻牙仔開始咬到嘢，就簡中整吓切粒水果，天使麵同薯蓉我食，亦會畀我飲吓湯同自家製果汁，等我唔使日日食粥同飲水飲奶咁悶蛋喎（艾菲：實情係比起哥哥當年真係煮少咗好嘢佢食>.<），而我D手指仔喺呢個月都變得靈活咗，可以自己拎起D星星餅再放入口食啦﹗



至於媽媽奶就繼續係埋身食，原先媽媽都由我放題任食，但佢見我夜晚實在瞓得太差，於是兩星期前開始狠心地唔再餵半夜奶，宜家一日只係得返三餐媽媽奶飲，不過有時出咗街時間亂咗就會飲多一餐，只要媽媽一講「奶奶」呢兩個字我就會好開心咁撲埋去食，然後啜五至十分鐘左右就會好滿足笑住鬆口走人（艾菲：個冧豬樣真係好sweet呢﹗）。



瞓覺繼續係我嘅弱項，但經過媽媽一個月嘅調理後，我嘅生理時鐘終於正常返些少，宜家每晚十一點食完最尾一餐奶會自動暈低，亦因為媽媽決心唔再餵夜奶，我無再好似之前咁每一兩個鐘就醒一醒，雖然仲未可以一覺瞓到天光，會慣性地喺凌晨三四點醒，不過多數攬吓拍吓都肯好快瞓返（艾菲：但一星期總有兩三日係搞成粒鐘先瞓得返囉...），然後七點畀媽媽叫起身食完早餐奶，再直接瞓到十一點先正式起身，總算將呢覺嘅時間拉長返D。

而晏覺媽媽索性畀我一氣過瞓一轉就算，平日送完哥哥返學後，我兩點左右開始瞓晏覺，無事無幹的話可以瞓到四點半先起身，但如果呢轉覺瞓唔好或者出咗街瞓唔夠兩個鐘，我就會傍晚時要來多一轉，又如果食完晚飯後媽媽揹我出街的話，我好多時都會頂唔住瞓多轉覺，不過無出街的話我又唔會特別扭眼瞓㗎喎。



黐媽症終於有少許好轉，雖然都係要全天候跟實媽媽先安樂，但宜家有時都會受爸爸氹，唔再係喊足十分鐘等媽媽沖涼出來，媽媽亦好大膽咁有晚將我同哥哥留低畀爸爸，然後自己一個出去處理私務，咁我都好合作無扭計乖乖等媽媽返屋企。



活動能力繼續係A++級別，不過明顯呢個月係爬少咗，成日搵嘢扶住企喺到甚至扶住行，亦開始有意圖鬆手自己企，試過成功企到兩秒咁大把，出街可以坐定定畀爸爸媽媽食到一餐飯，會自己拎水杯飲水（艾菲：幫佢拎反而擰歪面唔飲），坐上Rody到識得要un對腳，手仔多多乜都拎來搞同咬，開電視櫃門同拉玩具箱係最在行，仲已經識得拎紙巾同打開D硬皮書來睇，見媽媽摺衫又會幫手拉晒掛衣夾D衫落來（夾硬扯）。



繼續多多聲氣，但依然係「啊」「唔」「巴」「打」呢幾個音為主，成日「ai」咁叫人，必要時又會瘋狂「媽」媽媽，宜家叫我個名，「妹妹」，或者全名我都會識應你，笑點奇低知道你同我玩，或者聽到怪聲會笑到咔咔聲，但一喊又會好快眼紅面紅，扁晒咀兼出晒眼淚鼻水，最鐘意吸塵機攪拌機D聲，每次聽到都會好興奮咁拉住個圍欄企喺到un，去超市睇魚又會high到踢晒腳兼出手拍玻璃，出街畀人撩時就會笑住捱落媽媽心口扮怕醜，氹得D姨姨叔叔好歡喜呢。



同哥哥嘅互動越來越多，有時會無端端喺到一齊大笑，只要有哥哥陪住媽媽行開一陣做家務都OK唔會嘈，最鐘意𥄫實哥哥做咩然後跟住尾去搞搞震，不過當哥哥太熱情咁攬我鍚我，又或者專登搶我玩具時，我都會嘗試反抗同大喊來求救。



最後仲有兩樣嘢令媽媽好開心嘅，就係我嘅體重已經穩定到畀醫院兒科close file，同D頭髮終於生返出來長到夾到頭夾啦﹗媽媽已經諗緊要整幾多隻夾畀我帶，又問我一歲時D頭髮夠長紥辮未，佢話佢D idea湧緊出來喎，不過我好似得一個頭㗎咋喎，又headband又頭夾又橡筋又帽咁帶得幾多樣呀？