呢日係我哋九州自駕遊嘅開始，所以一朝早喺酒店check out後就去咗博多站附近拎車，今次米高揀咗Toyota Hybrid，貪佢內籠夠大可以放到兩個car seat，必要時再塞艾菲落去睇實佢哋都得（現實係艾菲咁多日都無去過後面陪坐，嘻...），兼夾慳油好力，不過尾箱就只係啱啱好塞得落兩個大喼同一架BB車，另外我哋托租車公司買咗張只係畀國外遊客買嘅Kyushu Expressway Pass，咁就任行九州嘅高速公路都唔怕路費貴。
check完車無問題後我哋就出發去由布院，其實前一晚發生完咁大件事，米高都有提議過取消今日嘅行程畀大家抖一抖，但反正我哋福岡間酒店呢日點都要check out，根本都抖唔得耐，BB豆豬又只係觀察無乜嘢做到，艾菲就建議繼續行程，畀佢喺車到瞓都一樣，落車就由艾菲揹實，密切監察住佢嘅情況，順便畀返多D安全感佢。
前一晚艾菲陪佢碌到六點幾終於頂唔住要瞓陣，接手睇BB豆豬嘅米高就話之後拍吓拍吓，好快BB豆豬都一齊瞓返，然後我哋八點叫醒佢哋兩個起身食早餐，燒腩仔好快已經無事發生過咁，BB豆豬就明顯有D呆呆滯滯，唔係好願食早餐個包，成朝無乜點笑但識應人，放佢落地都行得好穩，然後我哋開車無耐佢就好乖咁瞓咗，不過睇相都應該望到佢依然係面青青咁面色唔多好。
由博多去由布院，車程要個幾鐘，我哋中途當然要去休息站抖一抖，順便畀燒腩仔去洗手間，由於BB豆豬瞓咗，我哋分男子組女子組去，女子組即艾菲一個，去完洗手間艾菲就走咗入便利店逛順便尋寶（根據過往經驗，便利店間中有正嘢），點知又真係畀艾菲搵到好嘢喎﹗760yen一本貼紙簿，除咗Cars，仲有Frozen，Tomica，Thomas等等，總之實有一本啱你小朋友口味，重點係佢圖畫靚質地都好靚，D貼紙真係可以貼完又貼，艾菲事後都好後悔只買一本咁少，到想再搵來買已經遇唔返﹗
到由布院已經係中午時份，所以泊好車後我哋就即刻去開餐，米高睇旅遊書介紹帶咗我哋去間專賣當地農產品嘅食堂，艾菲叫咗個牛肉飯，唔係吉野家味，係好香牛肉味，重點係D配菜，你堅係食得出新鮮嘅味道，至於米高個天婦羅飯，佢都話D食材好鮮甜，個湯嘅味好特別好好飲。
食飽我哋就沿住湯之坪街道向金鱗湖進發，點知行行吓天色一變落起大雨，被逼滯留咗喺龍貓站前（呢間鋪頭專賣宮崎駿嘅卡通產品），無遮喺身嘅我哋唯有行吓街避吓雨，然後行吓行吓就放低咗D銀兩，買咗件衫畀自己同買咗個哈哈笑袋仔畀BB豆豬囉...kakaka...
等到D雨細返D，我哋就買把遮繼續向前走，但就輪到燒腩仔越行越無心機（段路都幾長，而且主打行街睇嘢，佢堅係零興趣），眼見佢就快發脾氣，艾菲就叫米高搵間鋪頭坐低畀佢抖抖，於是我哋就去咗試呢到好出名嘅柚子雪糕，向來喜歡柚子嘅艾菲當然爆like，而個粟米片底都好特別好飽肚。
食完再繼續向前行咗一大段路，終於都到目的地金鱗湖，因為呢到真係只得一個湖咁大把，原先都擔心燒腩仔來到會失望，點知佢見到湖上D鴨又好開心喎，咁呢到出名咩呢？後尾睇返資料先知係冬天因溫差而出現嘅晨霧彌漫仙境，唔...我哋宜家夏天來仲要撞正天陰落大雨，咁啱行到來就停雨兼遇到個香港人幫我哋揸機影相，可以睇到後面間屋個倒影都好好啦，係咪？
離開金鱗湖後，我哋就沿住湯之坪街道行返出去，正當燒腩仔又行到無心機之際，忽然我哋見到Yufuin Floral Village嘅指示牌，於是就行咗入去睇，一入去就見到D可以畀錢買料餵嘅松鼠仔，再行落去就見到好多間類似燒腩仔身後嘅歐洲式小屋，感覺都幾特別幾可愛，不過啦...由於艾菲身上揹住咗BB豆豬，燒腩仔呢個model又唔多合作，所以一張靚相都影唔到...>.<
對燒腩仔來講，影相一D都唔重要，有得食雪糕甜品先係最緊要，所以米高一買杯蜂蜜雪糕布甸畀佢時，即時變臉笑晒口咁任艾菲影，好彩艾菲都唔弱，自己獨霸咗由布院好出名嘅Milch半熟芝士蛋糕，個芝士味香同rich到一個點，食完出返鋪頭再望先知呢個蛋糕得過奬，而且仲有熱食揀添，有機會一定要再試﹗
飲飽食醉，我哋呢個由布院半日遊就完，臨走應燒腩仔要求去咗火車站睇火車，影返張到此一遊就起程去佐賀。
