間屋嘅其中一個混亂重災區係platmat個位， 隨住BB豆豬越來越大個，佢嘅玩具亦開始越來越多，為咗方便佢玩又唔可以將D玩具放入箱，結果就放到一地都係，把心一橫用27蚊人仔淘咗個摺得埋有手挽嘅籃返來放佢D玩具，方便拎又方便收返好佢哋，至少哥哥有需要用多D空間時可以成籃拎走，唔使再逐件執走咁麻煩。
除咗BB豆豬D玩具之外，另一樣令艾菲苦惱咗好耐嘅嘢就係燒腩仔D圖書，為咗培養燒腩仔睇書嘅興趣，艾菲嘗試將D書放喺當眼處，等佢得閒無嘢做時拎來睇吓，但屋企D大型玩具越來越多，D書整吓整吓就放晒喺地下，難整理之餘又搞到佢哋少咗空間玩，艾菲一度想買個兒童展示書架放屋企，不過鍋居地方有限放唔落，終於畀艾菲發現呢款圖書掛袋，65蚊人仔即訂即造，size fit晒個圍欄，慳位得來都放到好多書㗎﹗
講完playmat就到客廳嘅混亂位，間屋越來越多人連帶鞋都越來越多，就算艾菲狠狠地丟咗好多對唔再著嘅返工鞋，都係放唔晒D鞋入去，再加上有時懶得滯唔願執返入鞋櫃，於是個玄關位放吓一對放吓又一對，有時甚至多到門都幾乎開唔到，所以艾菲就淘咗呢款可以畀D鞋直立式咁企喺到嘅整理架，6.3人仔一個滿三個包郵，平日一對鞋嘅空間可以放三對鞋，唔會再放到一地都係。
自入伙以來，艾菲同米高都習慣喺鞋櫃上面嘅位置放文具同散銀信件之類嘅濕星嘢，然後時間一日一日咁過去，六年以後呢個位已經變到成個垃圾崗咁，雖然艾菲簡中會清一清D嘢，但轉頭又畀米高打回原形，所以今次的起心肝淘呢個木板文具架返來，27蚊人仔一個唔算平，但可以將D嘢清楚分類整理，so far用咗一個月都仲keep到整齊，good﹗
至於鞋櫃嘅外面，艾菲都一於有殺錯無放過，淘咗兩個價值8.3人仔，可以用雙面膠紙貼上去嘅架，用來放燒腩仔成日用嘅文具，而另一邊就用咗來放肚B媽之前介紹嘅淘寶白板貼連磁石圍邊（1米x0.5米x0.7mm厚，連磁石圍邊大約65蚊人仔），趁燒腩仔返咗學之後快手貼好，佢放學返到來見到開心到呢，仲日日走埋去寫字添（佢真係唔多鐘意畫公仔，除咗畫車其餘一概話唔識畫>.<）﹗
另一樣艾菲好滿意嘅淘物就係呢個遮架，雖然貴（成百三蚊人仔）但堅係好睇又好用，事源艾菲一直都唔係好理屋企D遮，初初搬來時只係掛喺鞋櫃側邊（即上圖個白板位），自從燒腩仔出世後，個位慢慢被用來放字母poster，D遮就掛咗喺鞋櫃嘅另一邊，跟住到BB豆豬出世，我哋要喺鞋櫃隔離放個膠櫃桶放BB豆豬D衫，D遮就被逼遷移咗喺膠櫃桶同個琴中間，連掛都掛唔到放到歪來歪斜，實在難睇到不能接受，所以艾菲就上淘寶研究有無遮架之類嘅嘢可以放屋企鐵閘同大門之間嘅隙（得十幾cm闊）。
有諗過買私家車專用嘅遮袋掛喺鐵閘到，但考膚到不織布有機會發霉同拎出拎入唔方便就唔敢買，最後見到呢款聲稱日本進口嘅遮筒，size超good fit，就算放大門後面都可以，拎上手質地唔差幾實淨應該襟用，而且望落個樣都靚靚仔仔唔失禮，除咗放直遮仲可以拆開黃色個位放縮骨遮，就當係貴買平用啦﹗
搞掂玄關位就輪到自己房，女人嘛...袋就當然唔會得一個半個，襯衫去飲落街湊返學，唔覺唔覺就出現無數個袋喺房門後個掛鈎到，有時甚至放到道門唔可以全開，反正淘嘢執屋就順手用35蚊人仔淘多個掛袋包返來，一個有五格有大亦有細，輕輕鬆鬆就可以將D常用嘅袋放晒入去，即時整齊晒﹗
房都搞掂就到廚房，自從部水波爐前年入主廚房後，D調味料飯煲麵包機全部要移位，搞到連水杯都無位放成日要四圍擺，淘收納籃時畀艾菲見到呢個樹枝形嘅杯架，15.4人仔一個，可以畀D杯向上發展，唔似平日喺家品鋪買到D要平放咁阻位。
淘寶時眼見農曆新年就到，又唔想用返屋企個舊全盒，所以都順手搵吓有無靚靚全盒可以入手，但搵來搵去唔係價錢唔啱就係太大個，無意中見到呢個魚仔全盒幾得意，就用35人仔嘅價錢淘咗返來，點知收貨後兩星期去行日本城竟然見到佢，好似都係賣35蚊，不過係港紙仲要有問題有得即換囉...
淘開收納用品，艾菲見價錢幾抵，都淘咗一set旅行用壓縮袋（15.7人仔一套，兩大兩細），同一set旅行衣物收納袋（27.5人仔一套六個唔同size），來緊暑假去旅行應該會用得著。
帶住小朋友去旅行，好多時都會洗吓襪仔同毛巾呢D細細件嘅嘢，尤其我哋咁爛玩一去就十幾日，洗衫更加係無可避免，但大家都知酒店衣架有限，亦好難有夾掠衫，所以見到呢個可以掛衣架用嘅掠衫夾咁得意，就買咗個返來試用。
燒腩仔房個度高貼都爛咗一段時間，用膠紙修修補補係勉強用到，不過就唔多好睇，淘家品時見鋪頭有度高牆貼賣，仲要係十幾蚊人仔一套，唔使諗即買啦﹗
除咗一大堆家品，見買一本都有包郵，今次淘寶都順便淘咗本書畀燒腩仔，內容係介紹交通迷至愛嘅各式交通工具，而且呢本係翻翻書來，啱晒手多多嘅燒腩仔。
沒有留言:
張貼留言