出走澳門Day2 ~ part2

離開燒灰爐公園後，我哋就去咗紅街市附近嘅新龍記，為嘅就係去食佢個蟹王撈麵，嘩嘩嘩﹗香口到呢...艾菲仲要雙併配墨魚餅，簡直係人間極品，至於個豬扒包就係專登叫畀燒腩仔食，望落好似好燶咁，不過燒腩仔就話好好味。



話明唔係玩就食，所以食完撈麵我哋再逼巴士去咗大三巴嗰邊，尋找米高一直念念不忘嘅洪馨椰子雪糕，繼椰子同芒果味後佢哋又出咗芋頭呢個新味，不過經驗話畀艾菲知最穩陣都係食返椰子味，果然係一如既往嘅正﹗讚﹗讚﹗讚﹗



又反正來到大三巴呢邊，再多人點都要行上去影返張到此一遊，但眼見人潮一D都唔嘢少，我哋影完相就決定極速跳上的士，去另一個艾菲此行好想去而一直以為唔夠時間去嘅地方，就係去澳門科學館睇麥當勞三十年展。

我哋按警察指示行返落去的士站到先上車，但上到車同司機講去澳門科學館，佢居然問返我哋喺邊到，吓？澳門著名景點來㗎喎，唔識路？艾菲見佢仲喺咪錶到㩒咗30蚊附加費，我哋無BB車又無行李，加咩附加費呢？眼見勢色唔多對路，艾菲即出口術講咗句「唔識路咪google map吓囉」（寸咀mode），跟手司機就話海邊個嘛，然後話咁快就車咗我哋去，到落車時米高話佢收多咗佢十蚊，話大三巴上車嘅附加費喎，咩話？機場上車有5蚊附加費就聽過，大三巴上車都有附加費？不過我哋有大有細就唔同佢拗豪畀佢啦。



去到澳門科學館，艾菲第一件事做嘅唔係去睇展覽，而係借咗個育嬰室換片餵奶，帶BB去澳門最唔方便就係唔容易搵位換片，難得呢到有一個咁四正同乾淨嘅真係好開心，佢個位置係喺入場處附近，我哋只睇外邊嘅展覽無打算入場玩，但同職員講佢即開閘放艾菲同BB豆豬入去用，非常人性化呢﹗



出來會合返米高同燒腩仔，我哋就開始睇麥當勞展，其實個展覽地方唔算好大，行一個圈就好快行完，不過就勝在影相位多。




身為麥當勞fans嘅艾菲當然影得高興，冷不防燒腩仔排隊時問咗艾菲句，「個麥當勞叔叔係真定假㗎？」，仲嚇到佢唔敢坐麥當勞叔叔隔離，要搵BB豆豬隔一隔。



之後叫佢影麥當勞叔叔架車同漢堡包凳都好合作。



但到叫佢同滑嘟嘟同漢堡神偷影相時，佢又爆咗句「我都唔識佢哋」，的確...佢哋呢輩真係唔會識呢D麥當勞經典公仔，艾菲今次想唔認老想話無代溝都唔得。



跟住出場都係佢唔識嘅小飛飛，不過有架人力單車喺到，唔使識佢都好主動話要影，只係無得坐前面揸車個位有D失望咁啦。



場內仲有展出麥當勞歷年換購嘅公仔，當年嘅麥當勞產品好多都同返麥當勞有關，唔同宜家不停出其他卡通產品，艾菲好記得自己當年都有汽水，薯條同早晨全餐嘅變身公仔，真係好令人懷念嘅那些年呀﹗


 
入場時可以拎張紙仔，只要喺指定地方吸齊印仔，就可以去櫃台同哥哥換張可以摺個開心樂園餐盒公仔嘅卡紙，而埋去前見到呢幾隻艾菲一直叫佢做啦啦球嘅嘢，又影張相先﹗



最後返出去正門同呢個巨無霸餐影返張全家福就行完啦﹗



離開科學館後，我哋嘅行程仲未完㗎﹗轉個彎我哋就去咗科學館外面，搵艾菲此行另一樣好想搵嘅嘢，嘻...就係睇到艾菲心心眼嘅心心樹啦﹗事源出發前睇朋友仔FB見到呢棵樹嘅相，見佢留言話喺澳門影即問佢詳細位置，點知原來就係科學館出面，好易搵堅係轉個彎就見到，即放呢兩兄妹落去影，又難得兩個都好合作，有笑有望鏡頭仲要艾菲無out focus，YEAH！


 
影埋心心樹，艾菲此行出走澳門想玩想食想做嘅都做齊，真係心滿意足啦﹗見時間尚早，於是就沿路行咗出去海邊，兼好無聊咁搵咗個位玩自拍，來來回回咁走咗好多轉影咗好多張，最終都影唔到一張完美嘅全家福，不過啦...重點唔喺結果到，而係影嘅過程入面，充滿住期待同歡笑聲，真心多謝米高今次畀艾菲任性出走，無佢嘅成存就唔會有呢D珍貴回憶。


 
玩到黃昏日落，我哋就坐返車出去行澳門八佰伴，逛咗陣買咗少少手信再求其喺附近搵間餐廳食個晚飯，然後就去港澳碼頭坐返船返香港，臨走前仲好順利咁喺碼頭買到罐樂宮曲奇，圓滿結束呢個兩日一夜嘅出走之旅。

出走澳門Day1
出走澳門Day2 ~ part1