由布院去佐賀，車程要差不多兩個鐘，由於前一晚只係瞓咗個幾鐘，所以呢程車艾菲真係頂唔住要眠一眠，跟住一轉眼就到咗是日重點項目：西松屋﹗相對於阿卡將，艾菲鐘意佢價錢夠親民，不時有驚喜減價貨平到你笑，基本上來到九州我哋係見一間行一間，仲要每間都有D嘢買到，不過就行到最尾一日佢哋先開始做七折減價囉﹗
第一日行所以比較瘋狂，左邊嘅係燒腩仔，右邊嘅係BB豆豬，我哋主攻479yen特價區，同埋貼咗紅label嘅減價貨，只要啱用大size都照買，留返佢哋大個先著，而部分啱size嘅，艾菲就即買即洗畀佢哋喺呢個trip入面即著。
除咗衫褲，我哋仲買咗堆小朋友日用品，有燒腩仔自己揀嘅新幹線水鞋，卡通牙刷一大堆，風扇套同麵包超人立體口罩，再買咗D BB果汁，米餅，即食肉醬，尿片，濕紙巾同防曬乳液畀BB豆豬來緊幾日用。
喺米高嘅再三催促下，艾菲喺仲未行夠嘅情況下畀佢拉走咗，跟住佢就車咗我哋去佐賀站，泊好車就推埋行李去車站隔離嘅Comfort Hotel check in，同樣係Twin房加BB床，感覺都好闊落開兩個大喼完全無難度，重點係BB豆豬一入房無再呆呆豬，而係好開心咁四圍走四圍摸，但安全起見艾菲都係要先來個乾坤大挪移，將所有床拍埋牆，再推張梳化仔入去頂住，BB床就照放大床前面。
settle down後已經係夜晚七點鐘，米高一直話呢晚想食燒肉（九州除咗拉麵出名，燒肉鋪都特別多），點知...行到去佢打算帶我哋去間餐廳先知無book位係無得食，晴天pig pig嘅我哋，有諗過揸返架車出去搵食，但考慮到兩個小朋友已經開始肚餓應該頂唔住，只好喺附近見餐廳就入，以為應該唔難，但原來呢邊D餐廳十間有九間都要book先有得食，剩返一間係全面食煙嘅居酒屋，個staff見到我哋有小朋友都叫我哋唔好入...
無計可施下，只好返去火車站求其食，眼見只係得返一間coffe shop同Lotteria有開，就揀咗入Lotteria食漢堡包，反正對練仙唔多食正餐嘅燒腩仔來講食咩都無所謂，有薯條食佢會更開心，而艾菲就叫咗個呢期promote緊嘅燒肉漢堡，慰藉下食唔到燒肉嘅心靈，咁當然幻想同現實係會有些少出入，不過個包都唔係太差嘅都幾香口㗎。
食飽我哋就去車站隔離間24小時超市入貨，燒腩仔搶住要推BB豆豬，難得BB豆豬又好enjoy畀哥哥推，兩個仲笑到咔咔聲咁，我哋就由佢推一陣，不過見佢開始失控玩飛車，為免再有意外發生就即時叫停。
呢間超市基本上係乜都有，艾菲行吓行吓仲喺BB用品區到搵到個靚靚Hello Kitty濕紙巾蓋，仲有喺香港未見過嘅增量版和光堂即食飯仔，梗係買返兩盒來試試佢，而經過第一日焗飯仔失敗嘅經驗後，艾菲就轉移焗通粉同麵畀BB豆豬，呢晚艾菲就買咗包冷凍蕎麥麵，另外再買咗D沙律菜，同蒸返熱就食得嘅豆（呢到係兩餐份量），全部嘢切都唔使切，就咁倒落燜燒杯到焗返熱就食得，超級方便﹗
買完嘢返到酒店見時間尚早，而且BB豆豬狀態都唔差，艾菲就打line video call返香港搵燒腩仔婆婆，一心諗住放咗BB豆豬喺BB床到應該安全，不過唔知點解佢同婆婆講吓講吓，加埋燒腩仔喺隔離吶喊助威，心情係異常地hyper，勁興奮咁喺床仔入面行來行去，跟住呯一聲成個頭向前撞咗落床欄到，跟住係一輪嘅爆喊，跟住係佢額頭上一大撻瘀痕，跟住係艾菲又一陣嘅心慌，米高安慰艾菲發咗出來有傷痕好過無，又好彩我哋有帶退熱貼，畀佢貼住瞓撻瘀痕第二朝已經退咗好多，但艾菲就唔敢再畀佢留喺BB床入面，所以呢晚就換咗燒腩仔瞓BB床，BB豆豬跟我哋大人瞓，而且就算瞓著咗我哋都一定要有人喺側邊睇住佢以防萬一，唔可以佢有佢瞓我哋各自行開做嘢。
幾經辛苦先終於搞掂兩個小朋友去瞓（燒腩仔晚晚叫住唔瞓，日頭又唔肯喺車到瞓晏覺，完全唔明佢到底係點頂），艾菲同米高又忙完洗衫洗餐具呢D瑣碎事務可以抖一抖，當然又係我哋嘅宵夜時段，呢晚我哋有車厘子，固力果巨蜂堤子果汁冰，同Kiri藍莓芝士蛋糕味雪條，三樣都咁正食到我哋舐舐脷呢﹗
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
沒有留言:
張貼留言