熟燒腩仔嘅人都知佢係一個唔可以玩驚喜嘅人，到宜家四歳半去邊做咩見咩人，艾菲都一定要事前brief定佢，否則佢D反應實會令你有驚無喜，不過艾菲今次就想試吓佢底線，早一晚同佢講第二朝去玩，只話有三個神秘嘉賓一齊，去邊做咩唔講佢知住，結果佢滿心歡喜咁問咗艾菲成朝去邊有咩人一齊，到去到酒樓見到公公婆婆同表妹都係呆咗唔識反應，明明好開心但把口就講住唔開心唔鐘意。
warm up一輪等佢情緒回復返正常，我哋飲完茶就出發去玩啦﹗雖則話今日唔係紅假期，但來睇玩具展嘅人都好多（始終係學校假期），買飛條人龍打晒蛇餅，好彩場外有白兵同Thomas可以影吓相消磨吓時間，又好彩艾菲今次有搵外援幫手，公公負責排隊買飛，艾菲就同婆婆帶住三個細去影相，分工合作慳返D時間又唔使三個細等到唔耐煩。
喺場外搞咗成廿分鐘都有，終於可以入場去玩，而我哋呢段日子入場送嘅玩具就係右邊兩個爬牆玩具，雖然玩咗唔係好多次就已經唔識爬牆，但大人不過十蚊一張飛，小朋友長者先五蚊張飛，竟然入場仲有玩具送，真心覺得抵到爛﹗
一入場就見到有麥兜同菇時，即拉兩個小朋友埋去影相，再send畀無份來嘅fans姨媽睇。
然後燒腩仔一見到hot wheels，即九秒九咁衝埋去試玩，可惜唔夠高又人多，只可以喺公公幫助下玩到一次咁大把。
玩完車兩個就衝咗去玩mega bloks，玩完玩罷就去同其他小朋友爭玩特大紙製層層疊。
喺遊戲區玩咗不知幾耐先拉得走佢兩個，然後畀婆婆發現咗呢個懷舊茶水擋嘅位，就捉咗佢兩個上去影相。
拖拉咗一輪，終於拉到兩個小朋友入去展覽區，睇見呢張相艾菲只係諗到「有伴真好」呢四個字，如果艾菲一個揹住妹妹同佢來，燒腩仔面上一定唔會有呢個笑容。
入到來展覽區，車迷燒腩仔都係沈迷喺D車到，睇到完全唔肯走咁滯，而右邊呢個識郁嘅火車，佢更加係拉咗公公埋去睇咗三四次﹗
行行吓忽然見到公公一直珍藏喺屋企隻唐老鴨錢鑍，原來係想當年渣打銀行開戶口送嘅禮物，至於艾菲就只係認得右邊呢D屬於自己年代嘅玩具（米奇鐵皮車除外>.<）。
行完再落返樓下同堆黃鴨仔影相，喺外圍影唔使排隊唔阻到其他人就OK，想入去同大黃鴨影就要排隊，我哋當然又派公公去排，但由於無帶大機公公又技術有限，D相影出來效果就麻麻囉...
除咗黃鴨其實仲有忍者龜同美國隊長，不過燒腩仔就明顯對佢哋無乜興趣（因為唔識嘛）。
影完相睇完展覽，再入返正門行精品店同摺紙區玩摺紙，咁就玩晒成個玩具展，係時候同公公婆婆同表妹浵講bye bye啦﹗
同場加映， 咁啱畀婆婆影到，等艾菲放張相機背後畀大家睇吓先﹗艾菲宜家一湊二，貪方便成日都前面一個BB豆豬，後面一個背囊就四圍去，咁到底行山同去街時係點影相呢，之唔係一手攬住BB豆豬，另一隻手舉機亂㩒囉，好彩就畀艾菲影到左邊張相放上IG呃like，唔好彩就好似上次去花展咁，BB豆豬一扭計郁身郁勢，艾菲就乜靚相都影唔到㗎啦...
沒有留言:
張貼留言