15個月

Hello! 消失咗兩個星期咁耐，大家有無掛住我哋呀？靜雞雞話畀大家知，我去完旅行返來啦﹗此行除咗曬到黑咗，個樣好似大個女咗好多咁之外，仲發生咗件驚險事喺我身上，差D嚇到爸爸媽媽暈低咁滯呀，想知咩事？咁就要等媽媽遲D寫遊記再講，總之我哋一家能夠完成到今次嘅旅程，然後齊齊整整平平安安咁返到屋企，實在係一件唔容易嘅事呢﹗



講返每月進度先，宜家我繼續早晚一餐奶埋身食，如果媽媽想我立即瞓晏覺先會餵下午茶奶畀我，否則佢都唔特別餵，奶癮唔大但有得食又會好高興，每次放口都會冧豬豬嘅樣笑住望媽媽，識自己搵食但有時唔夠力，就會好慘咁爆喊要媽媽幫我。

固體食得非常好，一日食足午餐下午茶同晚餐三餐，午餐晚餐座底一碗有菜有肉嘅軟飯，下午茶就麵包水果餅乾乳酪cereal，一聽到大人話有嘢食就會即刻擰轉頭望你，再自己行埋去high chair示意大人放我上去食，一見到大人食嘢都會行埋去「呀...呀...呀...」咁示意佢哋預埋我一份。

除咗星星餅之外最鐘意食媽媽煮嘅住家飯，去旅行咁多日都算好肯食嘢，乜都肯放入口試，尤其肚餓時乜都食，不過稍為飽肚就會開始吐返D食物出來，用手驗過先決定食唔食，水蜜桃，車厘子，蜜瓜，雪糕呢D全部唔食吐返出來，就連平日食開嘅紅蘿蔔都會食食吓吐，但返到屋企媽媽煮返住家飯我食時，又即時大大啖咁掃到一粒飯都無剩喎﹗ 



瞓覺就時好時唔好，依然十點半十一點左右食最尾一餐奶，多數都食完就乖乖瞓覺，但間中都會食完精神晒，玩到凌晨一點先肯瞓，不過經過旅行十幾日嘅訓練後，宜家已經可以一覺瞓天光，有時媽媽唔叫我起身，我可以瞓到九點幾十點先起身食朝早餐奶。

至旅晏覺，媽媽繼續採取自由放任嘅策略，喺屋企就兩點左右畀下午茶奶我飲完即瞓，出街的話就由得我鐘意幾時瞓就幾時瞓，通常喺屋企可以瞓到兩個幾鐘，出街就好睇環境同狀態，好攰的話都可以瞓到兩個鐘，但更多時候係半個鐘再加一個鐘咁分兩段時間瞓。



越來越有自己嘅性格同脾氣，有咩唔啱心水唔滿意會撞個頭落地，再瞓喺地下到喊，但媽媽話一話我或者用佢凌厲嘅眼神望一望我，我就唔會扭好耐會慢慢自動收聲，不過間中都會出現鬥氣爆喊嘅情況，媽媽仲話我好識睇人眉頭眼額，每次佢哋話緊哥哥時，我明明扭緊計都會乖乖收聲，坐埋一邊自己玩唔會再搞搞震。



活動能力絕對係A++以上級別，識得自己行，日日喺間屋到自由行，出到街都會扭落地行，但就唔一定畀人拖，爸爸媽媽拖還好，哥哥都只係一時時拖到，其他人真係睇心情先肯拖，除咗行仲成日想挑戰上樓梯，亦成功上到一步（要大人拖住先得），至於擒就真係超大膽，跌極都唔識驚咁繼續四圍擒，爸爸媽媽睇少我一眼都隨時出事。



小手肌發展得唔錯，執哥哥跌落地下D飯食完全無難度（艾菲：哥哥食飯時真係唔可以放佢出來），細緻到撕紙扭蓋拉拉鏈開筆蓋呢D動作都已經做到，拎起畫板枝筆就會起勢咁亂篤亂畫，自己食飯都開始越食越好，媽媽只需要坐喺到幫手執返枱面同口水肩D飯就OK。



金口繼續唔開，不過今個月又比上個月好D，成日會有意無意「爸爸爸...」同「媽媽媽...」咁叫，多咗BB話講，有晚哥哥打畀嫲嫲，我居然好清昕咁講到「嫲嫲」呢兩個字（艾菲：個音好明顯同媽媽唔同），媽媽從我種種行為表現估計，覺得我只係未有信心發音前唔講出聲姐，實情我咩都聽得明，跟到唔同指令做嘢，佢唔擔心我發展有問題。



最後又到講我同哥哥嘅互動，哥哥依然間中慶起就會整鬼我，咁我都例牌尖叫爆喊回應，拖手時會揀畀唔畀佢拖，唔畀時會用力fing開佢隻手，暫時都好肯坐佢車尾跟佢玩，成日會望實佢搞咩跟住照做，而呢個月我就學識咗同佢爭媽媽，當媽媽揹住我時哥哥挨落媽媽大脾到瞓，我會用腳撐開佢加爆喊示意佢走開，就算佢只係挨落媽媽手臂到，我都會伸手扯佢頭髮摵佢耳仔，搞到媽媽忍唔住要開聲叫停我（艾菲：我主張小朋友爭執自行解決），有時佢掂我架BB車，我唔鐘意都會拉開佢隻手示意佢走開，不過好搞笑地又會拉拉吓忽然無嘢，變晒臉咁嘻嘻哈哈跟住哥哥一齊玩，一時水溝油一時糖黐豆，搞到爸爸媽媽都無我哋兩個咁好氣囉，kakaka...