今次目的地係昂平草原嘅西貢靚view，多數人都係由恆安邨出發，行上馬鞍山郊野公園再上草原，不過艾菲出發前一晚睇過資料，有人話單係恆安邨行上馬鞍山郊野公園一段已經要一個鐘，再加上沿路其實無咩嘢睇，考慮到我哋又大又細腳程比較慢，為免上山前消耗過多體力，我哋就決定喺富安花園坐的士直上馬鞍山邨，見到呢個路牌跟住指示行就係啦﹗
由馬鞍山郊野公園行上昂平草原嘅一段路唔太難行，無咩景睇但勁有走入森林嘅feel影相都幾靚，初段係可以行車嘅大斜路，慢慢就變成石級路，又可能D石又大又細好得意，燒腩仔行得好起勁。
行到中段會見到有條小溪都幾靚，不過呢日太多人行山，為免阻住後面D人我哋無特別停低影相。
行咗四十五分鐘左右我哋就到涼亭位，有諗過好唔好喺呢到餵BB豆豬食粥先，不過眼見旺過旺角嘅人流，實在不宜喺呢到久留，我哋企定影張相飲啖水就走啦﹗
向住大水井嘅方繼續行，嘩﹗條路已經變成真正嘅山路﹗不過都唔算難行，只係要小心滿地嘅牛屎﹗
來遠已經聽到好嘈嘅人聲同尖叫聲﹗到啦﹗到啦﹗到目的地昂平草原啦﹗
呢到可以望到全個西貢嘅景色，只可惜呢日天陰陰加大霧，點影都唔靚...
有唔少人專登上來玩搖控飛機同滑翔傘，佢哋有齊裝備同工作人員好專業咁㗎﹗
而沿住燒腩仔身後呢條山脊路行，就可以上到後面嘅大金鐘山，不過我哋又大又細就當然唔會搵自己來搞，影張相當行咗㗎啦﹗
趁燒腩仔心情靚叫佢走入草堆玩吓，如果唔係食住糖佢實多多聲氣嫌D草桔到佢﹗
然後捉晒兩個麻煩友坐低影呢張背影，其實...艾菲上山前有諗過搵人揸機幫我哋影張一家四口嘅背影相㗎，但呢日天氣係差到無可能影得靚，唯有放棄啦...
由山下面扭到上來山上面，明明好眼瞓又唔肯瞓嘅BB豆豬，都同佢影返張到此一遊相先。
由於太陽伯伯無好似預期咁走返出來，所以上到昂平呢個位咁空曠，堅係又大風又凍，再加埋肚餓真係好饑寒交迫feel，好彩呢朝心血來潮蒸咗幾個蕃薯仔帶上來食，所以影完相就拿拿聲搵個無咁當風嘅位餵妹妹同食蕃薯啦﹗
食飽睇夠風景我哋就開始落山，然後就進入戲肉，落山條路崎嶇到呢...步步為營嘅石路，一唔小心隨時拗柴，但燒腩仔明顯係初生之犢不畏虎，完全唔驚直衝落山咁滯，嚇到艾菲同米高死咁滯﹗
路牌報稱半個鐘就可以落到去終點位置大水井，唔...半個鐘係指直接碌落山嗎？D石路咁難行根本無可能行得快喎...
行到中段又會見到西貢靚view，影張相回吓氣先﹗
終於...終於...都行完D石路有平地行啦﹗行到腳仔都軟嘅艾菲感動到想喊呢﹗
再行埋呢條無止境嘅樓梯，我哋到終點大水井啦﹗全程只係用咗三個鐘多少少咋﹗YEAH！
一落大水井會見到好多村屋，見人哋門口D炮仗花幾靚就叫燒腩仔埋去扮吓花仔，嘻...可愛無？
落到大水井，就會見到手寫嘅指示教你行出西貢市中心，如果唔想行可以喺村口上小巴坐去西貢市中心，不過米高就話好快到，於是無視對腳震緊嘅艾菲叫架小巴走先（咁啱有架小巴停低想等埋我哋），再帶住我哋又斜路又樓梯咁行多半個鐘出去囉...（早知艾菲就自己衝上小巴約返佢喺市中心等啦>.<）
沒有留言:
張貼留言