試用：荷蘭Kruidvat嬰兒產品

最近天氣熱辣辣，大汗嘅BB豆豬日日好似跌咗落水咁，就連涼都要沖多轉，好開心就喺呢個時候，收到屈臣氏獨家引入，來自荷蘭嘅Kruidvat嬰兒產品。

Kruidvat有超過40年歷史，喺荷蘭同比利時係家傳戶曉嘅品牌，產品全部喺歐洲製造，通過皮膚科測試，而且中性酸鹼值（pH值）同不含著色劑配方，確保BB幼嫩嘅肌膚免受刺激，時刻呵護BB每一寸肌膚，絕對係父母信心之選。



呢枝就係Kruidvat嬰兒2合1洗髮護髮露，能夠令嬰兒頭髮柔軟，容易梳理，重點係售價相當親民，300毫升大大枝只售$30.9。



倒出來係奶白色，輕輕一搓已經開始起泡，然後搽上BB頭皮至髮尖，再用水洗乾淨就搞掂㗎啦﹗



BB豆豬之前一直用開沖涼洗頭二合一嘅沐浴油，隨住佢嘅頭髮越來越長，就發現佢D頭髮成日都油笠笠咁，艾菲一直以為係佢太大汗嘅關係，點知今次試用完先發現，原來佢D頭髮都可以keep住清爽柔軟足一日㗎﹗以後要日日同佢用呢枝Kruidvat洗頭水洗頭先得﹗



洗完頭當然要用埋呢枝Kruidvat桉樹沐浴露沖涼，佢有棉籽油成份，能夠幫助保持BB皮膚柔嫩，而且桉樹經蒸氣後，有助改善BB喺感冒期間嘅呼吸添㗎﹗價錢亦同洗頭水一樣咁親民，300毫升大大枝同樣只售$30.9。



倒出來係透明嘅，搓起來無洗頭水咁多泡，不過就有淡淡嘅桉樹香味，艾菲邊同BB豆豬沖涼邊聞，都覺得好舒服，而且一過水就乾淨，皮膚即時變清爽。



沖完涼當然要做埋護膚，呢枝Kruidvat嬰兒護膚油含維生素E，而且滲透力高同具有保濕功能，售價較洗頭水同沐浴露貴些少，不過依然係超級親民，300毫升只售$36.9。



倒出來係透明水狀，輕易就可以推開，爸爸媽媽可以用佢做嬰兒按摩油，用溫暖嘅雙手按摩BB肌膚，幫BB建立安全感。



艾菲之前一直都抗拒BB油，怕用完會油笠笠唔舒服，不過Kruidvat呢枝又好OK無呢種感覺喎，推開後好快就畀皮膚吸收晒，回復清爽滑滑嘅質感，連BB豆豬都好滿意，艾菲邊按摩佢就邊搶來睇吓係咩好嘢來。

除咗上面三樣產品外，Kruidvat嘅嬰兒產品可謂包羅萬有，由護理產品，清潔用品，嬰兒食品，嬰兒用品，以至特別為媽媽而設嘅按摩油都應有盡有，而Kruidvat嘅各種優質嬰兒產品將會陸續喺屈臣氏獨家登場，等大家可以合理價錢，買到高品質嘅產品去照顧BB一切嘅生活所需，令BB時刻都感受到父母無微不至嘅愛﹗