一歲啦﹗

果然媽媽真係拖到我一歲生日都過埋，仲未開始寫復活節假D blog，咁我唯有又打尖出來同大家宣布我一歲大啦﹗雖然我唔係好知發生乜事咁就過咗個生日，不過媽媽都好公平地同我玩咗cake smash，開咗mini生日會，正日就一家四口喺屋企食生日蛋糕慶祝，由哥哥負責唱生日歌，代吹蠟燭同切蛋糕，生日第二日仲安排咗個兩日一夜嘅澳門trip畀我呢﹗（艾菲：之所以咁忙一直無時間出blog啦...）



入返正題講返成長進度先，當然係由我嘅強項食開始講起， 呢個月我畀爸爸媽媽起咗個花名叫做小吃貨，皆因我拍得住當年嘅為食哥哥有凸，已經加到一日六餐三奶三固，早午晚三餐奶埋身食，午餐晚餐食成碗幾爛飯，中間再加多個下午茶食吓水果餅乾之類，不過食完後仲可以無限量添食，同爸爸媽媽出街食飯我係可以食足三個鐘，無停過口咁由頭帶到落尾，甚至畀遲一陣我都會嘈到拆天咁搶嘢食﹗

呢個月只係試咗全蛋同橙呢兩樣新食物，媽媽見我咁為食又已經出咗四隻牙仔，就決定畀枝匙羹我學筆嘢食，暫時未係好掌握到點筆，但當媽媽筆好D食物喺匙到，我再自己放入口食嘅命中率就高達九成，而D食物都無再攪到好碎，間中會畀原條粟米，切片水果我自己拎住食，而由於我食極都唔係幾重，堅持自己生長線無上調空間，所以媽媽都開始放寬會畀少少街外食物我試（艾菲：其實都只係馬拉糕，蛋糕，麵包之類），佢話食得幾多就盡食幾多，想話谷肥我喎...



瞓覺方面都係時好時唔好，宜家每晚十點半十一點左右食最尾一餐奶，跟手會自動暈低乖乖瞓覺，瞓得好的話可以一覺瞓到第二朝六點幾，瞓住食餐早奶再瞓到十一點先起身，瞓得唔好就可以凌晨三四點就醒，有時搞成兩個鐘都唔瞓返，要媽媽鬧先食完早奶再瞓，好醍瞓認地方兼要黐住媽媽瞓，搞到媽媽想趁我瞓著出廳做吓嘢都要做賊偷偷摸摸咁先得。

至於晏覺就好似之前咁，送完哥哥返學後就返屋企瞓，通常都可以由兩點瞓到四點半，不過出街的話就真係可以唔瞓，而媽媽為免我成日喺街扭眼瞓嘈到爆炸，索性唔暗我瞓由我唔瞓就唔瞓，等我攰到自動暈低無交嗌咁話，而喺咁自由嘅情況下，我通常都會瞓到兩次覺，加埋都瞓到一個鐘多D嘅。



黐媽症情況無再惡化落去，當人多同對住陌生人時都係要跟住媽媽先安樂，但對住熟悉嘅面孔都肯跟爸爸哥哥，甚至公公婆婆同爺爺嫲嫲都OK，不過我人仔細細已經識蝦人，會揀人抱揀人玩，知道公公好蝦就專登唔聽佢話，佢一抱我即掙扎落地，又識推開姑姐再用眼淚攻勢唔畀佢抱，仲會專登擰歪面唔同佢玩。



活動能力繼續係A++級別，可以自己鬆手企到半分鐘，成日扶住嘢行來行去，但仲未敢鬆手自己行，爬得勁快兼坐唔定成日擒高擒低，換親片都會反轉再反轉，仲成日想喺high chair同hip seat到爬出來，有次坐超市BB車幾乎因為咁而夾住隻腳拎唔返出來添﹗



小手肌發展好好，已經識得執地下D塵來放入口食（艾菲：吸塵吸遲半秒都唔掂﹗），仲識得喺媽媽個電話卡片套到拎張八達通出來玩，會自己拎水杯飲水，識得㩒D玩具按鈕，可以自己完成入圈圈，有意識D入形狀要放返入去個箱到，知道電話要放上耳仔聽，玩具車就喺地下推，煮飯仔可以放入口食，書係打開來睇。



多多聲氣但仲未肯開金口講嘢，「媽媽」都係緊急關頭時先會叫，但發音就多咗少少變化，叫我全名或妹妹都識應你，知道大人鬧會停低扮乖一陣，叫錫錫會打開個口黐埋來（艾菲：有次佢失驚無神撲埋來錫咀咀，然後甜笑住走開，真係冧到艾菲暈低呢﹗），換衫時數123會舉高手畀媽媽幫我除衫，終於學識拍手，飛吻同bye bye，醒到一出電梯就舉高隻手同樓下保安姨姨say hi，仲會唔知醜咁去叫D陌生人，笑點低又成日笑笑口，所以出街時好受一眾姨姨叔叔歡迎。



同哥哥越來越friend，接哥哥校車時一見到佢就會主動叫佢，有時哥哥笑又會無厘頭咁跟住笑，成日望住哥哥做咩玩咩想去學，見哥哥除低個袋即去搞，哥哥心情好畀佢揹一陣即開心到執到金咁，仲唔畀我哋幫佢除返落來添，不過食嘢時遇著哥哥埋來搶，就天王都無面畀即時大叫求救，兼拎開D食物唔畀哥哥拎到（艾菲：有次燒腩仔想拎佢個食物盒話睇佢食咩，佢醒到識唔拎出來食住免得畀哥哥搶到）。



最後媽媽話要貼返張我由出世到宜家嘅併圖出來畀大家睇，哈哈...我個樣好似由出世到宜家都無咩點變咁喎，完全無哥哥當年嘅整容feel，不過真係眨吓眼就過咗一年，媽媽話我咁快已經由BB變咗做小朋友，好唔捨得我大得咁快，但我自己就想快D大個女，識行識走追住哥哥來玩啦﹗