兩點決定出發，搞到三點先出到門口，最快嘅方法當然係坐的士，直接去到飛鵝山道雙程路嘅盡頭起步。
我哋沿車路一直行上山，條路一D都唔難行，重點係一級樓梯都無，不過星期日就比較多車上山，安全計我哋要拖實燒腩仔行，同埋有車過時要企埋一邊停低一陣。
行咗一陣就見到呢個馬鞍山郊野公園嘅牌，望地圖先知原來可以由呢到一直行到去沙田馬鞍山。
再行多一陣就開始見到西貢白沙灣嘅靚view。
大概行咗45分鐘左右，就到基維爾營地個分岔口，呢到個view wide到連大埔同將軍澳都望到﹗
不得不讚賞吓燒腩仔，今次終於無喺開始時嘈嘈閉話唔行（因為沿路有車睇？），但行到中段都有話好攰想抱（實情應該係太無聊），結果艾菲醒咗粒戒指糖過佢歎就無再扭過。
再繼續行多十五分鐘就到達我哋今次嘅目的地飛鵝山觀景台涼亭啦﹗一人影返一張到此一遊先﹗
以前同米高拍拖坐車上來睇風景就試得多，用腳行上來又係另一番滋味，睇到好多惜日坐車無可能會留意同見到嘅嘢，出發前都有諗過行山脊攻頂但實在無信心，希望遲D兩個小朋友再大D仲會有呢個機會啦﹗
又呢日個太陽好多煙霞，點影都唔靚好可惜呀，不過用肉眼都可以清楚望晒成個維港view嘅﹗
喺涼亭到餵BB豆豬食完下午茶奶我哋就起行落山啦﹗原來喺涼亭個位再向前行少少就會見到大老山氣象站，有D人直情行到上去波波個樓梯頂到等睇日落添呀﹗
而喺氣象站嗰邊係可以望到西貢對出D島仔，同另一邊嘅維港高樓大廈好大對比呢﹗
我哋沿住車路落返山，去到扎山道同沙田坳道嘅分岔路，因為怕D車落山速度快會危險，所以無行扎山道而揀咗行沙田坳道落慈雲山，亦因為咁畀我哋見到呢個比飛鵝山觀景台更wide嘅維港景，由左邊鯉魚門去到右邊汲水門大橋都盡收眼底，仲要太陽伯伯D煙霞慢慢散去，靚到艾菲同燒腩仔都忍唔住嘩嘩聲呀﹗
去到尾段會見到呢個獅子山郊野公園嘅牌，感覺好似邊到都可以用腳行到去咁，好神奇呢﹗
行到六點半天開始黑，我哋終於都到達終點慈雲山，米高落山時有講過可以沿沙田坳道繼續行去黃大仙㗎，起初艾菲都話OK，但落到來見到條斜路就...唔使客氣啦...見到轉彎路口有小巴落黃大仙梗係即上啦﹗
沒有留言:
張貼留言