出發前都十五十六掙扎咗成個朝早，眼見D家務清得七七八八，燒腩仔呢日嘅表現又尚算良好，於是食飽午餐就gogogo，半天遊嘅第一個景點就係雀仔街，其實艾菲咁耐以來都未入過雀仔街，之不過賣雀賣蟲呢D嘢，以前細個屋企樓下街市都有得睇，但對燒腩仔來講就絕對係新鮮事。
雀仔街地方唔係好大，一行入去就好似入咗另一個世界咁，周圍都係雀同雀同蟲同籠，我哋漫無目的咁四圍行吓睇吓，講真艾菲對雀鳥嘅知識實在唔多，可以教到燒腩仔嘅亦唔多，只係基本嘢都勉強解答到佢，例如D人點樣養雀，D雀食D咩，同點解要個籠呢D囉...
行吓行吓我哋就來咗檔賣鸚鵡嘅檔口到，見到有隻鸚鵡BB放咗喺到就埋去望吓，檔主好好人明知我哋無幫襯都介紹畀我哋知，咁艾菲當然剩機問吓佢幾錢咩來頭，又叫燒腩仔自己問吓叔叔鸚鵡BB食乜嘢，一問之下艾菲先知鸚鵡BB原來可以賣成三千幾蚊咁值錢，檔主話佢貴在可以養廿年，而且養得熟唔會自己飛走，而咁貴嘅鸚鵡BB當然係飲專用嘅鸚鵡奶粉，今次真係長知識啦﹗
傾傾吓咁啱有對父女路過，佢哋係堅有幫襯想買雀，於是檔主就更加熱情咁叫我哋試吓摸隻鸚鵡BB，但燒腩仔細膽唔敢摸，我哋唯有去隔離檔睇埋D大鸚鵡就走，唔好阻住叔叔做生意。
離開雀仔街，燒腩仔陪艾菲穿過花墟睇咗陣花同飾物後，我哋就沿路行咗去金魚街睇魚，呢日天氣其實都幾熱，就算港媽艾菲常備芭蕉扇旁身，燒腩仔都係熱到不停周身R，不過為咗睇魚佢都幾堅持，好乖咁頂住大太陽一齊行到目的地，完全無扭無發脾氣，叻叻﹗
其實金魚街我哋周不時都會行過，只係今次叫做特登去睇魚睇貓，所以放慢腳步慢慢行，而除咗哥哥睇得興奮，好搞笑咁一見到魚缸只得一條小丑魚就問佢爸爸去咗邊（睇Nemo睇到上腦>.<），妹妹都好enjoy睇到手指指踢晒腳，而哥哥攝影師仲好乖仔咁幫妹妹影咗張到此一遊相添﹗
我哋逐間鋪頭慢慢行慢慢睇，行到四點左右就撤退返歸啦（要喺放工時間前返屋企），而呢個旺角半天遊嘅總消費係零（除咗校服乜都無買，就連零食飲品都居然無買﹗），但開心指數就係爆晒燈嘅，唔...燒腩仔今次咁乖咁合作，來緊暑假睇來都可以多D一拖二出街玩，希望艾菲講得出做得到啦（每次一拖二出街都會有好大掙扎，怕佢哋是但一個唔合作，就會將件事變成吃力不討好）﹗
沒有留言:
張貼留言