轉眼又過咗一個月，又係我出場嘅時候啦﹗媽媽話D遊記追極都追唔切，呢排又因為哥哥開學，大家要重新適應過返學嘅時間表，再加埋佢要趁哥哥返學剩機清吓D家務，同時要忙哥哥升小一D嘢，所以大家要畀D時間佢慢慢寫喎，咁又所以佢叫我出場頂一頂先，否則又唔知塞咗我個每月進度去邊㗎啦﹗
入返正題先講食，其實呢個月都無咩大變動，繼續早晚一餐奶埋身食，間中晏覺前會飲多餐下午茶奶，不過出咗街就可以唔食自己瞓，鐘意飲媽媽奶但除咗夜晚外，奶癮一D都唔大，唔會忽然喺街瘋狂搵食。
至於固體繼續好食得，一日食足兩餐飯仔，座底一碗有菜有肉嘅軟飯，下午茶繼續麵包水果餅乾乳酪cereal，一聽到大人話開飯就即刻埋位去high chair，搶住自己帶口水肩示意大人畀嘢我食，自己食飽但大人仲食緊嘢會望實再大叫，示意大人分多D畀佢，總之未食夠就點都唔肯飲水走人。
宜家基本上都係自己食，媽媽喺側邊幫忙將跌咗出來嘅飯畢返畀我就OK，唔怕污糟餐餐食到一身都係，不過就唔再樣樣嘢都肯食，例如豆同水果呢D明明之前都鐘意食嘅嘢，宜家會好猶豫咁放入口咬吓又吐返出來，但媽媽打碎晒撈喺飯仔或乳酪到我又無嘢照吞㗎喎。
跟住到講瞓覺，依然係時好時唔好，媽媽宜家策略係盡量拖到十一點，等我有倦意先同我入房食瞓覺奶，如果我真係攰就會食完乖乖瞓覺，但有時我會食完仲好精神咁對住爸爸媽媽笑，要媽媽用好firm嘅語氣逼我瞓我先瞓，但最早都玩到十二點半先瞓，媽媽話來緊要再想辦法令我早D瞓喎。
至旅晏覺，媽媽繼續採取自由放任嘅策略，喺屋企就兩點左右畀下午茶奶我飲完即瞓，出街的話就由得我鐘意幾時瞓就幾時瞓，通常喺屋企可以瞓到兩個鐘，出街就好睇環境同狀態，好攰的話都可以瞓到兩個鐘，但一般來講夠一個鐘媽媽都收貨㗎啦。
越來越有自己嘅性格同脾氣，不過宜家有咩唔啱心水唔會再撞個頭落地，但仲會瞓喺地下到喊，媽媽唔理我喊完我會自動收聲，好識睇人眉頭眼額，亦好醒目咁每次哥哥扭計，都會乖乖坐埋一邊自己玩唔會搞搞震，有時甚至識得出手救哥哥，例如最近有次哥哥又扭唔出門口，當佢同媽媽彊持緊時，我就埋去哥哥到揮手叫佢跟大隊走，再拍拍門口張凳示意佢坐低著鞋出門口，跟手隊個雪糕玩具畀媽媽食氹返佢開心，媽媽話多得我呢個調解員，大家先可以和平收場，大讚我係佢嘅小甜心。
小手肌發展得唔錯，撕紙扭蓋拉拉鏈同開筆蓋呢D動作已經達至純熟嘅狀態，所以爸爸媽媽要更小心放D嘢，哥哥做功課行開去個洗手間，轉頭我已經成功擒上佢張凳再劃花佢本簿，激到媽媽同哥哥死，又周不時唔小心撕爛D書（艾菲：妹妹好鐘意睇書），同偷偷地開爸爸個返工袋條拉鏈拎晒入面D嘢出來，最鐘意學大人做嘢，成日拎住個電話講，有時又會將個電話向住電視機扮㩒搖控，最鐘意就係穿隻腳落去爸爸媽媽同哥哥D鞋到四圍行。
金口依然唔係好肯開，不過今個月又叫做有些少進步，會喺被逼嘅情況下叫爸爸或媽媽，好多BB話講，但大人同我一齊講我又唔應，但實情我乜都識聽識做，媽媽叫我丟片我識拎埋條片去垃圾桶，叫我將D污糟衫拎去洗又識放D衫去洗衣籃，已經可以做小幫手幫媽媽忙傳D嘢出房畀哥哥或爸爸，又識幫媽媽手收衫好乖女㗎﹗
講完發展又到講我同哥哥嘅互動，隨住暑假日對夜對之後，我同哥哥嘅感情明顯好咗，雖然佢間中都仲會整鬼我，但我已經習慣唔太離譜都唔會嘈，而我又何嘗唔係有時會借意推開佢學做小霸王，宜家出街會主動伸手畀哥哥拖，去到公園又會跟實佢玩，雖然哥哥堅粗魯咁扯住我手行同夾硬推我落滑梯，嚇到媽媽眼都凸咁滯，不過我哋依然好enjoy笑到咔咔聲㗎，媽媽話呢D難兄難妹嘅感情佢真係識條鐵無眼睇喎，kakaka...
最後媽媽話有樣嘢不吐不快，佢呢排成日投訴我含情脈脈咁望住爸爸，一見到爸爸放工返來就好開心咁跑埋去叫佢，出街食個飯都眼定定咁望住佢飲杯飛吻再甜笑，影親相都要爸爸叫我先會望鏡頭笑，一有爸爸就當媽媽無到咁滯，最死係爸爸對我呢個上世情人又好受落喎，佢話我呢個小三出現，令到佢就來地位不保啦...啦...啦...
沒有留言:
張貼留言