同我哋兩公婆同樣期待嘅仲有燒腩仔，成日聽同學仔講去邊到旅行，今次卒之輪到自己去，開心到未放暑假已經周圍同同學講，而艾菲亦一早同米高商量，反正要call的士去機場，不如call架鑽的去坐得舒服D，又可以氹吓呢個超級車迷（明顯慈母上身），燒腩仔知道後就更加異常興奮，開心到全程把口未合埋過，仲記住咗人哋個車牌，到宜家無聊畫畫時都有時會連埋車牌畫返架車出來。
去機場第一時間當然係去check in，一心以為暑假會好多人有排等，但原來推住BB豆豬有條快線排，所以話咁快就搞掂晒，仲遇到個好人地勤姐姐，知道燒腩仔想睇D行李點樣由輪送帶運走，就叫佢企定講bye bye同數123先㩒掣，逐件畀佢玩氹得佢勁開心。
搞掂行李就入閘做安檢，原來宜家有條禮遇通道可以畀帶住BB嘅遊客行，實在係超級方便，於是我哋又極速完成埋過關呢個程序。
過咗關當然係去食返個早餐，仲要架機又delay到無晒影（連gate no.都無），就更加係可以慢慢歎，而艾菲身邊個小吃貨BB豆豬，一早起身就已經食咗成大塊麵包，仲係咁問艾菲同米高拎嘢食，堅係食唔停口﹗
食飽無嘢好做，循例去Disney Store巡視下業務，有人睇完《Cars 3》變咗心啦，成日小薑前小薑後，McQueen失寵啦，kakaka...
之後再去Gate 23玩（當時仲係未有gate no.），呢條蟲真係玩咗咁多年都係佢，不過小朋友係唔會嫌棄嘅...（係阿媽我嫌姐）
叫佢兩兄妹影返張睇飛機相，一係唔望鏡頭一係走咗去，忽然有張攬埋一齊好sweet咁，但爆咗光，o...
影咗好多張之後，終於畀艾菲影到張似樣D嘅睇飛機相啦﹗但...架機係仲未到閘口㗎囉﹗飛機呀飛機...你幾時先捨得來接我哋走呀？
Delay咗成個鐘，終於都見到架飛機啦﹗米高話次次都delay下次唔再坐因航，well...你用asia miles換機票，唔因航仲有其他選擇咩？其實都好彩今次係gate 21上機，我哋可以玩到最後一分鐘先行過來換片同交BB車，又好彩地勤姐姐畀我哋排Business條隊上機唔使等咁耐，總算舒舒服服啦﹗
上機啦﹗米高一年前book位時預早mark咗坐第一行空間比較多，不過架機排位係242，所以我哋要坐中間無風景睇，BB豆豬例牌跟艾菲坐，安頓好後第一時間就拎條餵奶巾來招呼佢，架機都未起飛佢已經被迷暈，瞓到艾菲食完飯就來睇完《波士BB》先醒，然後餵佢食吓出門前煮嘅通粉，玩吓換吓片再放佢落地行吓，佢嘅表現比我哋預期中好，完全無扭無嘈好抵讚。
至於燒腩仔，由上機艾菲同米高就叫佢瞓覺叫到落機都無瞓過，全程《波士BB》同《Peppa Pig》，連個飛機餐都係食咗幾啖就唔食只食雪糕，咁佢唔食我哋都唔怪佢嘅，皆因米高食咗兩啖即話佢個兒童餐好難食，反而艾菲個薯仔牛肉出奇地好食，D牛肉夠入味又腍，應該係因航近年罕有嘅佳作喎﹗
飛咗三個幾鐘終於都喺黃昏時間到達福岡，一落機發現要自己行落停機坪再入去過關，對於燒腩仔來講當然又係相當新奇好玩嘅事啦﹗
過完關拎埋行李，我哋就坐的士直接去博多The B Hotel check in，一入房感覺都算闊落，由於我哋兩大兩小盡可能都揀Twin嘅房，再提早send email問酒店有無BB床提供（上次北海道同名古屋都無，今次好開心九州全部酒店都有，呢間甚至有BB浴盤添），而經過艾菲一輪乾坤大挪移，將所有床向牆拍齊後，我哋就可以有更多空間瞓，間房又可以多返D位放行李同畀兩個小朋友走動。
由於架機delay，我哋比原定時間遲咗到福岡，艾菲原先嘅shopping時間無晒，喺酒店settle down後已經六點幾，於是行十分鐘左右去咗博多站嘅商場搵食，求其見門面似樣正正常常就入去，艾菲叫咗個鰻魚飯定食，跟餐有碟冷烏冬可以畀BB豆豬撈飛機BB餐個南瓜雞蓉食，至於米高一來就刺身飯，個樣邪惡到呢，另外我哋再叫咗個豚肉生薑燒畀燒腩仔。
食飽我哋就喺博多站附近逛吓，最主要目標係搵吓有無超市可以買餸煮畀BB豆豬食（艾菲今次堅係煮足12日﹗），咁買完餸當然都要睇吓有無宵夜啦﹗來日本旅行唔食宵夜對唔住自己呀﹗而第一晚嘅宵夜就係燒腩仔手上兩個黃金桃，嘩﹗juicy到呢﹗而等到燒腩仔同BB豆豬瞓咗後，艾菲就趁米高去咗便利店買飛，自己獨霸呢個雞蛋布甸，真係爽到呢...
沒有留言:
張貼留言