九州東京之旅~Day4 佐賀>鳥棲 part2

食飽飽我哋就出發去鳥棲行Tosu Premium Outlet﹗其實出發前都問過啱啱來完嘅朋友，話呢到D嘢唔算好平，所以入去前真係無乜期望﹗



不過無乜期望還無乜期望，個天似乎點都要艾菲放低D銀兩先得，好日都唔著涼鞋一次，點解次次都係去旅行先來爛涼鞋呢？今次仲要行到甩底，即唔買唔得﹗唯有求其殺入Gap，又求其揀一對稍為似樣，即買即剪牌即著...



搞掂對鞋之後以為可以專心shopping，點知...米高忽然好驚嚇咁話唔見咗張信用卡﹗吓﹗又搞D咁嘅驚喜？然後佢自己返去車到搵，艾菲一拖二行住Gap等佢，好彩佢返來後話張卡原來放咗喺褲袋，又就喺呢短短嘅十幾分鐘入面，艾菲睇中咗件童裝牛仔裙畀自己，價錢唔係好抵但著上身都幾修身，重點係BB line都有條類似款，可以買埋畀BB豆豬一齊母女裝，所以完全無理香港有無都照買。

九州東京之旅~Day4 佐賀>鳥棲 part1

終於都忙完哥哥開學同升小一嘅嘢，宜家總算心中有數大概知條路點走，又可以回歸努力追blog﹗呢朝係星期日，米高知道呢邊有個呼子朝市想去睇吓，我哋就全家齊齊早起（其實都係七點幾八點，唔算好早姐...），喺樓下hea食個酒店早餐就出發啦﹗



呢日算係咁多日以來比較好天嘅一日，至少仲睇到藍天白雲（呢邊D空氣keep住麻麻，個天經常都有層煙霞咁），不過九洲嘅公路唔係山就係隧道，真係好令人懷念北海道嘅海闊天空，而且呢邊亦相對多車過北海道，度假feel即時大減。



坐咗唔係好耐車，我哋就到呼子港，泊好車就行去呼子朝市到睇，一入去見到呢個影相板，即叫燒腩仔同米高埋去扮魷魚。

16個月

轉眼又過咗一個月，又係我出場嘅時候啦﹗媽媽話D遊記追極都追唔切，呢排又因為哥哥開學，大家要重新適應過返學嘅時間表，再加埋佢要趁哥哥返學剩機清吓D家務，同時要忙哥哥升小一D嘢，所以大家要畀D時間佢慢慢寫喎，咁又所以佢叫我出場頂一頂先，否則又唔知塞咗我個每月進度去邊㗎啦﹗



入返正題先講食，其實呢個月都無咩大變動，繼續早晚一餐奶埋身食，間中晏覺前會飲多餐下午茶奶，不過出咗街就可以唔食自己瞓，鐘意飲媽媽奶但除咗夜晚外，奶癮一D都唔大，唔會忽然喺街瘋狂搵食。

至於固體繼續好食得，一日食足兩餐飯仔，座底一碗有菜有肉嘅軟飯，下午茶繼續麵包水果餅乾乳酪cereal，一聽到大人話開飯就即刻埋位去high chair，搶住自己帶口水肩示意大人畀嘢我食，自己食飽但大人仲食緊嘢會望實再大叫，示意大人分多D畀佢，總之未食夠就點都唔肯飲水走人。

宜家基本上都係自己食，媽媽喺側邊幫忙將跌咗出來嘅飯畢返畀我就OK，唔怕污糟餐餐食到一身都係，不過就唔再樣樣嘢都肯食，例如豆同水果呢D明明之前都鐘意食嘅嘢，宜家會好猶豫咁放入口咬吓又吐返出來，但媽媽打碎晒撈喺飯仔或乳酪到我又無嘢照吞㗎喎。

九州東京之旅~Day3 由布院>佐賀

呢日係我哋九州自駕遊嘅開始，所以一朝早喺酒店check out後就去咗博多站附近拎車，今次米高揀咗Toyota Hybrid，貪佢內籠夠大可以放到兩個car seat，必要時再塞艾菲落去睇實佢哋都得（現實係艾菲咁多日都無去過後面陪坐，嘻...），兼夾慳油好力，不過尾箱就只係啱啱好塞得落兩個大喼同一架BB車，另外我哋托租車公司買咗張只係畀國外遊客買嘅Kyushu Expressway Pass，咁就任行九州嘅高速公路都唔怕路費貴。



check完車無問題後我哋就出發去由布院，其實前一晚發生完咁大件事，米高都有提議過取消今日嘅行程畀大家抖一抖，但反正我哋福岡間酒店呢日點都要check out，根本都抖唔得耐，BB豆豬又只係觀察無乜嘢做到，艾菲就建議繼續行程，畀佢喺車到瞓都一樣，落車就由艾菲揹實，密切監察住佢嘅情況，順便畀返多D安全感佢。

前一晚艾菲陪佢碌到六點幾終於頂唔住要瞓陣，接手睇BB豆豬嘅米高就話之後拍吓拍吓，好快BB豆豬都一齊瞓返，然後我哋八點叫醒佢哋兩個起身食早餐，燒腩仔好快已經無事發生過咁，BB豆豬就明顯有D呆呆滯滯，唔係好願食早餐個包，成朝無乜點笑但識應人，放佢落地都行得好穩，然後我哋開車無耐佢就好乖咁瞓咗，不過睇相都應該望到佢依然係面青青咁面色唔多好。