話說艾菲每隔一排都會想同佢哋兩兄妹影吓相，難得五月呢個星期日天氣好又得閒，於是米高就安排咗我哋去九龍公園，來到公園第一站係睇雀，BB豆豬宜家好鐘意睇D識郁嘅嘢，睇魚睇雀佢都好like。
睇睇吓忽然自己笑到咔咔聲，無乜儀態可言不過媽媽好喜歡，就連哥哥都畀佢搞到無眼睇，kakaka...
其實九龍公園都有唔少影相位，呢幅樹根牆好吸引，原先想叫燒腩仔挨落去扮型男，點知行近見到勁多蚊滋就放棄咗，求其V字手YEAH都收貨啦﹗
除咗樹根牆仲有石樓梯，但你叫燒腩仔企定定擺pose佢實唔合作，唯有諗D小方法叫佢踎低數3聲然後彈出來，反而會成功影到D稍為似樣嘅相。
喺下面池塘睇完雀，我哋再行上鳥籠到睇，燒腩仔邊行邊同我哋講上面無嘢睇，上到去又猛叫我哋去後面睇D雀仔打韆鞦，好以好熟路咩都識咁，而明明佢上次來已經係一年前暑假嘅事，呢個仔果然好記性﹗
睇完雀我哋就去遊樂場玩，忽然行吓行吓超大懵嘅艾菲先醒起BB豆豬要食下午茶，拿拿聲搵張凳坐低畀餅佢食。
請你食吖...食自己唔鐘意食嘅嘢，又或者食到好飽時，佢都會好大方請你食嘢嘅，hehe...
食飽終於可以去公園玩陣，至於哥哥一早已經唔知跑咗去邊，真係好彩有米高同行睇住，如果唔係一拖二真係唔見咗個仔都似。
難得搵到個影相位，又難得個位終於都無人埋去，艾菲第一時間捉BB豆豬上去影。
影完單人當然要捉埋哥哥返來影張兄妹合照，不過要同時捕捉兩個一齊望鏡頭，有少少笑仲要無out focus嘅相實在太難影，艾菲不停叫佢哋拍手好嘢同排排坐咗好多次，㩒咗好多好多張相返來，最終只係得呢張比較似樣。
而鏡頭背後，呢兩兄妹超級現實囉，要有星星餅先開工，否則完全唔望鏡頭唔理你，真係辛苦晒米高喺後面幫手餵馬騮。
影完諗住收工，點知行到出公園門口見到好靚嘅花海，個景靚到完全唔似喺香港，仲好襯BB豆豬條花花裙，但佢當時未係企得好穩，驚佢等唔到咁耐艾菲就捉咗哥哥埋去試位試光先。
set好晒嘢即捉花女BB豆豬埋位，一叫佢happy face即交戲，一take就成功啦﹗
不過艾菲更愛佢呢個掩咀飛吻樣﹗真係可愛到暈呀﹗
沒有留言:
張貼留言