一年一度＠青衣公園

一年一度嘅紅葉之約又到啦，由於今年農曆新年比較早，米高二月打後D weekend又比較忙，計來計去都係決定喺新年前嘅星期日來咗先，免得之後無時間再來會後悔。



一如所料，我哋又係早咗來，D葉連黃都唔係好黃，又何來紅葉呢，不過我哋都係志在舊地重遊影張相留念，有無紅葉都係咁開心嘅。



沿住咁多年都行嘅同一條路，去搵返同一棵樹來同燒腩仔影相，忽然見到有幾個龍友上咗側邊個山坡到影幾棵貌似桃花嘅樹，見幾靚又跟去玩吓先。



到啦到啦﹗唔覺唔覺已經係我哋第五年來呢到影相啦﹗真係眨吓眼就咁大個仔啦﹗



今年仲多咗BB豆豬一齊來，其實佢上年喺艾菲個肚到都已經來過。



一場來到青衣公園，本來想畀燒腩仔去遊樂場到放吓電，點知去到先知育嬰室維修中無得用，我哋唯有試吓行過青衣運動場搵位餵BB豆豬食下午茶奶，然後行吓行吓見到成條路都係洋紫荊樹，難得燒腩仔狀態OK又同佢影吓呢個香港人唔可以唔識嘅市花。



去到運動場見到育嬰室個指示牌但又搵唔到育嬰室，問清潔阿姐仲畀佢寸話「呢到公眾地方邊有呢D咁嘅嘢」，吓？吓？吓？無？咁同BB豆豬去更衣室換條片再邊行邊餵囉﹗（後來畀艾菲發現更衣室係有換片板，而唔係阿姐所講邊有呢D咁嘅嘢囉）燒腩仔就趁機跑吓圈，當係學校運動會前嘅熱身畀佢感受吓氣氛，米高同佢跑咗成個圈都仲話唔夠喉要再跑添呀﹗