九個月

話都無咁快又過咗一個月，雖然媽媽仲有新年前後嘅blog未出，但都決定畀我出場先，而為咗慶祝自己九個月大，我走去學人做業主，漏夜起咗層樓喺額頭到（做空中飛人由大人床跌落BB床），不過媽媽見到就勁肉赤，猛問爸爸點解會出事（艾菲：都不過沖個涼行開一陣就出事），又問係唔係男人睇B都係咁（艾菲：想當年燒腩仔唯一一次喺大人床跌落地都係公公湊時無睇實）。



唔...都係入返正題先，我宜家每日食兩餐固體，隨住我嘅感冒鼻水鼻塞慢慢消失，我嘅胃口都有所好轉， 每餐半個鐘之內一定食完一大碗粥，呢個月試咗嘅新食物有西蘭花，合掌瓜，茄子，紅腰豆，牛肉，藍莓，火龍果同堤子，媽媽見我食得唔差都開始畀多D finger food我，喺大人食飯時自己拎來食，間中又會畀BB米餅同星星餅我做零食，但我就仲未好識控制D手指仔，D星星餅跌落地多過塞到入口。

媽媽奶繼續係埋身食，媽媽宜家懶到連泵都唔泵，屋企D儲備更加係全部過晒期，佢話由我食到幾多就幾多無所謂喎，宜家我一日大概飲四至五餐奶，日頭出咗街的話只食早午晚三餐，喺屋企就因為要暗瞓覺，好多時會食兩餐下午茶奶，然後半夜會起身食一至兩次（好彩的話），媽媽話我呢D明顯係心癮可以戒（艾菲：試過攰到發脾氣大叫唔餵佢又即刻瞓返喎），但又唔想我嘈醒全屋人同懶得起身招呼我，所以寧願瞓住餵囉。



瞓覺依然係我嘅超弱項，加上啱啱過咗嘅農曆新年假，堅係日日出街玩到生理時鐘亂晒，每晚十一點食最尾一餐奶，飲之前捽晒眼無電喪喊，飲完就即時生猛返，玩到凌晨一點先肯正式瞓，瞓得好的話凌晨四五點左右醒一次，然後七點半左右畀媽媽叫起身食早餐奶，再直接瞓到十一點先起身，不過瞓得差的話兩點四點七點係咁醒，最差試過每個鐘醒一次，一覺瞓天光好似成個月都無發生過。

至於晏覺媽媽已經採取放棄態度，正常時可以一日瞓三轉，唔正常時一日瞓得一轉，但媽媽話只要加埋夠兩個鐘佢都放過我㗎啦，始終要夾哥哥D活動時間，都好難逼我就範，佢最怕就係我扭眼瞓喺到大叫大喊，但又拍極都唔肯自己瞓，兼唔肯啜奶咀瞓，仲要唔准人坐定唔郁，尤其係坐車時就最尷尬咁話。



黐媽症無減退跡像，每晚十點打後開始有D眼瞓時尤其嚴重，每晚媽媽去沖涼我就喊足十分鐘（艾菲：搞到連沖涼都唔敢沖咁耐），爸爸家陣衰到連氹都唔氹我，話氹來都無用由我喊喎，不過新年去陌生地方拜年時就表現得好定，媽媽望住都可以勉強畀人抱一陣，無話一抱即爆喊咁唔畀面，出街時人哋撩我又會笑晒口咁再扮怕醜捱喺媽媽心口，氹得一眾姨姨叔叔好高興。



活動能力繼續係A++級別， 已經唔甘於只係爬，而係成日搵嘢扶住企喺到，身體越來越靈活，由瞓轉坐，由坐轉爬或企，再由企轉坐/爬都完全無問題，好鐘意企喺窗邊睇風景，又成日W字腳跪喺到玩，不過爸爸媽媽見到一定會阻止，手仔多多乜都搞吓掂吓再咬吓，充滿好奇心得來完全唔識危險點解，試過拉跌哥哥個玩具廚房成個人被壓住都唔知驚，搞到媽媽要日日金晴火眼咁望實我搞咩。



繼續多多聲氣，成日發出「啊」「唔」「巴」「打」呢幾個音，不過呢個月就無再叫「媽」，未識講嘢但明顯聽得明大人講咩，叫我「妹妹」會有反應，你對住我拍手講「好嘢」我會大笑，講「bye bye」又會郁吓D手指仔，有D媽媽講過唔搞得嘅嘢，我再埋去搞之前會擰轉望吓媽媽，被發現時會望住你傻笑走開（艾菲：點解咁細個就咁醒？），唔鐘意一個人留喺圍欄入面玩，哥哥一唔記得閂閘我就會九秒九突圍衝出去（艾菲：成日走犯咁好好笑）。




開始大個同哥哥多咗互動，有時媽媽行開都肯跟哥哥一陣，哥哥唱歌時會好開心咁望實佢，佢埋來同我玩時又會表現得好興奮，不過當佢來者不善明蝦我時，我都會feel到知道要保護自己，佢壓落來我會嘗試伸手推開佢，佢搶我D玩具時我都會大喊求救。



雖然個個都話我似足哥哥細個，不過媽媽就話我哋似得來其實有唔同，特別係眼神同神態，哥哥明顯似爸爸，我就明顯似媽媽（尤其扁咀樣），就連搞搞震嘅行為都似十足媽媽，無教過無夾過，就自己爬去大人床到企喺身搞床上面嘅嘢，仲要玩到甩咗條褲先埋位，真係想話我唔係佢個女都唔得啦﹗