阿哥整餅之一口小米通

有日同燒腩仔坐巴士，咁啱睇到Roadshow教整米通，即叫都OK鐘意整嘢食嘅燒腩仔一齊睇，點知佢睇完就不停叫艾菲同佢一齊整，雖知整容易食唔容易，一家四口實得三把口，整完食唔晒就浪費嘛，終於拖到BB豆豬五月開生日會，多D人一齊食就可以整啦﹗



生日會前一日下午，艾菲扑暈BB豆豬即同燒腩仔開工，呢個小米通所需嘅材料唔多，牛油少許，小棉花糖一包（大都得，不過溶會花D時間），cereal適量，同小紙杯或者食物盒，其實份量真係好隨意，因為呢個組合點整都一定唔會難食，嘻...



首先溶咗D牛油，再倒成包棉花糖落去搞溶佢，之後就可以加cereal落去撈勻，由於艾菲用嘅卡樂B cereal本身已有乾果，所以唔需要後加任何嘢就直接入得模，如果普通cereal又想有咬口D的話可以加少少堤子乾之類再入杯或入盒（用食物盒的話記得放牛油紙喺底），然後將D米通放雪櫃雪一個鐘就大功告成。



宜家燒腩仔大個仔，除咗量材料要艾菲做，同最後入杯太黐要艾菲幫外（我哋起初用錯鐵匙勁黐，但後來發現膠刮係無咁黐嘅），其餘都係佢自己來就OK，我哋用小蛋糕嘅紙杯做成一口size方便食，如果用盒就要等佢雪好後，拎出來切返自己想要嘅size同再包裝。



到生日會當日，艾菲再吩咐燒腩仔大廚逐件逐件放上呢個12蚊店買嘅tea set架（據講呢個架係用來放雜物而唔係食物，不過反正D米通又唔熱仲有包裝紙隔住，無所謂啦），賣相即時升咗呢，而大廚燒腩仔仲好搞笑咁猛叫大家食佢親手整嘅甜品，結果當然係如願順利清碟同獲得一致好評啦﹗kakaka...