第二朝安排咗去坐松山纜車，不過一覺瞓醒竟然落大雨﹗由於艾菲每次去澳門都好邪咁遇著雨神（中嘅比率接近九成半，打風都試過兩次），所以都一早準備咗plan B去科學館，但我家天文台台長米高研究咗輪，決定如期出發話落雨仲好少D人喎，咁我哋就冒住雨去咗纜車站附近嘅玫瑰咖啡室食早餐，呢到係睇台灣blogger介紹，咪睇佢外表殘殘舊舊咁，碗豬扒雞翼公仔麵係好味到一個點，即點解呢D味永遠喺香港茶餐廳食唔返㗎呢？？？
食完早餐出來，竟然停﹗咗﹗雨﹗﹗﹗嘩﹗今次個天真係錫住我哋呀﹗YEAH！
快手影張到此一遊就入去畀錢上車啦﹗呢個纜車成人單程兩蚊，來回就三蚊，我哋有行開山其實坐單程都OK，但咁抵又無理由唔坐返落來囉，嘻...
其實點解要特登過來澳門坐纜車，全因香港360條隊永遠長到唔見尾，呢到車程短亦唔算多人，可以同時滿足燒腩仔想坐纜車，米高又無乜興趣排長龍畀錢吊喺半空慢慢坐嘅願望。
五分鐘唔使就坐完嘅纜車，個車廂都幾細同窄，兩個大男人平排坐應該會嫌逼，不過同艾菲兩個好slim嘅小寶貝一齊就好寬落。
一落車最吸引住艾菲同燒腩仔眼睛嘅並唔係遊樂場，而係老遠兩個喺健身設施上左右fing嘅姨姨叔叔，我哋即時衝埋去想玩埋一份，但眼見燒腩仔根本唔夠手長腳長去玩，有個路人甲姨姨就好心提我哋，後面原來有一堆兒童版嘅健身設施﹗wow...艾菲真心覺得呢個設計超級貼心囉﹗健身並唔係大人專利來㗎嘛﹗kakaka...
我哋玩夠之後就開始起行上山。
見到枝大炮即就到目的地。
穿過呢間放滿風球波嘅房。
見到呢間守衛房。
到啦﹗到啦﹗
到邊到？之唔係澳門嘅最高點囉﹗
呢到可以望晒成個澳門本島咁滯﹗
除咗有好出名嘅東望洋燈塔，仲有好靚嘅教堂，側邊仲有枝大炮添，艾菲覺得都幾值得來。
喺教堂側邊見到呢個窗同條樓梯，感覺幾特別就放燒腩仔上去影吓相，正經或型男pose係無可能叫到佢做，終於佢整咗個古古惑惑樣出來，哈哈...勁襯佢囉﹗
至於BB豆豬呢，未識企同唔到佢影靚相，唯有同模型影啦...hehe...
行完就坐返纜車落山，繼續我哋餘下嘅行程啦﹗
坐完纜車見時間尚早，我哋就直接去燒灰爐公園，玩咩？睇燒腩仔個手勢就知啦﹗
以前拍拖來澳門，幾乎次次都會行過呢個公園，但從來都唔發現入面係有車仔玩，今次真係多得檬媽嘅介紹，仲要五蚊可以玩足十五分鐘，超抵玩囉﹗
由於價錢實在太抵，我哋呢日又無乜人（前後只係四個小朋友左右），米高好豪氣咁畀佢玩咗三round，大滿足啦﹗
至於無份玩嘅BB豆豬，都食足咁多round，又餅又包把口幾乎無停過。
玩到尾燒腩仔都玩到夠，艾菲叫佢讓畀BB豆豬坐一陣一齊影張相，佢都好合作無扭擰，仲主動做埋V字手勢添﹗
玩完好乖仔咁無扭即走，然後我哋沿路行返出去搵車坐去食飯，經過郵筒艾菲就順手介紹吓佢睇，邊行邊學係艾菲每次帶佢去旅行嘅目的，等佢觀察多D身邊嘅一事一物。
行咗成大條街都截唔到的士，終於我哋決定坐巴士出返去，對於交通迷來講又係一個好好嘅體驗，不停研究澳門巴士同香港巴士嘅分別，返到來仲猛問澳門嘅巴士總站係點。
出走澳門Day1
沒有留言:
張貼留言