九州東京之旅~Day2 福岡 part2

睇見張相，都大概估到艾菲來緊要講嘅唔慌係好事啦...艾菲真係諗都無諗過，人生中第一次坐白車，居然係喺人生路不熟嘅日本坐，坐完最大嘅感想係原來燒腩仔架麵包超人救護車D聲好真，又之後幾日一聽到日本救護車嘅聲就有陰影。

話說呢日係我哋來到九州最難過嘅一日，因為米高屋企有事發生咗，大家都心情唔好但又咩都做唔到，然後呢晚返到酒店，如常安排兩個小朋友先沖涼，跟住到米高最後到艾菲，入洗手間前艾菲吩咐燒腩仔上床瞓，再叫米高睇實超hyper四圍爬嘅BB豆豬，點知艾菲沖完涼先啱啱著好衫，就聽到BB豆豬嘅爆喊聲。

米高話BB豆豬同燒腩仔玩玩吓，忽然喺張床到呯一聲向後跌咗落地，好彩嘅係無撞到任何嘢無表面傷痕，咁其實對於成日擒來擒去嘅BB豆豬來講，跌親基本上係等閒事來，艾菲都唔太著緊，只係叫米高抱住佢安撫吓佢，就走返入洗手間吹頭，打算快手搞掂出去餵BB豆豬飲夜奶瞓覺。

點知艾菲個頭都未吹到一半，忽然就聽到米高喺出面大叫：「喂﹗唔掂呀﹗要call白車去醫院呀﹗」當下艾菲即時喺心入面叫咗聲「咩事呀？半夜三更咪玩啦﹗」但自然反應都係衝咗出去睇咩事，一出去米高就叫艾菲睇實BB豆豬唔好畀佢郁，之後佢就好急咁打電話叫酒店職員幫手call白車。

眼前嘅BB豆豬成塊面青晒，眼神彷彷彿彿好似想瞓咁（明顯似休克跡象），艾菲望住佢完全唔知點算好，本能反應就係對住佢大叫「你唔好瞓住呀」，叫完佢用對眼射吓艾菲，好快又唔知望咗去邊，不過真係無瞓到，然後就嘗試掙扎想爬返起身，但米高講過唔可以畀佢郁，艾菲只好一直㩒住佢。

掙扎應該係自然反應來，艾菲越㩒BB豆豬就越想爬返起身，睇見佢跌跌撞撞咁想反身（應該個人仲係暈緊），為免佢再有大郁動艾菲只好緊緊咁抱實佢喺自己心口，嗰吓真係心痛同嚇到艾菲死，但艾菲同自己講唔可以亂唔可以喊，仲已經諗定萬一白車只可以一個親人跟車，應該係米高定艾菲跟去，同萬一BB豆豬要留院觀察點安頓燒腩仔呢D問題。

另一邊廂，叫緊酒店職員幫手call白車嘅米高都好亂同好勞氣，由於米高只係識睇但唔識聽同講日文嘅關係，酒店職員好似唔係好明我哋發生咩事咁，先派咗個staff上來睇我哋，解釋一輪佢好似無咩嘢咁就走咗，等咗一陣先終於有另一個英文好D嘅staff來，終於聽得明我哋要call白車嘅要求。

而喺等白車嘅期間，我哋就喺一片混亂下，執齊證件銀包匙卡wifi蛋餵奶巾同旅遊保險張單，再打咗返香港問保險注意事項，同一時間亦吩咐燒腩仔著定鞋等，好感恩燒腩仔喺呢一刻無扭仲要超合作，極速著咗鞋乖乖坐定等（平日佢出親門口都要扭擰一輪先著到對鞋）。

過咗一陣白車就到，亦好好彩救護員英文都OK溝通得到，佢初步望吓BB豆豬，問咗一D簡單嘅資料，我哋就上白車出發去福岡市立兒童醫院，而BB豆豬唔知係肚餓定眼瞓（平日呢個鐘數已經飲完奶瞓咗，但呢晚驚佢飲完奶嘔所以唔敢餵），還是畀我哋咁大陣仗嚇親，救護員稍微掂一掂佢就喊，然後十五分鐘嘅車程入面，佢係喊足全程無停過，不過聽見佢咁好中氣嘅喊聲，再加埋塊面終於谷返紅，艾菲同米高個心都定咗落來知佢應該無乜嘢。

去到醫院落車，已經見到姑娘企咗喺到，第一時間接艾菲同BB豆豬入診療室，姑娘循例同佢度心跳同體溫，BB豆豬又喊到畀人「湯」咁，於是醫生就轉移問米高一D基本資料，再問吓BB豆豬有無嘔有無抽筋有無暈，經過一輪雞同鴨講後，醫生摸一摸BB豆豬個頭，又無乜嘢咁繼續同米高傾，然後姑娘見BB豆豬喊得咁慘，就問艾菲要唔要breast feeding，艾菲當然答yes，問准醫生姑娘就帶咗BB豆豬去另一間房到食奶，起初BB豆豬都仲喊到唔識撲埋來食（平時有得食即撲埋身），到艾菲塞佢埋身食先終於收聲狂啜。

飲完奶BB豆豬都無瞓到（應該係驚唔知咩事所以無瞓），但總算平靜咗落來無再喊，當我哋返去診療室時，米高已經同醫生傾得七七八八，醫生見BB豆豬都無乜嘢，就叫我哋返去自行觀察，睇吓佢呢幾日有無嘔有無抽筋嘅情況，如果有一兩次嘔都可以接受，但持續嘔就要返去再睇咁話。

雖然大家言語不通，但呢到嘅醫生同姑娘都好有耐心咁同我哋溝通，米高同燒腩仔行開咗去洗手間時，醫生仲用部平板電腦翻譯同艾菲講，話BB豆豬宜家需要嘅係休息，艾菲估佢係想我哋唔好咁擔心，至於全程我哋都唔得閒理嘅燒腩仔都不愁寂寞，有另一個醫生同佢玩轉轉凳玩到咔咔聲，真係超級好人﹗

睇完醫生，姑娘仲幫我哋call埋的士先走（醫院地點太遠，半夜唔會有的士來），然後喺返酒店嘅車程上，BB豆豬終於倦極而睡，燒腩仔就喺我哋安撫一輪後都瞓埋（佢其實都好驚，所以搞掂BB豆豬後第一時間就係安撫佢，艾菲同米高不停讚佢表現好同叫佢唔使擔心），跟住返到酒店放低兩個小朋友上床，我哋仲要若無其事咁打返香港跟進米高屋企嘅情況（唔想屋企人擔心所以當時無講），難唔難受當然難受，但做咗人父母就無得揀一定要撐住。

搞到點幾兩點，安頓好所有嘢後，邊喊住口食西瓜（第二日搬酒店所以呢晚唔食唔得），邊同米高商量第二日嘅對策，傾完食完就上床瞓覺，無奈艾菲實在擔心到瞓唔著，眼光光咁望住BB豆豬，好驚佢會忽然嘔而自己唔知，然後佢凌晨四點幾醒咗，食完奶一直都唔肯瞓返，艾菲知佢仲係好不安，但陪佢碌到六點幾自己都頂唔住，終於要拍醒米高睇住佢自己瞓一陣。

九州東京之旅~Day1 HK>福岡 
九州東京之旅~Day2 福岡 part1