出走澳門Day1

話說前排湊仔湊到好depress，情緒真係差到想乜都唔理走咗去，自己一個同BB豆豬來個出走台灣（佢早晚埋身食奶飛唔甩啦），不過畀米高問艾菲一個人顧得BB車定顧得行李，事實的確如此只好打消念頭，又其實暑假都已經去個長旅行，實在好難說服米高畀艾菲去個短trip，終於借慶祝BB豆豬生日做藉口，成功爭取喺BB豆豬生日後第二日出發去澳門兩日放個假﹗



今次去澳門，目標好明確就係食同玩，好記得檬媽介紹過滑草，香港無得玩一場來到點都要試，所以落船即去澳門機場快食個麥當勞，然後就衝上大潭山郊野公園。



澳門其實有兩個免費滑草場，揀來呢邊貪佢交通方便近機場，喺機場穿酒店出去會議展覽中心方向，再沿山邊行條大斜路，唔使十五分鐘就搵到滑草場入口。



一心諗住早D來唔使逼玩耐D，點知我哋下午一點幾來到，原來有放飯時間兩點先開返，唯有去附近公園玩吓，雖然呢日天氣又焗又熱，不過難得公園無乜人可以任玩韆鞦（大家幾耐無試過排隊玩韆鞦，又唔使玩一陣就叫小朋友落來讓畀後面個小朋友玩），燒腩仔玩到唔願走呢﹗



喺公園玩完玩罷，再喺附近四圍hea吓，呢到環境都幾唔錯，如果有心影都有D靚位影相，不過艾菲個model個心已經飛咗去滑草，叫佢行近D棵樹都say no就無謂勉強。



喺門口等嘅時候陸陸續續都有D香港人來，不過就無想像中咁多人，我哋夠鐘即衝入去玩，首先來個單人，不過可能燒腩仔唔夠重，未到底已經停咗。



再同爸爸來個雙人嘅，今次一衝到底夠晒刺激，燒腩仔個口全程笑到無合埋過囉﹗之後艾菲好榮幸獲邀同燒腩仔滑咗四五次，堅係好有速度感好好玩﹗推介推介﹗



來來回回都應該玩咗廿幾次，每次玩完燒腩仔都會自己拎返個滑草兜上去，將個滑草兜交到姨姨手先走，等姨姨交畀下個小朋友玩，自己就去龍尾再排隊，呢個位真係要讚一讚佢﹗

滑完草我哋就轉場去咗官也街搵食，來澳門當然唔少得食葡撻，宜家安得魯喺官也街有分店，真係方便過以前好多，食完撻米高居然去咗幫襯長洲糯米糍專門店買芒果汁，不過兩個芒果狂熱分子一致認為杯芒果汁好淡。



之後我哋都不過圍住官也街逛咗個圈，燒腩仔已經熱到發晒脾氣，十把芭蕉扇都搞佢唔掂，見大家都未食飽就入咗青州灶記坐吓食吓涼吓冷氣冷靜吓。



以前去親青州都係食劉記，估唔到呢間灶記又幾OK喎，豬扒包同一寸厚西多都好好味，至少食到燒腩仔識笑返先啦﹗



食飽就直接坐的士返酒店check in，今次我哋揀咗住金莎城Holiday Inn，咁啱遇正做promote，weekend一千頭唔包早餐都算抵住。



一入房當然係放低BB豆豬上去碌床啦﹗



而哥哥就直踩BB豆豬張網床。



settle down之後，艾菲就餵佢食下午茶奶再齊齊瞓一陣休息吓先再出動食晚餐。



來澳門另一樣好想食嘅就係地道葡國菜，呢間Cafe Lisboa係上網睇blogger介紹，喺氹仔一個屋苑入面，細細間一D都唔顯眼，入到去見老闆好似幾嚴肅咁嘅樣，但坐落再傾吓發現佢都好nice，主動問BB豆豬要唔要BB凳，又介紹D甜品畀燒腩仔揀，至於食物更加係超級好味，無論係忌廉馬介休定個牛柳都食到艾菲同米高舐舐脷，就連甜品都同樣出色，呢間餐廳絕對有下次﹗



食飽我哋返去酒店附近行吓散吓步，睇完巴黎人個鐵塔後，就帶咗佢兩個入兒童世界坐車仔，之前行康怡AEON Style都見到呢D車仔，不過數量唔多D大人仲要明明小朋友唔坐都霸住唔畀其他小朋友坐，結果燒腩仔一次又一次失望而回，今次來到呢到就唔使爭可以一人一架任坐啦﹗

坐完車仔我哋就返上房沖涼休息，明明話放假但艾菲都係要搞到凌晨兩點幾先倦極而睡，而明明瞓之前望見BB豆豬喺網床到瞓得好好，點知到凌晨四點幾畀佢嘈醒扭食奶時，佢竟然瞓咗喺自己隔離，以佢當時未識自己爬出床來講，成件事實在係太離奇，當時米高猛話係艾菲自己太攰所以抱咗佢出來都唔記得，但艾菲雖然攰都未至於斷片，而且方向位置都同平日喺屋企唔同，無理由會抱咗佢出來而零印象，莫非....

有一刻艾菲係諗過衰嘢，不過憑自己嘅直覺又覺得應該無嘢，但安全起見事後都唔敢再放BB豆豬落網床瞓，只係一家四口逼喺同一張床，燒腩仔又瞓到打風咁，艾菲同BB豆豬都瞓唔好，終於頂唔住叫燒腩仔落BB豆豬張網床到瞓，估唔到佢又好開心一口答應喎，卒之我哋大家都一覺瞓到第二朝再無任何古怪事發生過。

返到香港，艾菲都有諗到底咩事咁離奇，然後一星期後嘅某一晚，BB豆豬就畀咗答案艾菲，話說當晚佢又係食完夜奶瞓著咗，艾菲就剩機偷走咗出廳整D嘢，忽然米高聽到房入面有喊聲，艾菲忙緊無即時入房，轉頭聽見靜咗就入房望吓，發現BB豆豬喺半睡半醒嘅情況下由BB床爬咗上大人床，再趴咗喺大人床上面繼續瞓，以此推論佢當晚都應該係半睡半醒，忽然道力就得啱就爬咗上來我哋張床到，再瞓咗喺艾菲側邊囉，kakaka...