情人節特餐

除咗拍拖第一年之外，艾菲同米高都應該無認真慶祝過情人節，皆因我哋都係比較現實同理智嘅人來，明知情人節食個飯同買紮花都特別貴，我哋寧願將D錢留返來做更有意義嘅嘢，咁多年來唔係打邊爐就係自己喺屋企煎塊扒，簡簡單單過一日就算。

今年情人節係平日，米高都有話陪艾菲去食至愛吉野家邊爐，但諗起食完會夜返屋企，免得燒腩仔放學太攰搞搞震掃興， 艾菲覺得自己煮會穩陣D，仲一早買晒料諗好頭盤到甜品嘅menu，實行來個hea版情人節特餐。


 
所謂hea版就係用現成嘢，頭盤先來個蟹糕法包，開罐罐頭切開條法包就係啦，見得人之餘仲勁好味﹗


 
緊接出場有罐頭蘑菇忌廉湯，個湯有諗過自己煲㗎，不過米高唔太鐘意飲南瓜湯雜菜湯，所以投其所好開罐頭啦﹗



飲完湯就可以上配菜，有芝士洋蔥火腿釀大蘑菇，簡單到一個點係切晒所有料，調味搽醬放料鋪芝士，再拎入焗爐到焗15分鐘就搞掂，賣相呃得人又好好味，個大蘑菇仲要勁juicy呢﹗

 

緊接住出場就係是晚主角格仔西冷牛扒配薯菜，預先焗好個薯餅同雜豆，食時用個grill pan煎一煎塊扒就OK食得，得咗﹗


 
飯後又點少得甜品呢，諗咗幾日見雪櫃有兩個蘋果剩低無人食，一於用佢來做apple crumble，趁燒腩仔返學時煮定個蘋果同準備金寶粒，全程只係用咗三十分鐘，食飽放入焗爐焗十五分鐘就食得，配埋吉士醬一齊食， Yummy!



食完甜品仲有禮物收㗎，就係搞搞震前世情人各一啦﹗真係唔好講笑，艾菲呢日幾乎畀呢兩個小魔怪激死，燒腩仔一早起身激完艾菲，然後就有BB豆豬下午接力，艾菲幾乎嬲到話唔煮添呀，不過見到你兩兄妹相親相愛時，又點捨得再嬲落去吖﹗

好老土嘅一句說話，愛對了人天天都是情人節，不過又真係幾啱嘅，一年三百六十五日，無理由只得情人節當日先對你好㗎嘛， 而且我哋都老夫老妻就更加對呢D節日無所謂，但話說回來見到朋友們輪住喺FB放閃，作為一個小女人點都會恨收花收禮物嘅，所以呢...睇完朋友報價話情人節後嘅weekend，花墟D肯亞玫瑰由情人節當天成千蚊十枝減到五十蚊十枝，就決定叫米高下年情人節後去買返紥花送畀艾菲啦﹗kakaka...