同好朋友一齊睇藍精靈

早喺上次去睇《美女與野獸》時，艾菲就同燒腩仔約好咗復活節假去睇《藍精靈迷失的村莊》，咁啱放假前佢好朋友媽咪問起有無興趣一齊睇戲，我哋就約埋喺屋企樓下戲院睇，順便放米高半日假抖一抖（今次真係玩足咁多日佢都無乜得抖，反而艾菲就可以日日瞓多一個鐘），陪BB豆豬喺屋企瞓晏覺。

約好咗朋友仔早少少喺戲院等，兩個好朋友一見面即你追我逐，想叫佢哋企定一陣影返張相都難，而最搞笑係居然喺到撞到佢哋上年嘅同班同學睇同一套戲，朋友仔亦另外撞到兩個自己嘅朋友仔，所以艾菲成日話呢...屋企樓下戲院真係好旺場，周不時都喺樓下商場撞到朋友同學仔甚至老師。

好不容易先終於等到夠鐘入場，然後未開場只係播trailer，兩個小朋友已經無厘頭咁笑到咔咔聲，到開場之後就更加笑得大聲， 好彩呢場幾乎全場小朋友嘈都唔怕咋，至於我哋兩個媽咪就喺側邊滴晒汗完全唔知佢哋笑咩，兼不停食零食食到勁飽囉（好朋友媽咪驚佢哋坐到悶所以帶咗大量零食入場，結果佢哋唔係好食我哋大人要幫手清咗去）﹗

講真套戲對大人來講都有些少悶，不過畫面又真係幾靚嘅，但最爆係完場時燒腩仔第一句係話「好睇唔驚呀」，言下之意就係上次佢睇《美女與野獸》時OK驚囉>.<，見佢笑足全程都唔知有無留心睇，艾菲就試吓考佢劇情，估唔到又答得出喎，只係轉頭已經唔係好記得D主角叫咩名。

睇完戲兩個小朋友當然唔捨得走住，於是我哋就帶咗好朋友去附近公園玩，順便等好朋友爸爸過來接佢哋，有伴一齊玩真係同平日自己一個玩好唔同，凡事都有商有量咁，又有得互相照應，等媽媽們可以剩機傾吓偈抖吓，不過到好朋友要走時，有個傻瓜豬又唔捨得，喺到扭計兼爆喊囉...