燒腩仔學校暑假今年放得特別早，六月初已經進入半放暑假mode，偏偏艾菲呢個時候就有勁多私務忙，基本上都同唔到佢去邊到玩，千辛萬苦先終於捱到六月尾忙完，可以全心投入咁陪佢放暑假，第一日就挑戰自己一拖二帶佢哋去佐敦谷公園玩兼影相。
其實艾菲算係住得近佐敦谷公園，但坐小巴的話都要落車再行一段路先到，所以講咗好多年始終無試過自己一個帶燒腩仔去玩，次次都係要等埋米高放假有多個人幫手先會去，生咗BB豆豬就更加啦，始終一拖二有起事上來就要靠自己頂住，不過唔知做咩呢日心血來潮，又好想同佢哋去影吓相，亦自覺前一排太忙搞到燒腩仔放假都無得四圍去有D內疚，再聽聞來緊個weekend天氣麻麻，咁就終於推咗艾菲出門口。
一拖二去要行裝輕便，所以帶唔到scooter畀燒腩仔玩，但泡泡呢都仲拎到嘅，無爸爸喺到吹泡泡嘅責任就落咗喺燒腩仔身上，不過D泡泡水係倒多過吹，唔使十五分鐘就KO咗一枝...
堅係好努力咁吹泡泡畀BB豆豬㗎，但BB豆豬就無乜反應咁囉，kakaka...
第一次玩泡泡嘅BB豆豬全程呆樣，只係眼碌碌望住D泡又唔係好敢去捉去拍。
唔玩泡咁影返張草地相啦，女仔果然係女仔，坐都坐得優雅過人。
BB豆豬啱啱識行又唔係行得好穩，於是叫燒腩仔埋去拖住佢行，但呢個心急的哥即扯個妹走，影完呢張相之後BB豆豬係成個畀佢拉到趴咗喺地下，亦之所以佢有時唔肯畀哥哥拖係有原因㗎囉﹗
叫佢兩個來來回回咁行咗幾轉，忽然畀艾菲影到呢張picture of the day﹗嘩﹗兩個手拖手又笑晒口咁，好sweet呀﹗
拖住哥哥行咗陣笑咗輪，BB豆豬先warm up完進入狀態，開始四圍搞搞震，仲好快手咁喺地下執咗燒腩仔啱啱用完枝泡泡水，當正自己執到金咁開心添﹗:P
嘩﹗識行啦﹗又進入另一個新階段啦﹗
行咗陣無晒力，當然要坐低抖吓抹吓汗，忽然燒腩仔拎條毛巾同BB豆豬玩bu...渣...來引BB豆豬笑，呢幕真係睇到艾菲心心眼，其實燒腩仔心底裡都好錫BB豆豬㗎，只不過好多時都唔識用正確方式表達出來...
其實影咗陣已經太陽落山（我哋拖拖拉拉咁，太遲出門口啦），D相影出來嘅色開始無咁靚，所以臨尾同佢哋影多張草地合照就準備放燒腩仔去遊樂場玩，咁講明影完有得玩就一定合作望鏡頭。
影完之後燒腩仔自己起身，再同BB豆豬講咗句「走啦」，跟住BB豆豬就遞咗隻手出來搵人扶，燒腩仔亦好自然咁伸咗隻手出來拖佢起身，睇見佢哋兄妹之間嘅互動，艾菲真係超級感動，之不過有個小妹妹，轉頭就甩開哥哥隻手忽然爆喊，搞到哥哥好無癮囉...>.<
應承咗影完相就放人，艾菲一定會守諾言，燒腩仔即一枝箭咁標咗入公園sir滑梯，好彩平日無咩人，來遠都可以望到佢去咗邊做緊乜。
仲成功挑戰呢個得兩條柱嘅路同會郁嘅木衡木，佢D大肌肉發展得越來越好，物理治療嗰邊最近都畀佢畢業唔使再返去覆診啦﹗
至於BB豆豬當然唔執輸玩埋一份，仲玩到唔願走添﹗
玩到天黑我哋就走啦，其實只要佢哋兩個都合作，一拖二出去玩唔係太難搞嘅，不過體力消耗確係大，大到艾菲返到屋企完全唔願郁，寧願叫米高外賣晚餐返來畀我哋食都唔願落街食。
沒有留言:
張貼留言