其實點解燒腩仔咁期待呢，因為活動喺機場博覽館舉行，憑入場卷小朋友可以免費坐機鐵來回，平日聽艾菲坐機鐵去博覽館處理私務就聽得多（大人由屋企坐港鐵去青衣站轉車來回只需$47其實都幾抵，所以艾菲有需要入去博覽館都一定係坐機鐵），今次終於可以一齊坐，呢個小朋友一到機鐵站已經想衝入去，上到車又笑到咔咔聲超興奮，把口全程無合埋過不停問東問西。
一轉眼我哋就到咗啦﹗唔知BB豆豬會唔會瞓，所以入場前影張相留念先﹗（結果佢係全程唔肯瞓，直至我哋走就九秒九暈低）
原先以為星期日會好多人要排好耐隊先有得玩，點知我哋下午一點幾去到又無想像中咁多人喎，一入場燒腩仔就話要玩彈床，排咗十五分鐘左右就有得玩，Good﹗
玩完一次彈床唔夠喉，我哋玩埋對面另一個可以瘋狂地跳嘅彈床，然後艾菲就拉咗佢去睇山羊，不過姐姐話要到三點幾先再派草餵山羊，眼見D山羊都食到飽晒，我哋唯有圍住外圍睇吓就算。
之後同咗佢去睇隔離嘅兔仔同倉鼠，平日經過寵物店燒腩仔都可以企喺櫥窗望好耐，來到呢到當然都係睇到唔願走啦﹗
之後經過智樂個攤位見到有沙玩，燒腩仔講咗好多次想玩，不過我哋就出發去旅行，BB豆豬又未完全好返，米高怕佢兩個再玩到病，所以拉咗佢哋走，好彩行吓行吓見到有個位有芝士試食，為食嘅燒腩仔有得食就唔記得咗玩啦，kakaka...
食飽再帶佢睇吓龜同甲蟲，哈哈...有人食完芝士無抹咀...好醜怪呀﹗
跟住去咗上水母工作坊，聽姐姐講解關於水母嘅嘢，不過有個小朋友就無乜耐性聽。
之後見到燒腩仔成日話要食嘅魚仔餅booth，我哋又去排隊玩吓遊戲拎餅食。
再去子母奶個booth踩吓單車換盒奶飲，連埋入場時用入場卷換嘅優惠卷，我哋唔覺唔覺都拎咗唔少嘢食﹗
話都無咁快就玩到三點，由於巧虎三點半會出場，我哋就提前去咗台前搵位坐低，諗住食D嘢休息吓等睇巧虎，點知坐低無耐已經見到有人開始喺台側排隊﹗嘩﹗想當年都係完咗show先開始排，乜宜家係未開show已經要排﹗
好彩今次有米高同行，佢見到條龍就即刻行咗出去排，等艾菲同BB豆豬食完下午茶，我哋都一齊出咗去排（因為BB豆豬唔願坐），排住隊咁睇巧虎唱歌跳舞，然後極速上台同巧虎影相，燒腩仔其實無睇巧虎一排㗎啦，但見到巧虎依然小fans上身咁好開心，至於BB豆豬艾菲事前都有怕佢會驚到喊，點知佢又唔抗拒喎，巧虎表演時仲示意艾菲捉住佢手仔一齊跳一齊唱添﹗
由於呢日我哋趕住仲有下場，所以睇完巧虎都夠鐘要走啦，燒腩仔明顯玩得唔夠喉，唯有下年有機會再來玩過，預多D時間畀佢玩彈床同餵動物啦﹗
沒有留言:
張貼留言