原先艾菲一直打算買條紗裙仔畀BB豆豬著來玩就算，點知某晚瞓唔著睇pinterest，居然畀艾菲見到有外國媽媽自己DIY tutu裙畀個女，即時睇埋教學發現一D都唔難，瑣定生日會嘅theme colour後就上淘寶買料返來整，只係用咗一集煲劇時間就搞掂啦...啦...啦...（完全唔明點解會有人開班教整，仲要收成六百幾蚊一條食水咁深囉...>.<）
跟手要整嘅就係生日帽，為咗襯返黃色嘅主題，艾菲就喺淘寶淘咗頂金色生日帽仔返來，但係佢個帽頂係粒黃色毛毛波，仲有D金絲喺到，感覺好似好格格不入咁，反正整完tutu裙仲有紗剩，就自己整咗個波仔貼上去，本來想幫頂帽圍埋邊㗎，但畀BB豆豬試裙時發現佢唔太like網紗嘅質感，為免佢唔肯帶頂帽艾菲就唔搞咁多嘢啦﹗
而另一樣要DIY嘅就係相入面個一字牌，又係睇pinterest時見到睇片學，只需喺紙皮箱到cut個一字出來，再貼D同色嘅皺紙波波落去就OK，睇落好簡單但由於整趨紙波波都幾花時間，所以個一字牌都搞咗艾菲成晚㗎，起初都有後悔做咩唔就咁淘個一字汽球吹漲就算，但睇返影相個效果又覺得辛苦少少都值嘅。
搞掂就準備埋位啦﹗為免浪費艾菲一番心機，所以決定喺正式cake smash前同BB豆豬來個warm up先（套衫整污糟咗就返唔到轉頭嘛），set好布置就同BB豆豬換上戰衣埋位玩吓，由於影相時場面其實有D混亂（又要keep住BB豆豬嘅情緒，又要唔好畀燒腩仔搞亂擋），所以艾菲當時都唔係好知自己影咗咩，然後load相落電腦一睇，嘩﹗嘩﹗嘩﹗艾菲睇呢張相睇到心心眼囉﹗鐘意到一睇再睇再睇再睇﹗影到佢好lady好有feel呀﹗
BB豆豬係唔係一埋位就咁好表現呢？ 答案當然係no啦﹗佢其實一直都麻麻地條裙嘅質地，再加埋呢排唔係好鐘意帶頭飾，所以一換衫已經好唔滿意，仲要忽然拋低佢喺張地氈到唔知做咩，有黐媽症嘅佢梗係掙扎想走，好彩佢係一名不折不扣嘅小吃貨，至愛星星餅一出就乖乖收聲，但就換來無數張相都係影到佢食緊手指囉...
而另一好彩係佢呢排同爸爸friend返，艾菲叫佢叫到口水乾都唔理時，米高一出聲企喺艾菲後面扮聲，佢都肯畀面望吓佢笑返一個咁多。
來咗好多take，食咗大半盒星星餅，終於...終於...都畀艾菲影到張彈住琴扮淑女微微笑嘅相啦﹗對眼嘅角度係差DD（米高成日企起身叫佢搞到佢望咁高>.<），不過媽媽都收貨啦﹗
然後唔使一秒已經來個不爽樣，對手好自然就放上頭頂準備扯頂生日帽落來...
到底佢咁嘅狀態，到正式cake smash時會點呢？艾菲邊set場都邊擔心緊，不過又已經洗濕咗個頭無理由停㗎，唯有硬住頭皮頂硬上，結果留返下回分解。
沒有留言:
張貼留言