無奈呢日天氣唔多穩定，一心打算去沙灘嘅計劃只好擱置，唯有改去屋苑後面個泳池玩水，點知撞正泳池大清潔日，而去開嘅觀塘泳池又無戲水池唔係好啱BB豆豬玩，正當苦惱點解咁多阻滯之際，忽然醒起仲有一個超近地鐵站嘅斧山道泳池，平日坐車經過見入面D設施好似好好玩咁，一於就去試試佢。
我哋食飽午餐就出發，完全唔知我哋搞咩嘅BB豆豬都呆咗陣，直至艾菲放佢出來換好泳衣先好少少，然後一行出泳池，眼前嘅景物，係開心到艾菲同燒腩仔嘩嘩聲囉﹗成個公園級嘅滑梯放咗喺泳池中間，仲要室內室外各有一個，燒腩仔全程不知sir咗幾多次滑梯，仲玩到唔願走添呀﹗
咁主角BB豆豬呢？當我哋同佢著水泡時，佢都掙扎咗一輪，到落水時亦叫咗幾聲，好彩艾菲醒目帶定兩個私伙沖涼玩具去，佢好快已經樂在其中，拎實玩具喺水入面飄浮暢泳，玩到中段仲同燒腩仔扮追逐，腳撐撐咁玩到咔咔聲。
大概玩咗一個鐘左右，天色開始轉差仲落起大雨，見D池水越來越凍就上水換衫走人，然後米高話泳池對出個巴士站有車直達屋企樓下，我哋睇準巴士apps見架巴士就到即衝出去，跟住唔使十五分鐘已經返到屋企，方便到咁嘅地步，呢到絕對有下次啦﹗
又其實呢，燒腩仔今個暑假終於畀艾菲踢咗去游水，艾菲同米高一直唔主張小朋友參加太多課外活動，有錢有時間我哋都寧願拎來帶佢去玩，唯獨係游水呢樣艾菲幾堅持佢要去學，唔望佢變飛魚去比賽拎奬，只望佢學識一門求生技能。
so far學咗一個暑假，暫時仲停留喺踢水階段，雖然把口成日話唔想學，但每次都會好開心咁跟教練跳落水，又不停撩D同學仔傾偈（well...佢係口是心非嘅朋友來），連最抗拒嘅潛水都肯去試，艾菲覺得佢嘅表現已經比想像中好，點睇都係個好開始來，來緊應該會同佢keep住學落去，希望日子有功後會見到更大進步﹗仔﹗你要加油呀﹗
沒有留言:
張貼留言