13個月

媽媽今次真係超級過份呀﹗明明人哋月頭已經足13個月，佢居然等到月尾先畀我出場﹗諸多理由又話最近好多私務忙，又話哥哥開始放暑假無時間，又話要開始準備哥哥升小一嘅嘢，最後仲出埋絕招忽然病咗要小休兩日，搞到我差D以為要等到14個月大先有得見大家呀﹗



難得有得出場，等我快手回顧吓我嘅進度先，去完健康院見姑娘後，媽媽就話可以試吓再減一餐人奶，除咗早晚一餐埋身食奶外，宜家有時出街玩佢下午就唔餵我，不過喺屋企為咗想我快D瞓晏覺都仲會埋身餵，咁我下午都唔係好大奶癮嘅，有得食固然開心，無得食都唔會特別搵（但早晚夠鐘就會自己搵食）。

至於固體就食足三餐，午餐晚餐座底一碗爛飯無走雞，下午茶就繼續食麵包餅乾水果同乳酪，除咗打完針兩星期keep住發燒胃口差，其餘日子都係勁食得，一見大人食嘢就伸脷示意要佢哋預埋我一份，最鐘意黐爸爸媽媽D白飯同麵包食，佢哋畀遲一秒我都會嘈到拆天，不過我好叻豬已經開始識用匙羹筆食物，所以佢哋有時放低D飯喺我碗到，都可以快手食幾啖飯先再返來招呼我嘅。



講完食又輪到講瞓覺，繼續十點半十一點左右食最尾一餐奶，明明好眼瞓已經食到暈低咗，但瞓著十幾分鐘後就會忽然叉滿電起返身，一搞就搞足個幾兩個鐘先肯瞓返，結果又日日玩到凌晨一點先再瞓，媽媽話呢個都係我咁耐都出唔到場嘅主因，話我阻住佢做自己嘢無晒自己時間喎...

不過好彩的話，我一覺會瞓到六點左右先醒，起身爬上大人床食個早餐奶，只要feel到媽媽喺側邊，我自自然然就會瞓返（艾菲：想早D起身偷走出去做吓嘢都唔得），如果無事無幹可以瞓到十一點先起身，然後兩點左右會瞓晏覺，哥哥唔喺到可以瞓足兩個鐘，哥哥喺到就...瞓到一個鐘都好叻豬，至於出街媽媽就逼都廢事逼，只要唔嘈唔扭佢一般唔會理我瞓唔瞓（艾菲：唔...其實點揹法都已經決定佢要唔要瞓啦...只不過唔特別拍之嘛...kakaka...），求其由我一次過或分兩次瞓到夠一個鐘就算。



黐媽症情況已經改善咗好多，只係特別時間特別情況下先會特別黐媽，其餘時間可以交畀熟人照顧（艾菲：明顯媽媽呢期出得街太多啦...hehe...），不過就開始有自己性格同脾氣，一有咩唔啱心水唔滿意就大喊趴落地（艾菲：又係lur地呢招﹗），但面對住久經訓練嘅媽媽，佢一D都唔心軟仲會開始同我說教，咁我都知自己扭計唔啱嘅，所以佢一叫我起返身我就會乖乖坐返起身扮無嘢（艾菲：暫時睇佢係惡但無哥哥咁掘，似係識時務者魏晉傑D朋友來）。




活動能力繼續係A++級別，開始肯畀大人拖住行，鬆手自己行就仲未有信心，除咗爬得勁快之外，成日擒高擒低跌極都唔驚，有日媽媽只係行開同哥哥做功課，無望實我五分鐘左右，我已經擒咗上部玩具琴到坐，仲要招招積積咁望住佢哋笑，無乜安全意識連窗都擒超大膽，但已經識喺梳化同床到要反轉身落地，基本上屋企個圍欄都唔係點欄到我（艾菲：佢會由梳化擒上highchair，再由highchair擒出來），宜家媽媽行開唯有靠哥哥望住，又或者索性開咗個欄由我自由行反而無咁危險。



大小手肌都發展得唔錯，去公園已經識得玩D轉轉轉同推珠珠嘅玩意，會自己騎上Rody到un（艾菲：識上未識落），除咗喺媽媽個電話卡片套到拎八達通出來玩，仲會偷偷地收埋佢放入面張後備錢，最鐘意拎晒哥哥個圖書袋D圖書出來逐本咬逐頁睇，知道書入面D係食物會用手扮食同請大家食，識得㩒D玩具按鈕去開歌聽，會幫媽媽收衫夾硬拉D襪落來畀佢摺，咩都可以放喺耳仔邊扮講電話（艾菲：成日畀爸爸笑佢係特務）。



金口到宜家仲未肯開，今個月連媽媽嘅音都無埋，頂多人人都叫佢做「DaDaDaDaDa」，相對哥哥來講算係遲，而且美食引誘喺我身係唔work（艾菲：唔比佢食會發惡更加乜都唔肯做），不過媽媽話唔使急慢慢來，皆因我乜嘢指領都識聽唔擔心，叫我名識畀反應，一話走會自動波bye bye加飛吻，教兩三次已經識happy face，hi five同飲杯，醒到一出電梯就笑晒口舉高手同樓下保安姨姨say hello，見到有咩特別會手指指指出來，有次媽媽切親手指貼咗膠布我更加係即時發現到（艾菲：連哥哥都隔咗日先見到，所以話男仔係無心肝D）。



同哥哥越來越多互動，成日望住哥哥做咩玩咩跟住去學，又經常謀住哥哥嘅用品，一拎到佢嘅嘢就勁開心想據為己有，結果當然係同哥哥擦出好大嘅火花，激到爸爸媽媽彈吓彈吓啦，哥哥粗魯底唔係好識對我溫柔，不過我都唔弱爭起玩具上來死都唔放手，有次哥哥事後都忍唔住同媽媽投訴我掟佢架車，媽媽只好勸哥哥唔好再成日撩交打（艾菲：宜家就話掟落地，遲吓發起惡上來掟落你頭都似，到時都唔知邊個受傷邊個喊啦）。



媽媽呢排開始要煩哥哥升小一嘅事，不其然都要諗埋我嘅學業問題，佢話佢應該唔會畀我讀N班，playgroup都視乎遲吓有無需要同時間再決定，至於讀邊間幼稚園嘅問題，佢希望我可以讀到哥哥間學校，因為佢真係好鐘意呢間咁有愛嘅學校，不過都好睇哥哥實際入咗邊區同邊類嘅小學，所以宜家先集中火力搞掂哥哥，之後一切都好辦事咁話喎。