難得偷到時間又清吓blog先，清明節當日米高有假放兼唔使拜山，為咗抓緊春天嘅尾巴我哋又出動去行山，今次由大浪灣行去小西灣，不過天氣好加清明節個個去拜山嘅關係，我哋喺筲箕灣排咗超耐隊先上到巴士去石澳，再由石澳慢慢行入大浪灣，到起點時已經係正午一點幾（但我哋明明一早起身出發...）。
一場來到大浪灣，起行前米高話帶燒腩仔去睇吓海邊個石刻，真係唔講都唔知香港原來有呢D古時石刻，不過以燒腩仔嘅年紀，解釋完佢知轉頭應該都唔記得咩來。
出發啦﹗由海灘側邊沿燒烤爐嘅方向，慢慢就會行到去石刻同上山嘅位置，而我哋企喺高位就可以用另一個角度望返大浪灣，個view都靚㗎﹗
而喺艾菲幫燒腩仔父子影相嘅時候，就有一對行山男女主動話幫我哋影全家福，咁我哋當然欣然接受，而佢個朋友仲要幫手喺後面叫兩個小朋友望鏡，結果就成就咗呢張picture of the day啦，YEAH!
呢到雖然係景靚，不過全程都係樓梯同樓梯，少爺兵燒腩仔當然唔多頂得住，keep住叫攰叫熱叫痕叫飲水，好彩去到第一個涼亭休息時，有個唔識嘅行山姨姨忽然塞咗幾舊橙請佢食，佢先好少少無咁多扭擰。
上咗三分一左右，擰轉頭就可以望晒全個石澳，而另一邊就係180度無敵大海景，真係好心曠神怡呀﹗
難得停低睇風景吹海風，等艾菲順手試吓新買枝天涯鏡先，由山上影落海邊無out focus仲影到D浪花，收貨啦﹗（之前一枝定焦走天涯，但行山影景實在唔夠用，去完花展後卒之的起心肝去買鏡>.<）
幾經辛苦先上到第二個亭（其實艾菲都怕怕地行樓梯），即放BB豆豬出來食D嘢休息吓。
D哥哥唔知點解好鐘意食妹妹D BB嘢，為免妹妹D星星餅畀哥哥搶晒，一於帶多盒cereal去，一人一盒唔使爭。
食完就繼續向歌連臣角道進發，呢個位開始有返D平路行又有樹蔭，算係好舒服啦﹗
繼續向上行多十五分鐘左右就到砵甸乍山觀景台，呢到可以望返過去將軍澳同九龍東，可惜最靚嘅位畀班姐姐霸咗來自拍（姐姐放假去行山確係好健康呀﹗）。
過咗觀景台後就係一直落山嘅長樓梯，唔覺唔覺我哋就衝咗落山啦﹗全程只係用咗個半鐘咋﹗而呢邊呢段路都有唔少同燒腩仔差唔多大嘅小朋友行，加埋同樣講唔停嘅姐姐們真係好熱鬧呢﹗
落山後我哋就沿住呢條龍躍徑（好似係晨運徑來），沿斜路行返落小西灣公園。
撐咗好耐嘅BB豆豬終於捨得瞓，咁啱段路又舒服易行，等艾菲剩機試吓鏡先﹗
影完人就影吓心心葉。
仲有四圍飛嘅蝴蝶。
同已經所剩無幾嘅木棉花。
整體來講，艾菲都幾滿意枝新鏡，帶出街甚至揹住山都唔覺重好多，又影到艾菲想要嘅嘢，不過仍然要D時間溝通，同肯定取代唔到枝定焦鏡（始終影人定焦係出色好多）。
由於之前等車搞到遲咗出發，我哋落到小西灣已經係四點左右，未正式食午餐嘅艾菲同米高都餓到肚扁咁滯，不過燒腩仔見到遊樂場即雙眼發光要衝入去玩，點都要畀佢sir返兩次先走得。
沒有留言:
張貼留言